وحالات من الشك الرهيب والذى يتنهى عند مشاركته والإفصاح عنه بـــ "لا لا يا شيخة مش معقول أبداً.. إزاى كده بس؟!" والتى تقرر بعدها عدم الإفصاح .. ولكن الإنسان أصله لسان .. إزاى يسكت؟! .. والسياسة لحست دماغى!
حالة من حالات التفكير المتواصل اللامتناهى يتناهى بحالة من حالات ارتفاع درجة الحرارة والصداع المزمن
وحــــالات من الدوخة الشديدة .. طب ليه؟ 4-5 مرات يوميا.. ريّحى مخك من التفكير ... الرحمة!
قلق، خوف، تفكير، احباط، أمل، دافع، طموح، يأس، قرقضة ضوافر، أغانى، تنطيط، سرحان، تفكير، كتب، خروج، فسح، فيس، تويتر، تصوير، شوبنج، نيل، مشى، هواء، mp4، قرآن، أغانى غريبة وقديمة(^)، شمس، راديو، تجمع بنى آدمين، سفر، صحاب، غداء بره، أفلام($)، سينما، مياه غازية، تفكير تفكير تفكير ...
وقع تحت ايدى أغنية حالا حالا: Klaket Band | إنسان سابق:
انا الليل اللي قرر من القمر يهرب، انا النجم اللي عاش يسهر واول ما ابتدى يظهر لقى وقت النهار قرب، انا ميت عفريت جوا العلبه، انا ميت حدوته وميت مجروح، انا ميت مليون واحد ماتوا..انا كبت وضيقة وخنقة روح، انا فرح خنيق وطريق بيضيق، انا ميت مليون باب مش مفتوح انا صوت مكبوت وخناق وزعيق وصريخ وتاريخ اصبح ممسوح، انا كل طريق بمشيه فاضي بتكعبل في بواقي الماضي، جربت اقيس للفرح قميص ولقيته عليا مهوش لايق، اسمي في مشوراي مع الدنيا في الاخر كان انسان سابق.
أيوَ اللهِ، اشجينى اكتر، الحياة مش كحلى أوى كده! أحيانا بتكون فحلقى بس برضه مش للدرجة دى!
بكتب لمين انا مش عارفه.. فضلوا يزنوا عليّا زن(#) و"اكتبى يا بسمة. وحرام عليكِ يا بسمة" ولما اكتب حاجة واشيرها "الله عليكِ يا بسمة. لازم تستمرى يا بسمة. حرام عليكِ يا بسمة".. فى الحالتين حرام عليّا ..زهق، ملل، زن.. ادينى بكتب اهو-الحمد لله أن مدونتى أصبحت نسياً منسياً(-)- .. بكتب ليّا..بدل ما اكتب فى ورق واقطعه وارميه أو احتفظ بيه فى كشكول الذكريات(*) بكتب على النت عشان ما اتجننش فى عقلى وارميه وعشان ما يكونش تحت ايدى فيوجعنى(&)! مع انى نسيت انى بقعد على النت اكتر ما بشوف أهلى وكمان فيه اختراع اسمه ديليت .. أيوَ اللهِ!
مش مهم اى حاجة، المهم أن مدونتى وحشتنى أوى.. بقالنا سنين ما اتقابلناش
مدونتى هى الوحيدة اللى افضل ارغى ارغى ارغى وماتوقفنيش ولا تقوليش ارحمى نفسك ولا تجادلنيش.. مدونتى هى الوحيدة اللى بتريحنى عند الحكى .. وعلى رأى الوالدة "لو جابوا للمجنون ميت عقل على عقله حيفضل مجنون وكل واحد دماغه مريحاه" :D الحمد لله على نعمة دماغى وعقلى ^^
(^) سبحان الله بقالى فترة طويــــــلة ما اطيقش اسمعها ولا حتى فؤش (المطرب العالمى حمادة فؤش الملقب بمحمد فؤاد)! ..أغانى تنموية آه .. مش تقليدية آه.. أغانى ثورجية مزجنى .. وياسلام لو بتعرف تخلينى اعيط على اللى ماتوا :'(
($) زمان كنت بقول للبشر إيه اضيع ساعتين ونص من عمرى عشان فيلم! دلوقتى أنا بكافئ نفسى بفرجة على فيلم أبيض وأسود او فيلم لأحمد السقا وحلمى ومكى.
(#) فعلا الزن أمّر من السحر، دلوقتى اللى بيزن بعلّم عليه! بلاش خوته بقى!
(-) عبّر عن نفسك .. قول اللى فى نفسك.
(*) كشكولى الحبيب اللى لما بفتحه بقول على نفسى "ده انا سكر اوى! يا خراشى عليّا!" وبستعجب من عقلى وبوصفنى بــ"دايما عاقلة.. ربنا يكملنى بيه" ..#تواضع رهيب أنا!
(&) نسيت انى مابتوجعش :D الحمد لله
المشاركات
ليست هناك تعليقات:
إرسال تعليق