2.10.12

دماغك مسافرة ...


#مش فاكرة
= يُخبرونك وأنت تحدثهم عبر الهاتف أن "محمد بيسلم عليكِ" ترد عليهم وأنت فى حالة التوتر التى تفرضها عليك عدم وجود شبكة جيدة فى المكان الذى أنت فيه، محاولاً توصيل الرسالة المُكلف بتوصيلها سريعاً "الله يسلمه سلمولى عليه كتير"! "طب خدى كلميه" وفجأة تجد الطرف الآخر –محمد- يتحدث معك! "ازيــــــــــــك عامله ايه وأخبارك إيـــــــــــــــــه" "الله يخليك يارب ازيك أنت عامل إيه يارب تكون كويس ادينى فلانة بقى تانى معلش!" وبعدما تغلق الهاتف تكلم نفسك "هو إيه الجنان ده مش محمد كان لسه موجود ومسلمه عليه ومتكلمين مع بعض قبل ما ينزل"!
تنزل من المنزل لتجد من يخبرك أن "محمد كان نفسه يسلم عليكِ أوى اوعى تمشى قبل ما تسلمى عليه"! تستنتج أن هناك محمد آخر.
فجأة تجد خلفك من يرحب بك "أهلااااااااااااااااااااا الدنيا نورت" تستنتج سريعاً أن هذا هو من يتكلمون عنه لتقول ببشاشة وترحيب فظيع "اززززيك يا محمد عامل إيه ياااااه مش ممكن بجد" ويستمر الحديث بينكما عن الأخبار والأحوال ويباغتك هو بسؤال "أنتِ زى ما أنتِ شكلك ما اتغيرش، فاكرانى؟ أنا اتغيرت بقى ولا لأ؟" لترد عليه "أنت كمان زى ما أنت يا سبحان الله بجد"

تسأل أختك بعد ذهابهم  "هو مين بقى اللى أنا كنت بسلم عليه ده!"
"بتتكلمى بجد؟!"
 "والله ما فاكراه والبشر كلهم اسمهم محمد، ومش فاكره انى شفته قبل كده اصلا!"
"أنا استنتجت كده برضه وأنتِ بتقوليله انت زى ما أنت ما اتغيرتش، عشان هو شكله اتغير جدااااا، يا لهوى على الضياع اللى أنتِ فيه، ده لا وشوش ولا أسماء، ده أنا لو بعدت عنك شوية حتنسينى" !!


# ما تحاولش تشّبه

=  المشكلة أن فيه ناس شبه بعض جدا، بجد فعلا الشبه بيكون فظيع، وأحيانا لا يقتصر الأمر على الشبه بس، بل فى استايل اللبس، هو هو يا سبحان الله، تقولش فولة واتقسمت نصين، بعد ما ابن خالتى مات -الله يرحمه- فضلت اشوفه فى بنى آدمين كتير، لدرجة إنى مرة "شهقت" والراجل حس... ومرة تانية فضلت ماشيه ورا الولد لأن كان عندى إحساس إنه ما متش وحيطلع هو أكيد ولما يشوفنى حيعمل فرح بس ما حصلش L، ومرة كنت بشترى حاجات من مكان ما ومركزة جدا وإذ فجأة حد اعرفه.. طب اروح اسلم، رحت ناحية الراجل فعلا ولما قربت اوى ما طلعش هو، هوباااا لف وارجع تانى واعمل عبيط، الراجل اخد باله وفضل مركز معايا طول ما كنت موجودة لدرجة انى اتخنقت ومشيت وماكملتش اللى بعمله، مرة تالتة ورابعة وخامسة .. وآخرها فى فرح :D.. حد يااااخدنى من هناااااا ..
 بيكون رد فعلك التلقائى انك بتروح على الشخص وأهلااااا أو لو بنى آدم العلاقة بينكم مش لطيفة بتحس أنا إيه اللى جابنى هنااا حد يخبيييينى، فى كل الأحوال البشر اللى بشبه عليهم بيحسوا وبتبقى حاسس انهم اخدوا بالهم وبيفضلوا متابعينك- يا عم كنت بشبه وغيرت رأيى.. أنت ما صدقت!
 محرج لو كان ولد، انما لو بنت بروح اسلم عليها واقولها انى بشبه عليكِ، ولو لطيفة بندردش شوية وخلاص، مرة طلعت الأخت الكبيرة للبنت للى افتكرتها هى ومرة تانية كانت التوأم بتاعتها، غلطش أنا لما اشبه على البشر :D


#تركيزك فى الضياع

- طب ده بيحصل لما تشبه، أحيانا بقى بتعدى جمب بنى آدمين يعرفوك وتعرفهم وما بتاخدش بالك فماتسلمش فيزعلوا.. حظك ,نصيبك يا بنى ... مش قصد والله أد ما طول الوقت الواحد ماشى سرحان أصلا وفى ملكوته الخاص ومش مركز فى البنى آدمين اللى حواليه، ويوم ما يركز يبقى ياريته ما ركز :D

مرة عمو بيحكيلى انه عدى من جمبى جدا فى الشارع وما اخدتش بالى! وكان باين عليّا فى ملكوت تانى ومرضيش يلفت انتباهى عشان ما اتخضش! عادى مش مركزة!

هناك 4 تعليقات:

كفايـة طيبـة يقول...

وسبحان الله
صدف الناس اللى بنحبهم اقل كتير من الناس اللى مش بنطيقهم

انا فى شخصية كل ما اروح حتة اشوفها
وهي من اكتر الشخصيات اللى مكونتش بطيقها وكانت معايا فى ابتدائي واعدادى وثانوي والكلية كمان
تخيلي ؟

mesh2dra يقول...

ماتركزيش مع الناس اللى مش بنطيقهم
واحمدى ربنا ان الشخصية دى مش معاكِ لا فى الشغل ولا فى البيت.. بصى للنص المليان :D واهديلها أغنية إلين خلف "أنت تانى برضه صدفة.. ده انا كل مكان اروحه القاك فيه..!" :O

L.G. يقول...

دماغك مسافرة
ههههههه فكرتيني لما حضنت اسماء وقلتلها ازيك يا بسمة :))))))) ولقيتك بتقوليلي انا بسمة
جدو حولان كنت في نص هدومي منك يا بدران
بس صح انك ترحبي بالناس ده بدل ما يزعلوا انك مش فاكراهم بس فيه ناس رخما يقولولك طب اسمي ايه ؟؟؟
التشبيه باه حدث ولا حرج مرة وانا صغيرة جريت ورا راجل متخيلة انه خالي :)) طلع مش خالي
بجد انا مبسوطة بالتدوينات ديه خاصة اني انام بعدها وانا مبتسمة وسعيدة انك سعيدة
تحياتي
سماح

mesh2dra يقول...

هههههه فكرتينى باليوم إياه :P ولا يهمك يا كبير :)

وفيه ناس ارخم بيسألوكِ طب اللى ادامك ده اسمه ايه! بيسألوا ادام الشخص! يعنى يخربيت دى غتاتة .. ما تخليك فى حالك يا عم الحاج بجو الاختبارات بتاعك ده!

انا بقى مرة كنت فى الجامعة وواقفة مع اصحابى وفجأة قلتلهم اخويااا وسبتهم وجريت عليه ... وما طلعش أخويا فى الآخر :D :D

بتحصل فى كل العائلات ومع كل البشر وولا بيهمنا :D

انا مبسوطة اكتر انك مبسوطة وسعيدة ويارب كده على طول

سلاماتى وقبلاتى