16.9.12

الإحساس بأنك..


الإحساس بأنك مسئول عن نفسك.. عادى مسئول عن نفسك من زمان، بس الإحساس بأن مالكش ضهر فى اللحظة الحالية معاك، الإحساس بأنك لو تعبت لأى ظرف، الإحساس بأنك لو راحت عليك نومة.. لو الموبايل بتاعك فضل يرن ما تلاقيش حد يصحيك ويقولك (يالا بقى قوم أنت معندكش شغل ولا إيه)، الإحساس بأنك معندكش حد تأخد رأيه ولو حتى فى حاجة تافهة (الإيشارب ده لايق على التونيك ولا اغيره)، الإحساس بأن مفيش حد يعملك الأكل.. الإحساس بأنك مش حتلاقى حد تعرض عليه (أنا حاكل تاكلوا معايا).. الإحساس بأنك لو معملتوش بنفسك مش حتلاقى تاكل، الإحساس بأن البيت فاضى وهادى ودمه تقيل، الإحساس بأنك تستغرب أى صوت فى البيت وتقوم تشوف إيه ده، الإحساس بأنك تاكل لوحدك ومفيش أمل تخبط فى حد فى الشقة ياكل معاك، الإحساس بأنك مش حينفع تلاقى التليفزيون مفتوح لأنك ماشغلتوش بقالك فترة، الإحساس بأنك اشتقت لسماع صوت فى الشقة، الإحساس بأنك بقيت بتتونس بأى صوت يطلع من جيرانكم الجداد اللى جمبكم.. الإحساس بأنك بتتمنى الشقة اللى ادامكم تسكن بقى، الإحساس بأنك خايف.. أيوة خايف.. فى بيتك.. حاسس بالغربة فى شقتك.. بتحس بالأمان بس فى أودتك .. وعلى سريرك، الإحساس بأنك عايز تتكلم مع حد من أهلك، الإحساس بأنك تبقى أون لاين على الفيس 3 الصبح ومعندكش استعداد حد يكلمك بس موجود عشان تحس بالونس، الإحساس بالوحدة، الإحساس بأن أهل بيتك وحشوك..أيوة وحشوك.. وحشوك أوى، الإحساس بشريط حياتك وبمواقفك وأنت معاهم بتعيشه تانى فى خيالك، الإحساس بأنك كنت غبى لأنك بتفضّل تقعد لوحدك.. غبى عشان فضلوا كتير يتحايلوا عليك تيجى معاهم وأنت فضلّت تتمتع بالبيت وهو فاضى ورااايق.. غبى لأنها طلعت متعة مؤقتة.. ومش متعة أصلا، الإحساس بأنك مشغول وقاعد فاضى عشان مش مركز، الإحساس بأنك لو مريت بمشكلة بره البيت حالا حالا مش حينفع تتصل باللى كنت بتتصل بيهم وتقولهم الحقوا تعالوا انجدونى.. حتى لو مكنتش وقعت فى مشكلة قبل كده بس مجرد الإحساس بأن مفيش ضهر.. مفيش ناس.. مفيش حماية.. مفيش أرض .. فيه خوف.. فيه اضطراب.. فيه قلق.. فدى تبقى مش حياة! 

هناك 3 تعليقات:

غير معرف يقول...


ثقافة الهزيمة .. يوميات البقرة الضاحكة‏

" الإفطار عبارة عن بيض وفول وزبادي، والغداء جمبري بالصوص، والعشاء فول مدمس، أما كلب سعادة البيه، فالغذاء شوربة خضار وفراخ والعشاء عسل نحل وزجاجة مياه معدنية " هذه هي إحدى القوائم التي اعتاد الحاج سلامة أبو لبن علي مدار 29 عاما أن يعدها، وأن يتلقي الأمر بإعدادها هاتفيا، لكن ليس في أي مطبخ عادي إنه مطبخ الرئاسة بقصر العروبة..

.باقى المقال بالرابط التالى www.ouregypt.us


قال د.عبدالله الأشعل مساعد وزير الخارجية الأسبق أنه يجب دفن الرئيس المخلوع حسني مبارك في إسرائيل بعد وفاته، مبارك كان يكره مصر ويتآمر عليها، داعيا الي دفنه بعد وفاته بجوار اليهود الذين أحبهم وأحبوه بشدة، أن تراب مصر الطاهر لا يمكن أن يدفن به شخص خائن مثل مبارك المخلوع.

L.G. يقول...

ههههههههه التعليق اللي فوق ضحكني عفوا

المهم عرفت ليه بأه بتدلقيني عشان تسافري مع اهلك روحي باه امسكي في ماما وصارحيها باللي بتقوليه ده
انا عن نفسي بزقطط لما ابقى لوحدي الصراحة لأن وجود من حولى لا يعني لي شئ مما ذكرتي
:(

mesh2dra يقول...

لا ما بصارحش انا :D هما يعرفوا من نفسهم :D
اخاف اقولك انى بقضى العيد وحيدة فريدة شريدة دلوقتى! واعتقد انى مش مزأططة بس على الاقل مستمتعة بالهدوء

أنتِ بس بتقولى كده عشان مفيش مجال تبعدى عنهم او يبعدوا عنك .. بس حقيقى لو حصل حتحسى هما أد إيه مهمين فى حياتك :)))