7.12.07

هى قليلة الأدب ...؟!!

دي بنت قليلة الأدب ... اهلها ماربوهاش
صحيح فعلا ... ان كان عندها أهل أصلا عشان يربوها ... دي سفالة
( دول كانوا تعليقين من راجل وست قاعدين ورايا )
*
*
والله جدعة .. ما هى لازم تدافع عن نفسها ... يعني تتضرب وتسكت عشان يقولوا عليها مؤدبة
( وده كان تعليق البنت اللي راكبة جمبي )
*
*
كل هذه التعليقات على فتاة تقود سيارة ، أمامها سائق تاكسي توقف" فجأة" مما أدى إلي ارتطامها بالتاكسي وارتطام سيارة خلفها بها .
نزلت البنت والرجل الذي ارتطم بها للشجار مع سائق التاكسي الذي توقف " فجأة " ، ونزل أيضا سائق التاكسي ولكن متجها إلي شنطة العربة لاخراج الكوريك ومحاولة ضرب الفتاة على دماغها ، ناهيك بقى عن شد شعرها .
ما هو أصله مش عارف يتشطر على الراجل فبيضرب البنت ... ولكن قامت الفتاة بإعطائه علقة - حيحلف بيها طول حياته - والدفاع عن نفسها .
*
*
يا ترى البنت وقحة وقليلة الأدب وبجحة وأهلها معرفوش يربوها ده إذا كان عندها أهل أصلا !!!
ولا نرفعلها القبعة ونحييها لأنها دافعت عن نفسها في ظل وجود رجال " وقفوا يتفرجوا "!!!!
يا ترى كانت تدافع عن نفسها أصلا وتعتبر وقحة في نظر الغير ولا ما تدافعش وتتضرب وتتبعثر كرامتها من أجل أن ينظر إليها الناس باعتبارها البنت المؤدبة الضحية الرقيقة
*
*
ثواني ... قبل ما تدي حكم عليها ... حط أختك أو خطيبتك أو زوجتك أو حتى بنت الجيران مكان البنت دي ... كده بقى تقدر تدي حكمك :)
*************
البوست ده بمناسبة سؤال في تاج- تاج ليلى- بعتتهولي بسبس الروح
سلام عليكم

هناك 109 تعليقات:

A.SAMIR يقول...

بنت عشرة على عشرة
واللي علقوا وقالوا عليها قليلة الادب....دول فعلا اللي مش متربيين لانهم لو كانوا متربيين كانوا قاموا وساعدوا البنت دي اول ماشافوا سواق التاكسي الحقير دة بيرفع عليها الكوريك
شعب غريب جدا....لا بيرحم ولا عايز رحمة ربنا تنزل
تحياتي ليكي وليها لو عارفاها

Bella يقول...

مجتمع معقد ومريض

مفروض يعني تقف تتفرج على السواق السافل اللى عايز يقل ادبه عليها ويبهدلها وبيتشطر عليها لانها ست علشان تبقى في عينيهم وديعة ومؤدبة

انا لو مكانها كنت خليت السواق اتنقل على اقرب مستشفى وشالوه مكسر

على فكرة كتير جدا من السواقين مابيحلالهمش يطولوا لسانهم الا على الستات اللى سايقة رغم ان الغلط بيكون غلطهم هم

وغالبا طبعا الناس بتتفرج وكأن السواق بينتصر لهم كلهم من ست مضايقاهم في حياتهم

كراكيب عادل يقول...

الراجل الي يفكر يضرب مرة الي يفكر مش يضرب بيكون مش راجل من اصلة

وعايز حد يربية من جديد دة حتي لو هي ضربتة برضو ميمدش ايدة عليها

بس خلاص الاخلقيات راحت

وبعدين الناس الي بتتفرج وتعلق دي مفروض كان يمسكوة يرنوة علقة محترمة

مش هي الي تضربة

موجة يقول...

رغم اني مش باشجع ان الست تعلي صوتها حتى في الشارع .. مش تتخانق كمان ..
لكن
لا املك الا ان ارفع القبعة و الطربوش و الطاقية و الكاب و العمة و اي حاجة على ممكن تتلبس على الراس للبنت دي اللي دافعت عن نفسها
ففي حالة الدفاع عن النفس هي لا تدافع عن كونها بنت او بصفتها بنت عن أنوثتها و لكن تدافع عن انسانيتها بصفتها انسان المجردة من الانوثة و كل شيء في سبيل حاجة اعلى و هي الحفاظ على حياتها و اعطاء هذا الحيوان - لا مؤاخذة في الوصف بس دي اقل كلمة - درسا لن ينساه ..
تحياتي

كفايـة طيبـة يقول...

محتاجين نص جرأتها وقدرتها على دفاعها عن نفسها فى المواقف اللى زى دي :)

Wafaa يقول...

اعتقد ان هى اتصرفت صح جدا
ويا بختها بجراتها

اللى بجد المفروض يولام سوائق التاكسى
بس نرجع نقول انها ثقافة سواقين

اللى بجد يحاسب حساب شديد الناس اللى وقفت تتفرج!!!!!!!!!!!!!!1

غمض عينيك يقول...

والله جدعة

mesh2dra يقول...

السلام عليكم

a.samir

أنا بس مستغربة من حاجة
كانوا حيقولوا ايه لو بنتهم هى اللي كانت مكان البنت دي
يا ترى كانوا حيقولولها عيب المفروض تقفي مكانك وهو يضربك انما انتى تمدي ايدك عليه يبقى عيب
ولا ماكانوش حيسمحوا لحد اصلا انه يقول على بنتهم كده
اللي ضايقنى انهم محطوش نفسهم مكان البنت ولا حطوا بنتهم مكانها ومن ثم اطلقوا حكمهم كده

لأ معرفش البنت

سلاماتي

mesh2dra يقول...

السلام عليكم

بيلا

متقلقيش
هى اديته علقة متينة
من النوع اللي حيفكر الف مرة قبل ما يمد ايده على ست

وغالبا طبعا الناس بتتفرج وكأن السواق بينتصر لهم كلهم من ست مضايقاهم في حياتهم

ضحكت اوى على الجزء ده

نورتيني كتير
:)
سلاماتي

mesh2dra يقول...

السلام عليكم

كراكيب عادل

يا سلام
قلهم بقى ان القوة مش في الضرب ولا الرجولة باستعراض العضلات

معظم اللي بيتفرجوا
عاوزين يشوفوا الموضوع حينتهى على ايه
اصل الحوار ده مش حيتكرر مرة تانية
فرصة لن تتكرر
ست بتضرب راجل
وااااو
فانتستك

ياريتك كنت ساعتها :ح

سلاماتي

mesh2dra يقول...

السلام عليكم

موجة

جبت المفيد جدا
وانا كمان لا اشجع ان صوت البنت حتى يظهر في الشارع
بس الضرورة احكام

فعلا ساعتها بتدافع عن كونها انسان
تعليقك اعجبني

نورتني

سلاماتي

mesh2dra يقول...

السلام عليكم

كفاية طيبة

عارفة يا مومو
ممكن تكون البنت دي اضعف كائن على وجه الارض
بس الموقف خلاها قوية اوى

لما الواحد بيتحط في موقف زى ده بتلاقي نفسك غير ما كنتى متصورة
وبعد ما تبدي رد فعلك
حتقولي
معقول انا عملت كده ..؟!!
وعن تجربة يا بشمهندسة:ي


قبلاتى وتحياتي وسلاماتي وكل حاجة فيها "تي"
وحشتيني بجد

موااااااااااااااا

mesh2dra يقول...

السلام عليكم

وفاء

مش ثقافة سواقين بس
دي حاجة طبيعية في البشر
لما يكون ادامك اتنين
واحد حتقدري عليه والتاني مش حتقدري
بالتالي حتتشطري على اللي قادرة عليه

بس في الحالة دى
اقدر اقول ان الافترا وحش
وحش اوووى

وفعلا ربنا حيحاسب اللي شاف وكان قادر يدافع ومع ذلك اكتفى بالفرجة
يوم لك ويوم عليك

نورتيني كتيير

سلاماتي

mesh2dra يقول...

السلام عليكم

غمض عينك

جدعة جداا
حد يقدر يقول غير كده

سلاماتي

أسامه يوسف يقول...

جدعه وتستحق تمثال
لأن السواق ده ومعلش فى اللفظ"حيوان"
لأنه حاول يضرب واحده ست
ومش بإيده بس ده بالكوريك !!!!!!!

انا ماعنديش اخوات بنات
ووالدتى مابتسوقش
بس والله المفروض الستات ماتسوقش لو فى النوعيه دى من السواقين

هى خدت حقها وطحنته
فى غيرها مش هايقدر

صحيح
انت كنت هاتعملى إيه فى الموقف ده

Blank-Socrate يقول...

اكيد معاها حق
و اصفق لها
و الوم المجتمع الغير عادل
على كل ما يفعله بحق النصف الرقيق
لانه حوله الى رقيق
الى انسان غير كامل و مسلوب الارادة
شوه جسده
و سلبه الكمال الطبيعى الذى خلقه به الله
وهكذا ... انتهاكات صارخه
اتمنى ان يتعافى مجتمعى العزيز المريض

كفايـة طيبـة يقول...

داخلة اقولك وحشتيني اوى بجد

ادام الناس دي كلها :) :)

Mohamed A. Ghaffar يقول...

تدافع عن نفسها ماشى انما تدافع عن الخطئ الذى ارتكبته فهذا لا يجوز

فهى ملزمه بدفع تعويض لصاحب التاكسى لأرتطامها به من الخلف وتاخد تعويض من اللى خبطها من الخلف
وقف فجأه وقف على مهل وقف بأى طريقه يجب على قائد السياره الخلفيه ترك مسافه مناسبه لسرعته بينه وبين السياره التى امامه حيث قد يتضر القائد الأول للتوقف فجاه لأى سبب ما (قد يكون لعدم دهس احد الماره مثلاُ)
اعتقد انها لو كانت بدأت معه الحوار بأنها معترفه بخطئها لأنتهى الأمر

اما بالنسبه لواقعه التعدى فعلى اى وضع هو مجرم وان استطاعت قتله حتى للدفاع عن نفسها فهذا حقها

Che The Mad يقول...

كله من دا
ههههههههه
احسن ويا ريت كل البنات تاخد كورسات دفاع عن النفس مادام الناس يتقف تتفرج كدا وكأن الرجولة راحت خلاص
انا مش عاف تصريفي ايه لو كنت واقف هناك بس اللى متأكد منه انى مكنتش هقف ساكت
كمان انا ما بحبش الناس اللى بترمي احكام وهى قاعده مكانها يعني ايه قليلة ادب دي امال يعني كانت تسيبه يموتها في شوية تماثيل واقفين يتفرجوا ولا كأنهم فى سينما بس حلو اهى عملت فيها انجليا جولي وخليته يحرم
عموما ربنا معاها اعتقد محدش من اللى واقفين هيحاول يتعرض لواحده - اى واحدة - بعد كدا

تحياتى
تشي

ŞoŖśậŖấầ يقول...

السلااااااااام عليكمممم

تعظيم سلااااااام وسلااااااام مربع وبيضاوى ومثلث ومتوازى الاضلاع كمان عشان خاطر الاسد الجسور اللى اخترق كل حواجز الرقة البناتى وفاز بالجولة الخناقية دى

ماتعرفيش مين دى يمكن نروحلها تدينا كورس؟:)

تحياتى ليكى ولمدونتك اللى ماقدرتش ماعلقش فيها:)

Dr-Online يقول...

برضة هتفضل نظرة المجتمع للبنت المصرية معقدة ومريضة لحد امتي

والله البنت دي 10 علي 10 ودة الحل الوحدي لاي سواق مش محترم زي دة
ايوة صحيح السواق معاه الحق الاقنوني لانه هوة الي مخبوط ولو كانت البنت دي بتتبع تعليمات المرور من الاول مكانش الي حصل حصل
ولكن كونك معاك الحق برضة تاخدة بالطريقة القانونية مش تضرب بنت في الشارع بالكوريك

شكرا علي البوست الجامد دة

No Fear يقول...

السلام عليكم
الغلط في المجتمع كله
هو لازم كل حاجة تتحل بالضرب
ده أولا
ثانيا
في رجالة مصر يعني و الرجل بيحاول يضرب البنت
ده أحنا كل شوية مصدعين بعض أنت تعرف لو في أوربا و مش عارف أية حصلك محدش بيدخل
هو أحنا بناخد من أوربا السئ بس
حاجة تقرف و الله
بس هي بنت جدعة لو دافعت عن نفسها لو هي اللي بدات تبقي قليلة الأدب

حبة حاجات (ايمان) يقول...

ينصر دينـــــــــك

والله فعلا
للاسف مش فالحين غير فى اصدار الاحكام ولو حد حط نفسه مكاننا كان هيبقى تصرفه وحكمه حكم تانى خاااالص


تحياتى
البوست دا استفزنى اوىىىىىىى

Mohamed_sobhy84 يقول...

بغض النظر عن العلقه بس قاعده عامه في المرور اللي ورا دايما غلطان
التاكسي اه وقف فاجئه بس ليه هي مش محافظه على المسافه القانونيه اللي تتيح ليها التوقف برضه
السائق غلطان انه مد ايده على بنت
اما البنت مقدرش احكم عليها لأن مينفعش يتحكم عليها من موقف

mesh2dra يقول...

السلام عليكم

أسامة يوسف

ايه السؤال المحرج ده

صدقني مش عارفة كنت حعمل ايه
انا مش من النوع البلطجي
هادية وممكن حد يشوفني يقول باردة
بس ده الظاهر بس ،
حصل قبل كده واضطريت اتبلطج
ومكنتش مصدقة نفسي ..أنا ..انا..يمكن حد غيري

لما الانسان بيكون في موقف ما ، وفي الموقف ده لازم ياخد حقه ، وهو اصلا لا بيعرف يتبلطج ولا من النوع اللي بيقول شكل للبيع ...حتلاقيه ياخد حقه

كنت ممكن لو انا مكانها ماأوصلش الموضوع للضرب ، وما اديلوش الفرصة اصلا انه يضربني ، وأرش على عينه السيلف ديفينس ، واكلم اخويا :ي
بس كده

عامل ايه في الامتحانات
عاوزين مجموع كبير
سلاماتي يا بشمهندس

mesh2dra يقول...

السلام عليكم

Blank-Socrate

وأنا كمان اتمنى ات يتعافى المجتمع
ويتغير للأحسن
ان شاء الله

نورتنى :)

سلاماتي

mesh2dra يقول...

السلام عليكم

كفاية طيبة

و أنا كمان بقولك أدام الناس دي كلها
أنك وحشتيني أوى يا مومو

وحشتيني بجد
وبحبك جدااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا


كنت بنم عليكي انا وصرخة الاقصى
كل ما اقابلها نجيب سيرتك
مش بتكحي ؟
بتسلم عليكي اوي
و أنا كمان
أوي
أوي


يارب ترجعي بألف سلامة
:))))

سلاماتي وقبلاتي واحتراماتي وتحياتي

mesh2dra يقول...

السلام عليكم

مستر محمد جعفر

دكتور اون لاين
قال اللي كنت عاوزة اقوله وزيادة


سلاماتي

mesh2dra يقول...

السلام عليكم

تشي السعيد

يا سلام يا ولد:).. طبع كنت حتاخد حق البنت
أنا فعلا مستغربة انهم كانوا بيتفرجوا

كان من أكتر المناظر الغريبة اللي شفتها في حياتي

الناس بتاخد بالمظهر
البنت كان شكلها رقيق ومالهاش في البلطجة
وهو قال يجرب
بس متهيألي مش حيجرب تانى:ي

سلاماتي يا بشمهندس

mesh2dra يقول...

السلام عليكم

سارة

ياريتني كنت اعرفها
والله كنت اخليها تديني كورسس على طول من غير كلام

و انا كمان بديها تعظيم سلام
بس انتى نسيتي المستطيل والمخروط :ي

شكرا سارة
الله يكرمك بجد:)

نورتيني كتيير

سلاماتي

mesh2dra يقول...

السلام عليكم

دكتور اون لاين

وشكرا اوى على التعليق الجامد ده:)

تعليقك عجبني

نورتني كتيير

سلاماتي

mesh2dra يقول...

وعليكم السلام ورحمه الله

No fear

فعلا عندك حق
بناخد القشور والسىء بس
بناخد اللي يجي على هوانا ويعجبنا

زى بالظبط اللي بينقي الفتاوي اللي عجباه من الشيوخ:س

سلاماتي

mesh2dra يقول...

السلام عليكم

(حبة حاجات ) ايمان

فعلا لو كل واحد حط نفسه مكان التاني
حتفرق اوى في معاملاتنا مع البشر

فيه حديث عن الرسول .. فيما معناه
"التمس لأخيك سبعين عذرا "

سلاماتي

mesh2dra يقول...

السلام عليكم

محمد صبحي

المفروض تسيب 3 متر تقريبا بين العربية اللي ادامك
بس احنا لو بنتكلم كده يبقى مينفعش نطبقه عندنا في شوارع القاهرة
لو كل عربية عملت كده يبقى الازمة المرورية لا يمكن تتحل والدنيا حتقف اكتر ماهى واقفة

جرب كده تعدي شارع واقف .. مش حتعرف تعدي .. لازم حد سمباتيك اوي عشان يعرف يعدي بين عربيتين

الواقع حاجة والقوانين اللي المفروض تتطبق حاجة تانية خالص

كمان لو عربية اتجرأت وسابت مسافة بينها وبين العربية اللي ادامها
حتلاقي البشمهندس اللي في العربية اللي وراه هاريه كلاكسات
ومش بعيد يقوله ما تطلع شوية يا عم الحج

الواقع حاجة والمفروض حاجة تانية

سلاماتي

Swing يقول...

انا عايزة اروح اتدرب لعب الدفاع عن النفس

مش هضيف زيادة عن اللي ققالوة قبلي

فية فرق بين قلة الادب و الدفاع عن النفس

لو واحدة ماشية تشاكل اللي في وشها و تتخانق مع الولاد وب تاع دية واحدة مش محترمة
انما دية محترمة نفسها
و مسمحتش لواحد انو ميحترمهاش

تسلملي علي الموضوع

سلاموزة

لولا يقول...

على فكرة هي بنت جادعة وعملت الصح وكانت المفروض كمان تبلغ اقرب قسم
وانتي بتقولي كان في رجالة واقفين يتفرجوا سوري دول مش رجالة
الي يشوف بنت بتنضرب او بتنشم في الشارع ويوقف يتفرج دا مش راجل

aya يقول...

مش قادرة

لو شفتى البت ديه تانى

بوسيهالى على الخدين
وقوليلها تسلم التربية

وقطع ايد اى راجل مهواش فى الاصر راجل يفكر يمدها على بنت

هيا الرجالة جرالها ايه ؟
عشان لما نقول ان رجالة مصر ماتوا فى 73 محدش يزعل
فى انسان محترم فى الدنيا ينزل يضرب بنت

ايه الهبل ده

اسفة انى اتحمقت
بس بجد تخيلت لو انا فى موقف زى ده
يالهوى
دانا كنت قاتلته
مين ده اللى يمد ايه عليا
يا ليلته اللى اسود من الهباب والخروب

بجد تسلم ايديها
وتسلم جرائتها

اسفة للاطالة عزيزتى
ولكن اثارنى الموقف

والسلام ختام

يا مراكبي يقول...

طبعا موضوع الخناقات ده ساعة الحوادث مش موجود غير في بلدنا الرائدة .. المفروش في كل العالم إن ماحدش بيتكلم والبوليس بييجي وبيحدد مين الغلطان ويعمل محاضر ياخدوها الناس اللي خبطوا في بعض علشان التأمين يصلحها

بس كده

طبعا كل كلمة كتبتها فوق بتعتبر خيال علمي بالنسبة لمصر

bos bos يقول...

والله بنت جدعة جدا والناس معلش اللى كانوا بيعلقوا مش فاهمين حاجة
بس ياريت كل بنت تكون قادرة تدافع عن نفسها دى المشكلة مش كل البنات هتقدر تضرب الرجالة ولا أيه
بس فعلا موقف جامد جدا للبنت دى

تحياتى لكى وحشانى جدا

el_assel يقول...

ما أعتقدش انه علشان واحد بيدافع عن نفسه
يكون قليل الادب
بغض النظر عن انه ولد او بنت
الدفاع عن الحق ده حق لكل واحد
ولا علشان هي بنت يبقي تسكت
كانت ممكن تسكت لو شافت قدامها واحد محترم
عايز يحل الموضوع بادب وذوق
لكن لما تلاقي قدامها واحد صايع
بيستقوي عليها
لا
يبقي لازم تاخد حقها
وخصوصا
ان احنا بقينا في عصر غمض عينك
يعني طالما الموضوع ده ما يخصنيش يبقي ما اتدخلش
يعني طالما البنت دي ما اعرفهاش او الراجل مش فارقة
يبقي خلاص
اقعد اتفرج احسن

لا طبعا مش غلطانة
دي كانت حتبقي غلطانة لو سكتت

سلاماتي

el_assel يقول...

حتكوني معانا ؟؟؟؟؟
ادخلي علي البلوج بتاعي وانتي تعرفي

الأستاذ يقول...

م أنا مش عارف هي عملت إيه أصلاً؟؟
بس إحساسي إنها اتصرفت صح طبعاً للمدافعة لازم الوحد ياخد حقه بس بكل أدب من غير شتايم ولا كلام فارغ ملهوش لازمة
معلش على التأخير لكن ظروف الدراسة وكمان لسة هتأخر تاني علشان عندي إمتحاناتي قربن إن شاء الله
تحياتي

DoMaLaYs يقول...

بجد جدعه

لان لو كانت اتبهدلت من الوقح ده

مكانتش هطول اي حاجه منه

بس بجد
جدعه

و انتي جدعه , ( فيما عدا تاجاتك )


و على فكية ليكي تاج عندي

Mohamed A. Ghaffar يقول...

واضح ان حضرتك مأخدتيش بالك من اخر سطر فى تعليقى

Ahmed Al-Sabbagh يقول...

لا طبعا محدش هيقول ان البنت تتفرج وما تدافعش عن نفسها

بس ده طبعا ما حاجة واللى بنشوفة

من صوت عالى وهزار بالايد فى الشارع حاجة تانية

كل سنة وانتى طيبة

د/اجدع بنوته يقول...

لا مش قليلة الادب خالص يعنى .. وبرافو عليها الصراحه

الزمن ده كده .. كل واحد ياخد حقه

وانا لو مكانها الله ف سماه ماكنت هعمل لا ااقل ولا اكتر م اللى هى عملته

طالما هى مجرتش شكله وهو اللى عايز يبدأ

يبقى يشرب بقى

وانا م مثلا هذا المزنق ارفعلها الكااب

تحياتى

أسامه يوسف يقول...

كل سنه وانت طيبه

Che The Mad يقول...

انا بس كنت جاى اقولك كل سنة وانتى طيبة وعيد سعيد إن شاء الله

تشي

mesh2dra يقول...

السلام عليكم

swing

وأنا كمان والله عاوزة اروح

الله يسلمك
تسلميلي

كل سنة وانتي طيبة
عيد سعيد

سلاماتي

mesh2dra يقول...

السلام عليكم

لولا

بكل أسف كلامك مظبوط
احنا عندنا نقص رجولة
تفتكري نستورده منين

نورتيني
كل سنة وانتى طيبة
عيد سعيد

سلاماتي

mesh2dra يقول...

السلام عليكم

آيه

هيا الرجالة جرالها ايه ؟

جرالها حاجات كتير
لو كان فيه اخلاق ودين مكنش جرالهم حاجة

انهاردة مثلا .. قمة الاستفزاز
عربة السيدات في المترو اجتاحتها جيوش من الرجال
قبل الساعة 6 والمفروض اصلا انها مسموحة لهم بعد الساعة 9
تطوعت سيدة مشكورة ونبهتهم
يا صباح ده برود
يبصولها وكأنها من كوكب آخر أو كأن على رؤسهم على الطير... ولا حد نزل
بذمتك ده لو عنده بنت حيرضى بأن حد يركب لعربية اللي هى فيها
مش فاهمة ده برود ولا ايه



ياباشا اتحمق زى ما انت عاوز
انا كمان اتحمقت اهو

نورتينى كتير

كل سنة وانتى طيبة
عيد سعيد

سلاماتي

mesh2dra يقول...

السلام عليكم

ههههههههههههه
فعلا خيال علمي بالنسبة لمصر

مش عارفة ليه دايما عندي احساس ان البوليس لو اتدخل الدنيا حتبوظ

ده احساس نابع من كوني شريرة


كل سنة وحضرتك طيب
عيد سعيد

سلاماتي

mesh2dra يقول...

السلام عليكم

بسبس الروح

انا كان نفسي اقولهم لو بنتكم مكانها
كنتم حتتكلموا بردو على البنت بالطريقة دي


آه طبعا
فيه بنات مبتعرفش تضرب اصلا
بس لو اتعرضت لضرب حتتحول الي مفترسة يصعب ترويضها

وانتي كمان وحشاني
وعارفة ان انا مقصرة اوى اووووووى
سامحيني

كل سنة وانتي طيبة
عيد سعيد عليكي يارب

سلاماتي

mesh2dra يقول...

السلام عليكم

الاصيل

جبت المفيد يا فندم
بتدافع بغض النظر عن كونها بنت او ولد
الاصل بتدافع عن نفسها وكرامتها وحقها

سلاماتي

mesh2dra يقول...

السلام عليكم

الاصيل

جاية اشوف حكون ف ايه معاكم


كل سنة وحضرتك طيب

عيد سعيد

سلاماتي

mesh2dra يقول...

السلام عليكم

الاستاذ

بالظبط
اخد حقي بطريقة محترمة
بس ده لو اللي ادامي محترم

ولا يهمك
انا كمان عندي امتحانات
وانا كمان بعتذر لك وللجميع على تأخيري

ربنا يستر ونخلص على خير

عيد سعيد ان شاء الله
كل سنة وانت طيب

سلاماتي

mesh2dra يقول...

السلام عليكم

domalays

فعلا
تصدق مكنتش واخدة بالي من الجزء ده
لو ماكانتش اخدت حقها ماكانتش اخدت منه حاجة بالاضافة الي انها كانت حتعيش عندها عقدة ذنب لانها مادافعتش عن نفسها
الله اعلم بقى كانت حتحس بايه تاني


عارف " هو الجاني على نفسه"
اهو انا:D
لا بجد
حجاوب عليه ان شاء الله
ومش حنساه، وبجد شكرا اوي
بس اديكوا هدنة شوية من التاجات


كل سنة وانت طيب
عيد سعيد

سلاماتي

mesh2dra يقول...

السلام عليكم

مستر محمد جعفر

لأ طبعا ، قريته

وتعليق د. أون لاين بيؤكد ويدعم رأى حضرتك وتعليقك

البنت عندها حق لانها دافعت عن نفسها

انمالو ناقشنا الموضوع من ناحية أخرى وهى ان الحق القانوني لمين ، حنلاقي ان احنا مش حنقدر نحكم ، معنى انى قلت انه وقف "فجأة " فقط دليل على انها لم تكن مسطولة او الغلط بشكل أساسي عليها ، وبالتالي الظروف اضطرتها للتوقف .

كل سنة وحضرتك طيب

عيد سعيد ان شاء الله

سلاماتي

mesh2dra يقول...

السلام عليكم

احمد الصباغ

آه طبعا
عندك ألف حق

يعني مثلا اول امبارح شفت واحدة منتقبة وواقفة تهزر مع واحد بالايد
وبتضربه على كتفه كمان
ضربته كتير وكان هزارها سمج وصوتها عالي ومنفرة
للأسف ...ومنتقبة

كل سنة وحضرتك طيب
عيد سعيد عليك

سلاماتي

mesh2dra يقول...

السلام عليكم

د/ اجدع بنوتة

وأنا نمن مزنقي هذا
بقول ان بلوجتك سكر اوى
ودمك خفيف جدااا

نورتيني كتير
كل سنة وانتي طيبة

سلاماتي

mesh2dra يقول...

السلام عليكم

أسامة يوسف

اسامة بذات نفسه مضيع وقته عشان يقول كل سنة وانتي طيبة

وانت بألف خير يا اسامة
يارب مجموع كبير اوووى في الاعدادية
واكبر منه في الثانوية
وتدخل الكلية اللي انت عاوزها
وتكون انسان ناجح يارب
قولوا آآآآآآآآمين

mesh2dra يقول...

السلام عليكم

تشي السعيد اوى جدا


وانت بألف خير
وانت طيب
عيد سعيد علينا كلنا ان شاء الله

اخباراتك
واخبار الامتحانات ايه
يارب خير
ان شاء الله

سلاماتي

بيتنا القديم يقول...

جيت اقولك كل سنة وانت طيبة
ويارب يارب تكوني بخير وسعادة
لا تنس فقيراً او يتيماً او محتاجاً في هذا العيد..
لا تنس ان تبادري بالصلح مع من تخاصمين
لا تنس قريب او قريبة بزيارة في العيد
لا تنس كف مرفوع ولسان يستغفر وعين تدمع..مع الله في هذا العيد
تك كير
(:

Ahmed Reda يقول...

و الله من غير العليق الاخير اللي بعد كلمة ثواني .. انا شايف ان البنت دي جدعه جدا و محترمة جدا كمان .. اذا كان هذا الوصف وصفا دقيقا للمشهد
.. فانا من الناس اللي برفع لها القبعة و اشيد بيها

adam يقول...

Hello I just entered before I have to leave to the airport, it's been very nice to meet you, if you want here is the site I told you about where I type some stuff and make good money (I work from home): here it is

Desert cat يقول...

انتى ناسية اننا فى مجتمع ذكورى
البنت هى اللى دايما غلطانة حتى لو على حق وحقها ده واضح وضوح الشمس
اخطفى رجلك لحد المدونة بتاعتى وشوفى بوست اسمه يموت الراجل المصرى وهو بيعاكس
دى بقت حاجه تقرف
والستات الضعاف اللى عاملين فيها ولاد ناس ومغلوبين على امرهم هما اللى ادوا المجتمع المريض ده فرصة علشان يحملنا نتيجة اى حاجه
تحياتى

Desert cat يقول...

حاجه نسيت اقولها بالنسبة لاخر جملة قبل ما اى حد يحكم يخلى بنته او خطيبته او مراته مكانها
محدش بيحط حد من اهل بيته مكان حد على اعتبار ان بناتهم ملايكة باجنحة مع ان لو كل واحد بص فى عيوبه وانشغل بتصليح اهل بيته هينشغل عن عيوب الناس

الصحفي المشاكس يقول...

قبل ما أعلق على الموضوع أحب أقولك إني والله عاوز أقولك كل سنة وانت طيبة من إمبارح بس والله قعدت يومين بدور على نت ابتعلك منه والله مالقيت بلد فقر اعمل ايه .
وكمان مافيش أي وسيلة اخري اقولك منها
كل سنة وانت طيبة

غير معرف يقول...

والسنة الجاية تكلي خروف لوحدك وان شاء الله تتمتعي بحياة هنيئة وسعادة وتفوق
وسأظل أقول ان لديك ملكة الكتابة الفنية الرائعة والعرض الشيق
انا بصراحة بشجع البنت دي وكل البنات ان هم يدافعوا عن نفسهم ان لزم الامر بدون وضع نظرةالمجتمع في الاعتبار لأني مابحبش النظر للبنت على انها كائن ضعيف ولابد ان تعيش في كنف الرجل فقط فماذا تفعل البنت لو لم تجد رجل في الشارع فكل الي في الشارع من رجاله لبسوا برقع وتخفوا وقالوا واحنا مالنا ماذا تفعل الفتاة حينما ينتهي عصر الرجال وينسى الرجل انه رجل ويتخلى عن ابسط الصفات التي تميزه كرجل وهي المروءة والشهامة

غير معرف يقول...

الرسالة الي فاتت بتاعتي أنا الصحفي المشاكس

kikotalaat يقول...

سلامووووووو عليكووووووووووووو
ياااااااااااااااااه ده أنا جيت متأخر كتييير أوي
سامحيني بجد
المهم أنا بجد اتحيرت في موضوع البنوتة ديه ومش عارف أحكم بجد لأن جوايا احساسين متناقدين
الأول ان سواق التاكسي ده حيوان والبنت ديه لو ما كانتش دخلت في شمال كده كانت هتبقي كفته
والتاني إن ازاي بنت يكون تعاملها بالشكل ده ..... مش عارف أوصف احساسي بجد
بس فعلا البنت مخلوقة ربنا خلقها رقيقة .. حتة بسكوتة
ازاي تتخانق وتضرب
هو احساسي داخل في بعضه بجد
بس هضربها في دماغي تاني كده وأرجع أقولك
كان مدوخكم ..,
كيكوووووووووووووووو

nour el 3ozamaa يقول...

كل عام وانتم بخير وادعوكم لمشاهدة موضوع فضيحة جامعة القاهره وهذا الموضوع اقسم انه حقيقي

تحياتى

al3ozamaa.blogspot.com

mesh2dra يقول...

السلام عليكم

اولا بعتذر جدا

جدا لاقصى درجة

لان لسه فيه كتير ماردتش على كومنتاتهم
وبقالي قرن ما زورتش بلوجاتكم

بعتذر كتير

نورتوني جدااا

ليا عودة بعد الامتحانات ان شاء الله

دعواتكم بقى :)
سلاماتي

مدرس مطحون!! يقول...

البنت مش غلطانة لو هي في حالة دفاع عن نفسها بمعنى إن شوال الجوافة اللي كان راكب جنبها لم يتخذ أي محاولة للدفاع عنها وأخذ حقها، فساعتها تعتبر مضطرة للدفاع عن نفسها، بس المفروض إن دفاع المرأة عن نفسها يكون بقدر الضرورة بما ﻻ يعرضها أيضًا للمهانة أو اﻻبتذال، وبمقدار رفع الضرر والظلم الواقع عليها، لكن أمنر أنها تضربه وترنه علقة و تربيه ده أمر ﻻ يليق بيها

Che The Mad يقول...

كل سنة وانتى وكل حد فى كل حته على وجه البسيطه طيب وبخير وفرحان وسعيد وعنده امتحانات سهله ومعندوش مشاكل وسنه يا رب علينا سعيدة كلنا وكفاية قوى كدا الصراحة

هابي نيو يير

تشي

شيماء الجيزى يقول...

يا بسومه اولا وحشانى جدا جدا جدا
ثانيا اينعم انا زعلانه بس ..مممم اقولك ايه
مقدره ظروفك يا عمرى
بس انا بجد عايزة اشوفك ضرورى لامر هام

على فكرة البنت دى جدعه جدا وبتدافع عن نفسها وانا نفسى لو مكانها هعمل كده
لان ده اساسا مش راجل مجرد ذكر بيتفشخر بنفسه وجاى يضرب بنت

راجل ايه اللى مش محترم انثى وجاى يتشطر عليها
مفكر انها ايه؟

بس لا هى بنت جدعه ومش قليلة الادب ابدا

بوسى يا حبيبتى
وحشانى قوى قوى
ولازم اشوفك قريببببببببببببب
سلاماتى يا جميله

غير معرف يقول...

انا عارف انك هتقرأي الكلام ده بعد الامتحانات لكن عايز اقولك جزاكم الله خيرا عشان اسئلة الدكتورة ليلي العظيمة الي طحنانا ديما هي وخالتو عواطف وبجد خطوة جميلة منك واجازة سعيدة بل حياة سعيدة دايما
صديق وفى

وينكى يقول...

كل سنه وانتم طيبين
وحبيت أعزمكم على حفل افتتاح دار الكتب بتاعت صاحب البوابه , زميلنا البلوجرى الفظيع
ودا هايكون يوم الخميس 10 يناير الساعه 6 مساءا فى مكتبة البلد , 31 شارع محمد محمود بالتحرير
عاوزين تواجد مكثف هناك
مستنيينكواااااااااااا

د/اجدع بنوته يقول...

فينكككككككك م زمان

نو نيو بوستس .. ليه ؟؟

ويتنج

غمض عينيك يقول...

انتي فين
وحشتينا

محمد ياسر يقول...

لا طبعا دى برافو عليها جدا

هى دى البنات اللى تعرف تاخد حقها بجد

Che The Mad يقول...

هى الامتحانات دي مش ناوية تخلص ولا ايه
وحشنا قلمك
قصدي كي بوردك

تشي

Che The Hermit يقول...

يااااااااااااااااللهول
على رأي الممثل اللى ناسي اسمه دا
اكتئاب وفى الاجازة
ربنا معاكي إن شاء الله وترجعي احسن كتير

مستني جديدك قريب قوي

تحياتى
تشي

mesh2dra يقول...

السلام عليكم

بيتنا القديم

وأنت بألف خير وهنا
الله يكرمك
وتكون في خير وبخير دايما يارب

سلاماتي :)

mesh2dra يقول...

السلام عليكم

احمد رضا

نعم مستر احمد وصفا لكل ما شاهدته
وأنا كمان برفع القبعة معاك

نورتني كتير:)

سلاماتي

mesh2dra يقول...

desert cat

صح ، عندك حق أوي
قليل أوي اللي يقدر يشوف عيوب اهله أو حتى نفسه
فيه مثل بيقول : يا فرعون ايه فرعنك

احنا اللي بايدينا نخلي اللي ادامنا يتعامل معانا ازاى

نورتنيني كتير

سلاماتي

mesh2dra يقول...

السلام عليكم

الصحفي المشاكس

الله يكرمك يا عمرو
و أنت طيب وبألف خير

يارب ادخلك بلوج :P

نورت البلوج

سلاماتي

mesh2dra يقول...

السلام عليكم

كيكووووو

و أنت كمان سامحني لانى رديت متأخر أوي

بص يا سيدي
البنت آه مخلوق رقيق وهش وبسكوتة خالص
بس مش ضعيفة
هى قطة بس يوم ما حد يقرب منها بتتحول لأسد

مش بيقولوا اتقي شر الحليم إذا غضب

ايه الفرق بين الولد والبنت
الولد كائن مش رقيق وقوي وجامد
والبنت رقيقة وهشة زى ما اتفقنا
بس الاتنين لما ييجوا يتعرضوا لنفس الضغوط ويلاقوا نفسهم لازم يدافعوا عن حقم يا اما محدش حيدافعلهم عنه
الولد ساعتها بيقوى بدرجة اكبر
انما البنت بيحصلها عملية تغيير فبتقوى
مش عارفة اعبر اوى
بس اللي عاوزة اقوله
ان البنت في المواقف اللي زى دي بتبقى جامدة اوى

ساعات كتير اوي الواحد بيعمل حاجة هو مكنش متوقع انه يعملها
وساعتها بيقعد يقول معقول انا عملت كده
معقول انا اصلا اعمل كده
اللي عاوزة اقوله ان الظروف بتغير

وبعدين اوعى تغرك نفسك
احنا جامدين اوى على فكرة:D

نورتني كيكوووو

سلاماتي

mesh2dra يقول...

السلام عليكم

نور العظماء

شفته يا نور
مهزلة والله


نورتني كتير

سلاماتي

mesh2dra يقول...

السلام عليكم

مدرس مطحون

مكنش حد راكب جمبها
كانت هى لوحدها في العربية

البلوج بتاعت حضرتك حلوة اوى
سعيدة انى عرفتها

سلاماتي

mesh2dra يقول...

السلام عليكم

تشي
وأنت طيب تشي
ربنا يكرمك يارب

وتكون انت بخير و خير
وبألف صحة وهنا

الله يكرمك

سلاماتي

mesh2dra يقول...

السلام عليكم

شيماء الجيزى

و أنتي كمان يا شوشو وحشاني اوى
انتى من ضمن الناس اللي انا مقصرة معاهم اوى اوى

فعلا اعذريني وسامحيني
وربنا يهديني

سلاماتي

mesh2dra يقول...

السلام عليكم

صديق وفي

عفوا يا بني على ايه ؟!
ربنا يرحمنا يارب
ويسترها اوى
ونعدي على خير

الله يكرمك

سلاماتي

mesh2dra يقول...

السلام عليكم

وينكي

مبروك لصاحب البوابة
ومن نجاح لنجاح يارب

سلاماتي

mesh2dra يقول...

السلام عليكم
د/ اجدع بنوتة

الله يكرمك اوي
انا جيت اهو:)

شكرا كتيير على سؤالك

سلاماتي

mesh2dra يقول...

السلام عليكم

غمض عينيك

الله يكرمك بجد
شوية امتحانات على قلق

شكرا جدا على سؤالك

سلاماتي

mesh2dra يقول...

السلام عليكم

محمد ياسر

مش صح بردو ؟!
انا كمان والله بقول عليها كده

نورتني كتير:)

سلاماتي

mesh2dra يقول...

السلام عليكم

تشي

ربنا يكرمك تشي
شكرا اوي على سؤالك

ضحكتني على كيبوردي

يارب ارجع احسن كتير

شكرا لك
الله يكرمك

سلاماتي

مسلم يقول...

هفكر و أقولك

و القادم....أجمل يقول...

بصي انا مش هقدر احكم علي الموقف
غير لما اشوف بعيني
لأنه فيه نقط كتير
مينفعش احكم عليها من كلمات
يعني البنت نفسها كان موقفها ايه
و طريقة كلامها مع الراجل
برضوو مش قادرة اتخيل
ان سواق ينزل يجيب الكوريك
و ييجي مثلا يضربني او يشد الطرحه مثلا
و انا بكلمه باحترام
معرفش الموضوع فعلا لازم يتشاف

و مع احترامي لكل الردود اللي بتقول جدعه

لازم كنا كلنا نتخيل الموضوع من كل الجوانب و نشوفه علي الهوا مباشرة
عشان نقول رأينا

انتي مش قادرة
و أنا مش عارفه
:D

sa7afia_rwsha يقول...

البت دى تمام
وبميت راجل
انا عن نفسى هرفعلها القبعة
ابقى زورينى وهاتى معاكى 2 كيلو لب متدخليش عليا الندونة وانتى ايدك فاضية
سلام

mesh2dra يقول...

السلام عليكم

مسلم

يا هلا يا مسلم
تشرف فى اى وقت :)

سلاماتي

mesh2dra يقول...

السلام عليكم

والقادم ... أجمل

فعلا عندك حق

بس يمكن انا حكمت لانى شفت الموضوع ادامي

حاجات باخد بالي منها لما بنحكم على حد
تحطي نفسك مكانه ، تلتمسي له العذر ، تبصي للموضوع من كافة الجوانب

رأيك عجبني

سلاماتي

mesh2dra يقول...

السلام عليكم

صحفية روشة

اهلا بيكي
بس لب؟!
طب ينفع شيكولاتة كمان ؟

نورتينى :)
سلاماتي

علوة يقول...

البنت دي عملت الصح
والمجتمع هو اللي رباها
في وجهة نظري إن التعليقين اللي في منتهى السخافة اللي اتقالوا من الناس اللي كانت وراكي دول هم السبب
البنت عارفة إن محدش هيساعدها
وكان لازم تعتمد على نفسها
الراجل فعلا من نفسه ينزل من الأتوبيس ويمسك سواق التاكسي يربطه فوق سقف العربية
والست المفروض تقول للراجل انزل يا صلاح شوف البت
لكنها العاصمة
تزداد جمالا كلما خفت ضوء الشمس عنها
وكلما زادت الموبقات
....
انا عشان بحط اختي أو امي أو حتى زميلتي مكان البنات دي
معنديش مشكلة إني أنزل وأحتك بالناس أو الأشكال اللي بتتشطر على البنات
ومش مهم بقى نروح قسم أو أتعوّر
ومش أنا بس اللي كده
لسه الدنيا بخير رغم أكياس القمامة
...
وحشتني مدونتك على فكرة
مستنيكي

mesh2dra يقول...

السلام عليكم

علوة

انت عارف الناس كانت واقفة تتفرج وهى بتضحك
انا بجد مش مصدقة لحد دلوقتى
الناس واقفة تتفرج كأنها بتتفرج عالكاميرا الخفية
واقفين مبتسمين
فرصة ومش حتيجى لحد عندهم تانى
يضيعوها بقى ولا يشوفوا حتنتهى على ايه الخناقة
زمان كنت ممكن تطمن لانك ماشي فبي شارع فيه ناس ويوم ما يحد يضايقك حتلاققي اللي وقف يساعدك
انما دلوقتى نفسي نفسي .. وقرب يا باشا وشوف .. فرصة لاتعوض .. وخناقة لايف .. لا تقولي سيما ولا غيره

____________
حمدا لله على السلامة
نورت عالم التدوين من تانى :))

سلاماتى

د/اجدع بنوته يقول...

انتى قافله ليه التعليقات يامشمشه

ولا انا اللى معرفتش اعلق ولا ايه

ع العموم ربنا يخليلك ماما يارب ويباركلك فيها ويبارك فيكى ليها

ثانيا تاجات واجابات رائعه زيك بجد

والخلاصه انى بحبك ف الله

ووحشتينى اوىىىىىى

وافتحى الكومنتات بقىىى ياوحشه

اهىء اهىء اهىء

maro يقول...

بصراحه بنت حلوة وجدعه قوووووووووووووى

بيتنا القديم يقول...

برافو البنت دي ..الاسلام والعرف يعطوا اي كائن بشري حق الدفاع عن النفس..وافتكر الست كائن بشري ولا إيه..؟!