26.3.13

ليه؟!


ليه؟! 




#ليه ماما بتبقى شريكتى دايمًا فى أى شيكولاته تجيلى .. "ماماااااا جت لى شيكولاته " وليه بيبقى أول سؤال "من مين؟!"  .. وليه دايما يا بتقاسمها معاها يا اما اديهالها كلها! طب دى جت لى أنا .. ليه بقولّها أصلا -بمحض إرادتى؟ :D #لييييييييييه_شوبير_ستايل

#ليه تلبس شتوى تسيح، تلبس صيفى تتجمد، تلبس خريفى تتبستر، ليه مفيش لبس يتكيف مع حرارة الجو؟ 

#ليه مفيش أوبشن فى الفيس بوك تقدر من خلاله تمنع التعليقات! أنت محتاج تتكلم وتتكلم وبس .. مش عايز تسمع! 

#ليه كل ما البس تونيك أبيض معين –ده بالذات- اشرب فى نفس اليوم ميرندا يوسفى وما افتكرش الربط إلا بعد ما نقطة تتناثر هنا أو هناك وأنا بفتح الـ "كان" أو تتهز من إيدى أو اشرق وأنا بشرب .. المهم أنه لازم يطبع عليه نقطة أورانج، أو كاتشب، بيبقى أورانج برضه :D .. #اشمعنى_فعلا

#ليه اللى فيه داء ما بيبطلوش؟، ليه اخدناها قاعدة وثبتت فى دماغنا؟، ليه ما نقاومش الداء ده ونثبت لنفسنا اننا اقوى؟، ليه فيه بشر ضعيفة كده؟ .. #ليه_بس 

#ليه معظم التاكسيات البيضاء #فيرنا ؟ 

#ليه ما ينفعش ناخد شريط البرشام كله مرة واحد ليهجم على المرض هجمة واحدة؟، أو الجسم يخزن وياخد اللى محتاجه؟  ليه الشلل فى إن كل يوم حبايه؟ ..

#ليه عشان تطلع ورق رسمى تطلع عينيك كمان مع الورق، ليه كمية الطوابع دى؟، ليه طلوع ونزول وفين ختم الجمهورية يا أستاذة؟ ليه ما نتعاملش كله بالبطاقة أو الباسبور وفقط؟ إيه لازمه كل الورق ده وليه كذا أصل من نفس الحاجة #ليه و #إيه_الحكمة  و   #حسبى_الله

#ليه بنحط قطرة لجفاف العين؟ ليه العين بتجف؟ وإزاى يعنى؟ عينينا خلصت مخزون دموعها الاستراتيجى يعنى؟ ولا احنا اصلا ما بنعرفش نعيط زى البشر ومحتاجين مساعدات خارجية؟

#ليه اكتر تدوينة تم قراءتها فى مدونتى "هى قليلة الأدب؟!" .. ليه المدونة  بتظهر فى سيرش على كلمات من نفس القبيل بسبب التدوينة دى بس! مع انها تدوينة (محترمة) والله! ليه فيه كده؟ وليه هما كده! ابقوا كده بس بعيد عن مدونتى بقى.. بالمناسبة "محطرمة" ما بتتكتبش كده! #الرحمة_من_عندك_يا_إلهى !

#ليه كل ما تقرر تقفل موبايلك عشان تستجم تلاقى حاجة بتمنعك، وتكتشف أنك كنت حتفقد اتصال وتواصل مع ناس وجودهم بينعنش الحياة #الحمد_لله 

#ليه الشباب اللى فرحان بحاله وسيس –وأنا بعتبرهم سيس بقى وأغبياء ومقرفين وفارغين وتافهين وجدًا بقى كمان- لحد دلوقتى مش قادرين يستوعبوا أن جملة "ممكن نتعرف؟" دى اسخف وأغبى واقرف جملة البنت ممكن تشوفها مكتوبة أو تسمعها! #تأخر_عقلى .. ليه متصورين أن البنات بتزأطط لما تلاقى أنا فادى من القاهرة وأنتِ؟ وليه بيتخضوا لما الرد يكون عنيف! ليه بيتفزعوا لما ياخدوا على دماغهم .. ده أقل أقل واجب والله! #ضغط_دم_مش_مرتفع_ده_حينفجر 

#ليه فيه كتب علمية ما تفهمهاش من أول ولا سابع قراءة حتى! ليه لازم تقرأها الأول وبعدين تقرأ فى الموضوع من مصادر مختلفة وبعدين ترجع لنفس الكتاب ساعتها "ممكن" تفهم الكاتب عايز يوصل لإيه ..  #عذاب 

#ليه لسه فاكرة دكتور ع.غ من اقتصاد وسياسة لما كنا فى تمهيدى ماجستير يفضل يشرح فى قوانين واثباتاتها وجت منين ومنين بيودى على فين وهو أصلا مش تخصصنا .. أصلا مش حنعمل ماجستير فى الإحصاء.. أصلا دى أداة نستفيد منها مش نتعقد بيها .. يفضل يشرح يشرح ويمسح ويكتب ويمسح ويكتب ولما نموت منه يقولنا فى النهاية  "مش فاهمين؟ طيب كل اللى كتبته ده مالوش لازمه وماتركزوش فيه" .. أومال كنت بتقوله ليه؟ "عشان اديك الصعب ولما تيجى فى السكشن تقدّر قيمة اللى بتدرسه وتعرف أنه سهل"! #نظرية_مش_قادرة_استوعبها !

#ليه كُتاب كتير بنوا وأثروا فى شخصيتك من وأنت صغير، وبتستنى إصداراتهم بفارغ الصبر، وبعد ما كبرت ما بقتش قادر تستوعب آرائهم ولا مصدق كلامهم -الحالى- أصلا! #ازاى_كده ؟!

#ليه بتبقى عايز تتمرد وخلاص! حقك تكون متمرد، بس قبل ما تتمرد فكر حتتمرد على إيه ويستاهل التمرد فعلا ولا لأ، اتمرد صح، وما تسمحش لرغبة التمرد انها تدمر خطك ومبادئك وأخلاقك.

عزيزى الفيل #ليه الفأر بيشتكى منك؟ مش عشان أنت حجم كبير وبزلومة تعملى كده فيه! هو بيحبك ومش ناوى يفرط فيك ولا يوصلش لنقطة تفاهم .. دى أمنيته فى الحياة أصلا! حاول تسهلهاله عشان انا تعبت منكم أنتم الاتنين  #جواب_غرامى #عقل_لا_واعى

#ليه بتُعمم التجارب السيئة؟ ليه الناس ما بيحكوش إلا حكاوى مرة سيئة موجعة؟ ليه تحس أن مفيش حد عايش سعيد؟ ليه تحس أن الدنيا دايمًا دموع دموع دموع؟ ليه بتفتكر ساعتها أغنية "محدش مرتااااااح" .. #نكد_غير_طبيعى

#ليه اتاخدت واتخضيت لما محمود سالم مات –الدوام لله وحده- ليه حسيت أن جزء من طفولتى غادرنى؟ هو أكيد غادرنى منذ زمن سحيق، بس ليه اكتشفت ده بموت حد؟ ليه حبيت أوى شارع 9 بالمعادى وأنا لحد دلوقتى لسه مارحتوش؟ وليه مش عايزه اروحه؟ ليه نوسه لوزه تختخ عاطف ومحب كنت بحس انى عايشه معاهم؟ ليه كنت بتمنى اقابل رقم صفر -البوس الكبير الغامض-، ليه -لحد دلوقتى- نفسى فى كرة عثمان المطاطية عشان ادافع بيها عن نفسى ضد الأشرار! ليه حبيت الشياطين الـ 13 أوى كده؟ يمكن قوة إرادتهم واتحادهم وثقتهم فى بعضهم البعض وخوفهم على بعض وسندهم لبعض وتكاملهم وتماسكهم .. يمكن :) 


#ليه زيادة ريكوستات الصداقة مع ناس متعرفهمش بيتناسب طرديًا مع وضع صورة شخصية لجنابِك! #ضغط_دم_مرتفع #فيس_بوك 

بالضبط قدرت استوعب #ليه ربنا مش مجاوب لنا على كل الأسئلة اللى بتدور حول الكون والألوهيه، قدرت استوعب أن ربنا خلق لعلقنا قدرة على الاستيعاب محددة، لو عرفنا أزيد حنأذى نفسنا ولوعرفنا أقل حنتخبط ونفقد الثقة .. #عقلك_له_طاقة





هناك 8 تعليقات:

L.G. يقول...

قلت احجز مكان واقول عاجباني التدوينة جدا وبقية الرد على ليه في تعليق جي لما ابقى فاضية شوية

محمد عبد الغفار يقول...

ليه كل هذا الكم الهائل من الأسئلة الوجودية المحيرة

mesh2dra يقول...

L.G.
يا سموحتى ربنا يخليكِ ليا.. يارب تفضى ومستنيه ردودك

mesh2dra يقول...

محمد عبد الغفار
يا بشمهندس ده عرض صحى، لو بطلنا نفكر ونحتار نتخض على نفسنا :D

No Fear يقول...

مش عارف أعلق علي أية و لا أية بصراحة
بس بمناسبة ميرندا بس تفاح أخضر الضمير اتعد خلاص :)

mesh2dra يقول...

No Fear
جايز.. لأ، ده أكيد العيب فى الميرندا :D

غير معرف يقول...

ثقافة الهزيمة .. ذكريات الأرض المفقودة


و نظرا لأن هناك لوبى نووى قوى فى أغلب الدول العربية يشجع شراء و بناء مفاعلات نووية يدعمه فساد بعض المسئولين من ناحية، و تجاهل كثير من وسائل الإعلام العربية لأخبار حوادث المفاعلات النووية بصورة مريبة من ناحية أخرى ، بالأضافة إلى جهل كثير من الناس بخطورة المفاعلات النووية ، قررت نشر هذه المعلومات سيما أنه بالفعل أشترت دولة الأمارات 4 مفاعلات نووية بتكلفة تزيد على 20 مليار دولار، و نقرأ عن خطط سعودية لشراء 16 مفاعل نووى بتكلفة حوالى 100 مليار دولار ، و سعى محموم فى بعض الدول العربية و منها الأردن و مصر لشراء مفاعلات نووية لتوليد الكهرباء !!! ...
باقى المقال بالرابط التالى

www.ouregypt.us


و نشرت مجلة دير شبيجل الألمانية فى 29 مايو 2012 " أشعاعات نووية : أكتشاف سيزيوم من فوكوشيما فى أسماك التونة أمام السواحل الأمريكية" أسماك التونة أمام السواحل الأمريكية ثبت وجود مواد مشعة نوويا بها ، وهى التى تسربت من كارثة المحطة النووية فى فوكوشيما اليابانية إلى البيئة. فى أغسطس 2011 أسماك تونة تم صيدها من أمام سواحل كاليفورنيا كانت ملوثة بعنصر السيزيوم 137 ، و على أية حال نرى أن الأسماك نقلت المواد المشعة سريعا ، أحتاجت الأسماك من 4 ـ 5 شهور كى تجئ بالمواد المشعة من اليابان حتى السواحل الأمريكية ، بينما الرياح و التيارات البحرية أحتاجت لعدة شهور أضافية حتى تحمل آثار الكارثة النووية فى مارس 2011 إلى سواحل أمريكا الشمالية

طهقان يقول...

والله برافو عليك ، انت من المدونين القلاقل اللي مستمرين في الكتابة .. معظمهم قفلوا من 2010 مش عارف ليه ... بس بوست رائع