6.5.13

اعمل فيّا إيه؟!!




تبقى عايز تنام بدرى عشان تستفيد من يوم الأجازة من أوله، تمسك رواية 400 وشوية صفحة وتبدأ فيها، هما بس 10 صفحات عشان اروح فى النوم بسرعة، تخلص العشر صفحات، طب الفصل الأول وخلاص كده؟ آه، الفصل الثانى كمان! طب الثالث كمان وخلاص! لأ، بصى، عشان الأمانة مع النفس أول ما يحصل حدث يقطع الفضول اللى عندى والدنيا تبتدى توضح حسيبها على طول! طب بمجرد ما الفجر يأذن حسيبها! وهكذا لغاية الـ 400 وشوية صفحة ما يخلصوا! اليوم اللى قبل ده قاعد طول اليوم تقرأ كتاب 600 وشوية صفحة! اللى نفسى افهمه واستوعبه واعرفه لييييييييييه الشغف ده والفضول والمتعة وعدم الإحساس بالوقت ما بيجتمعوش مع المذاكرة! ليه عشان افتح فايل اشتغل فيه ألف وادور وأروّق أودتى –المتروّقة أساسًا- وأرش البرفيوم فى الجو وافتكر أن فيه جيبه محتاجه تتغسل! وبعدين طب آخد بريك –مش فاهمه بريك من إيه أساسًا!- لغاية ما العصر يأذن اصليه وابدأ على طول! آآآآآه صحييييييح الغدا، لأ! أنا مقصرة فى حق نفسى من ناحية الأكل! شايفه خسيتى إزاى! ووشك أصفر! ده إلا الصحة! :
D


طب أنا مُحبطة منى .. والله العظيم بقى مُحبطة .. مش عارفه اعمل إيه عشان اشتغل فى الماجستير! اكتفنى؟ اخلى ماما تحبسنى فى أودتى مع توفير كافة الاحتياجات من أكل وشرب وإغلاق زر الوايرلس! لأ لأ محتاجه النت فى السيرش! الله! ده علم ومفيش دلع فى الحاجات دى! طب خلاص خلاص حدّى لماما باسوورد الفيس وتويتر عشان تغيّرهم وما تديهمليش! ووعد مش حقرأ أخبار، اصلا بتجيب احباط! ولا بصة سريعة على المقالات! ولا اعمل سيرش على اليوتيوب اصلا!

 بصى عشان تشجعى نفسك يا بسبس، ادخلى على اليوتيوب ودوّرى على فيلم حلو ما شفتيهوش، واعمليله داونلود على ما تخلصى شغل! بصى، أنتِ ما بتحبيش الغموض والجو ده، ادخلى اعملى سيرش على ردود الفعل على الفيلم وقصته إيه اصلا .. مش يمكن يطلع اى كلام! وأضيّع ساعتين وشوية من وقتى عشان فيلم أى كلام! أهو ده اللى لا يمكن أبدًا! إيه ده الفيلم مقرّب يتحمل! المغرب اصليه وبسم الله! طب حعمل عصير بسرعة وآجى! بصه سريعة واشوف شغلى! أنا ضيعت وقت كتير! الفيلم شكله حلو! ربع ساعة بس واقفله! إيه ده، ده فاضل تلت ساعة والفيلم يخلص! يالاّ مش مهم اشوفه وبعدين اشتغل! عشان يكون الشغل برواقّه بقى! الحمد لله خلص! كان حلو أوى! يالا اقفلى أى حاجة ليها علاقة بالدلع ويالا بسم الله! العِشا بس قبل ما اندمج! أوووبس الوقت اتأخر! هو أنا بقترح اقتراح! أنا ممكن انام دلوقتى بدرى واصحى بدرى جدًا واذاكر .. آه عشان آخد اليوم من أوله! اقرأ كام صفحة من الكتاب ده عشان اروح فى النوم على طول! عشر صفحات بس!


هناك 7 تعليقات:

Mahmoud Bahgat يقول...

لابد من نقطة و أول السطر بس لما السطر بيتكتب كل مرة بنفس الطريقة يبقى لازم نفوق نفسنا بنفسنا
الكلام ده بالظبط كان بيحصل أيام الجامعة
ربنا معاك و يوفقك

محمد عبد الغفار يقول...

اله يمسيه باخير جوز خالتى "طبيب واستاذ فى الجامعه دحيح يعنى" جم عندنا مره فى البيت وانا فى ثانويه عامه ولما لقانى نمت بدرى اوى سالنى قلت له هصحى بدرى اوى اذاكر فى الروقان
وصلاه الفجر عشان ربنا يكرمنا وفطرا كويس عشان نعرف نركز والجرنال بقى عشان الثانويه العامه مش هتعزلنا عن العالم طب الحق اروح المدرسه بقى وهلم جرا
ولحد النهارده وبعد اكتر من 20 سنه جوز خالتى ماسكهالى ذله

الفرق الوحيد انى لو قرات اى كتاب بنام بعد 25 صفحه بالكتير

mesh2dra يقول...

@ Mahmoud Bahgat
مضبوط جدًا، يارب افوق واعمل "ستوب" قريبًا؛ مالهاش حل تانى .. الله المستعان
تحياتى لحضرتك

mesh2dra يقول...

@محمد عبد الغفار
هههههه، الأزمة يا فندم لما تكون طول عمرك -من وجهه نظرهم- "دحيح"، ومشروع أستاذ جامعى .. النتيجة انك بتدعى أنه "يارب ما حد يمسك عليّا ذله" :D

P A S H A يقول...

نفس اللي كان بيحصل مع أغلبنا بالمللي
:))
وبالذات مع القراية !!
مش عارف ليه كل الكتب بتبقى حلوة لما بنبقى عاوزين نذاكر إلا كتب المذاكرة !!
:))
يعني أنا افتكر إن الوحي ما كانش بينزل عليا وأبدا أصهلل كده وأكتب إلا أما أمسك كتاب من كتب الكلية !!
:))
ولا النضافة وترويق المكتب !!
أنا كنت ممكن أقعد أروق المكتب وأنضفه وأرص الكتب بالمللي أربع ساعات علشان أقعد أذاكر خمس دقايق !!
وبعد كده أتعب وأخش أنام أو أنزل أقعد مع أصحابي :))
طبعاً انتي المفروض كتبتي البوست ده علشان ترفهي عن نفسك ونفسك تتفتح للمذاكرة D:
خالص تحياتي

mesh2dra يقول...

@P A S H A
:)))))))) ناهيك بقى عن الجداول اللى كل شوية تتعمل.. الضمير يصحى ويفوق ويعترف أن اكيد الأسلوب فيه حاجة غلط، طالما البدايات والنهايات واحدة ومش فعاله .. ندوّر على ليه مش عايزين نقعد نشتغل وكل أزمة وليها حل .. نعرف الحل، نعمل جدول .. وإن شاء الله إن شاء الله نبتدى من يوم السبت الجاى .. بداية الأسبوع وكل سنة وحضرتك طيب :d
اتمنى البوست ده يكون بداية التغيير :DD
تحياتى لحضرتك

غير معرف يقول...


عطشـــان ياصبايا دلونى على السبيل

فى عام 2008 كتبنا فى مصــــرنا محذرين ... من المؤسف أن صحفى مصرى مقيم فى أمريكا يكتب و يهتم و يحذر منذ أكثر من 6 سنوات بينما فى مصـــر نيام .. نيام -
عزيــــزى القارئ أرجو أن تتعب نفســـك و تقرأ :
- حوار مع السفير إبراهيم يســـرى
- حوار الفريق ســوار الذهب : أتمنى أن تزول الحدود بين مصــــر و الســـودان
- ثقافة الهزيمة .. السودان أرض مصرية
- ثقافة الهزيمة .. موسم الهجرة إلى الجنوب ...

بالرابط التالى

www.ouregypt.us