23.4.07

ممكن لو سمحتي استعير حاجتي؟!!!!




في حى من أحياء القاهرة الراقية ..حيث الهدوء ...والسكون... والتصميم الرائع لأبنيته...في حى يعني العشش باللغة التركية والتى هى جمع لكلمة عشة -بالمصرية- في حى يمتاز بزهرة الزملك ..وهى مفرد زمالك....حى الزمالك

6- 12-1912

فيلا عالم المصريات الألماني...كاميرا(1) زووووووووم إن

لودفيج بورشادت(ل): شفتي لقيت إيه النهاردة ماى هونى

الهونى بتاع هو(غ): إيه يا ماى لاف؟

ل):لقيت حاجة فظيعة ...حاجة سبشيل خالص..لقيت راس

غ):رأس ...اوه ماى جاد..رأس إيه

(ل): رأس لملكة من ملوك الفراعنة اسمها "نفرتيتي"...وهى زوجة اخناتون وحماة توت عنغ امون...لها ابنتان ميريت اتون وميكيت اتون...توفيت ميكيت وعلى إثر واتها اختفت نفرتيتي من البلاط الملكي وحلت محلها ابنتها الاخرى...وماتت نفرتيتي في العام الرابع عشر لحكم اخناتون ...واسمها يعني"الجميلة اتت" أو "نفرت أتى"

(غ): واااو ..وناوى تعمل إيه

(ل): ناوي اهربها لألمانيا

(غ): بس حتهربها ازاى؟

(ل): حنحط على الرأس وحل "طين" ونهربها ضمن القطع الفخارية المكسورة اللي رايحة لألمانيا للترميم وبكده محدش حيشك خالص

(غ): وااااااو ...برافو


*********************************



أنا اعرف أن لما تكون الحاجة بتاعتي وحد طلب يستعيرها واديتهاله ونام عليها يبقى عيب وقلة ذوق و..... وأنا اتكلم

هنا عن العلاقات على المستويات الفردية، فمابالنا بالعلاقات بين الدول والتى يجب ان تكون اكثر احتراما ومبنية على أساس نم الثقة المتينة وإلا...يبقى الاحسن ..صباح الخير ياجاري انت ف حالك وانا ف حالي

اضف إلى ذلك ان الامر لم يكن مجرد استعارة بل تهريب



*******************************


واعرف ايضا أن منظمة اليونسكو قررت أن كل الآثار المهربة خارج بلدها الأصلية قبل عام 1972 من حق الدولة صاحبة تلك الآثار أن تستردها...ونعلم جميعا أن راس نفرتيتي خرجت عام 1914

**********************************

ولكن الغريب في الامر اننا طالبنا باستعارتها

ياللهول استعارتها؟!!!

طب ماليهم حق يعملوا اكتر من كده...حاجة بتاعتي وبطالب على استحياء بيها ..عفوا باستعارتها...يافرعون إيه اللي فرعنك...؟

********************************

مش عارفة هو احنا بنطبق المثل اللي بيقول يابخت من بات مظلوم ولا بات ظالم...يابشر ده حقنا...من لايدافع عن حقه لا يستحقه

*******************************
لو عاوزين اكتر عن الموضوع دوسوا هنا وهنا وهنا

*************************

إحم إحم ..ممكن لو سمحتي من فضلك بعد إذنك أرجوكي استعير حاجتي..عشان خاطري!!!!!!!!!!!!!!!!!!



هناك 50 تعليقًا:

كراكيب عادل يقول...

هنا بالذات تناسب يا فرعون مين بعثر ممتلكات نرد احنا ونقول علشان ملمومين ومساكين خالص ونستعير لية منستعرش وممكن ندفع رهن كمان ولو حصل خدش يبقي فية غرامة :(

محمد عبد الغفار يقول...

حق النسان اهم فإن ضاع فكل شئ بعد ذلك سواء

el_assel يقول...

hii mesh2dra
والله بجد حاجة تزعل
هو ده اللي احنا وصلنالوا
يخدوا اثار بتاعتنا ونقول معلش
ناقص بقي يجوا يحتلوا بلدنا ويقولوا ان هم اللي بنوا الاهرامات
واكيد كده البلد (اللي ماسكين البلد ) حيكونوا في قمة الانبساط
خلاص احنا بقينل ولا حاجة في وسط العالم

انا من اهوى ومن اهوى انا يقول...

مساء الخيرات

تعقيبا على مانشرتموة فقد عرضنا هذا الموضوع على السيد المسؤول وقد قام سيادته بالشجب والادانه والاحتجاج والاحتجاب وقام بالادلاء بالعديد من التصريحات العنتريه ، وانتهى الى الحل الرشيد الفريد وهو عقد احدى اللجان التى تنظم صلاة فى احدى الساحات المكشوفه للدعاء على من استعار شيئا ولم يردة مرة اخر ، والحسبنه عليه .


وبعدين احنا زعلانين ليه فيه مبدأ بيقول ( البضاعه المباعه لاترد ولا تستبدل )

الربان يقول...

تحياتي

تفتكري هل سنتعلم الدرس ؟...ان من لا يحافظ علي ممتلكاته فلا يلومن الا نفسه...

ياريت لا تضيع منا أشاء أخري، كفانا عصر فقد فيه المصريون أشياء كثيرة أهم من رأس نفرتيتي ( هذا رأيي)...فقد الانسان المصري طيبته و شهامته... و أشياء أخري...
لكن الامل ما زال موجود دائما ان كان هناك عمل.

تحياتي

الدبور يقول...

هطل بعيد عن السامعين !
لما اطلب من غيري استعارة حاجتي
وممكن يكون عبط برضو

تحياتي
الدبور

شباب روش طحن يقول...

عادي يعني إيه المشكلة إحنا ناس بتتسرق من زمان من بره ومن جوا إيضا وأظن متعبة جدا السرقة لما تكون من داخل الوطن لما يكون حاميها حراميها وبعدين يمكن ألمانيا تزعل وتبطل تدينا عربيات مرسيدس وتبقي مشكلة بابا حسني حايركب إيه والجماعة المهمين لازم يركبوا علي حاجة تانية غير كتافنا طبعا لكن لازم يركبوا إحنا أمة عايشين عالة علي العالم فطجبيعي جدا أن لا يصبح لنا أي ثقل سياسي أو دولي يعني موضوع مكانة مصر ده مجرد كلام مدارس ليس له دليل في أرض الواقع اليوم من له صوت ويحترم هو من ينتج هو من لوجوده هدف وقيمة يعني مثلا المواطن الألماني ماذا سيصيبه لو قطعت مصر علاقتها بين الدولتين ولا حاجة مش حايتفسحوا في مصر ممكن بس عادي إحنا المتضررين في كلا الحالتين يلا باي

ody911 يقول...

مصر هيه أمى

نيلها جوة دمى

شمسها فى سمارى

جوها فى ملمحى

حتى لونى قمحى لون نيلك يا مصر


عادى بقة
أودى

Van Gogh يقول...

عندما لا يحترمك العالم....حين يسخر الناس منك ومن افعالك واقوالك...حين تمسى جنسيتك كلمة يسب الناس بعضهم بها...حين يكون حلم امتك..هو الغربة حتى ولو لدى من يكرهك وتكرهيهم
حينما تصير اى جنسية اخرى تحمل لك كرامة اكثر...واحترام اكثر من جنسيتك
حين..حين ...حين...؟؟
اعلمى انك مصرية

غير معرف يقول...

السلام عليكم

كراكيب عادل

والله اضحكتنى
ممكن ندفع رهن كمان
ولو حصل خدش يبقى فيه غرامة

أصلا
ده من ضمن
حججهم
انهم خايفين على التمثال
احسن يحصل له حاجة

شفت الناس الطيبة دي
بتحافظلنا على ممتلكاتنا

نورتنى
:)

غير معرف يقول...

السلام عليكم
أ.محمد جعفر

فعلا

مادام بنتهان في بلدنا
اصلا
يبقى مالناش حق
اننا نطلب بيه

وعلى رأى اودى
عادى بقى


سلاماتي
:)

غير معرف يقول...

السلام عليكم

الأصيل

مين يا فندم؟
اللي ماسكين البلد
حيبقوا في قمة الانبساط

الله..الله
أتعترض ...وكمان بترفع صوتك:P
أنا اعلنها صريحة

أنا معرفكش:D

طبعا بقينا ولا أى حاجة
حتى الحاجة اللي انت
بتتكلم عنها دى
ما عرفناش نحصلها

سلاماتي:)

غير معرف يقول...

مساء الانوار

انا من اهوى ومن اهوى انا

تحديث:
وقد ذكر سيادته في حوار
صحفي له اجراه عقب لقاءه بالسيد ...
جاء فيه انه يعتذر عن كل مابدر منه
من احاديث غير مسئولة من شخص غير ناضج -يقصد نفسه- بانه لم يكن في وعيه عندما ادلى بالتصريح السابق
ويعتذر ...يعتذر ...زيعتذر جدا و أوي و على الآخر عما بدر من سيادته


*******
ما هى المشكلة انها مش مباعة
دي متهربة


نورت المدونة جدا

سلاماتي

غير معرف يقول...

السلام عليكم
الربان

اولا اهلا بك
نورتنى

ثانيا:
لا اعتقد اننا سنتعلم الدرس
في يوم من الايام
إنه القدر


***
لا سيدي الفاضل
لقد فقد كرامته ايضا

سلاماتي

غير معرف يقول...

السلام عليكم
الدبور

مش عارفة ليه
شاكة ان مياه النيل
هى اللي مأثرة على مستوى
الذكاء اللي عمال ينحدر



سلاماتي

غير معرف يقول...

السلام عليكم

شباب روش طحن

اتفق معك جدا
نحن الخاسرين في النهاية
ونحن من نوهم انفسنا بمكانتنا
رغم اننا لو فكرنا دقيقة
وجعلنا انفسنا على ارض الواقع
سنرى انها مجرد كلمة تشبثنا بها
لا اعرف من اطلقها
وسنرى ايضا انها كالمصاصة يعطوها لنا الغير
لكي نتشاغل بها عن الحقيقة

يالا سلام:D

غير معرف يقول...

السلام عليكم

اودى

آه مصر هى أمي

بس اللي بيحركوا الحوار
حاساهم مرات ابويا
جوز امى
اخت جوزي
متفهمش
حاجة كده يعنى


وعادى يا اودى
هو انا قلت حاجة


سلاماتي

غير معرف يقول...

السلام عليكم
van gogh

آه والله
كلمات حضرتك معبرة جدا
وخاصة موضوع الجنسية ده
ياااه بتفرق اوى

بس اسمحلى اضيف
حينما يتعامل الاجانب
معاملة افضل من معاملتكم انتم اصحاب البلد
بحجة ان الامر مجرد تشجيع للسياحة..ليس اكثر
حين...
حين...
حين...
كتييير اوى
ومن كترهم زهقنا



أسعدتنى زيارتك

عاشقة الوطن يقول...

والله ياستى انتى زوديها اوى يعنى ايه تستعيري حاجتك والله ناس عاوزة الضرب ديه حاجتك بس مش هادهالك
حاجة غريبة الناس اليومين دول كمان بقوا بيطالبوا بحاجتهم ترجع لهم
ماهو ده اللى ناقص

خلى بالك احسن يرجعوا فى كلامهم تانى وياخدوا الحاجة اللى أتكرموا علينا ورجعوها لينا تانى

bastokka طهقانة يقول...

السلام عليكم
ازيك؟
شوفي يا ستي
احنا بنطبق المثل اللي بيقول شيلني و اشيلك
هو اخدوا راس الست نفرتيتي و احنا بناخد منهم كوكايين نعمل بيه راس للشعب كله
يبقى لازم نسكت و منستعجلش في طلب الراس بتاعتنا لحسن يبطلوا يبعتلنا التعميرة
--
سقط سهوا
أساس نم الثقة المتينة
--
من
--
اوروفوار

-_- يقول...

المانيا اقل بلد سرقت مننا اثار

!!!

طب شوفي الاثار المسروقة في باريس ولا في امريكا ولا في انجلترا

حاجات ملهاش حل

!!

khaled يقول...

زى ممكن لو سمحت ادخل بيتى؟

شيماء الجيزى يقول...

مش قادره
بجد مش قادره
مش انتى يا اختى
انا بقول انى انا الى مش قااااااادره
ايه ده يا بنتى
بتفكرينى ليه
بالحوسه الى احنا فيها
اة يا فرعون مين فرعنك
قال ملقتش ....يردنى
اكمل النقط

بس بجد ليا سؤال
تفتكرى حتى لو طالبنا مش على استحياء يعنى
هيرجعوها؟
تحياتى وقبلاتى
وحشانى موت يا بنتى

إبـراهيم ... يقول...

إززززززيــــتك يا مش قادرة ، ما تقدري بقى شوية ، وتنورينا ، حلو البوست ـ كالعادة ـ بس فعلاً مبروووووك قووووي ع النيو لوك ، تحفة طبعًا .
.
.
.
و مبارك ع الجزمة ، تحيااااااتي

غير معرف يقول...

السلام عليكم

عاشقة الوطن

عالم عاوزة الحرق
آه
مااحنا سكتنا لهم...وعاوزين يستعيروا حاجتهم
والله عال عال


******
مش عارفة ليه لما بتزورى مدونتى
بحس بتفاؤل...فعلا مش عارفة

منوراني

غير معرف يقول...

السلام عليكم
طهقانة

هههههههههه
نظرية تدرس
وعمليا
يبقى كده
المانيا
عداها العيب و"أزح
":D

واوعى تفكري تسيبي البيت
تانى...اسيبله البيت يتمتع بالحرية
ده بعده

غير معرف يقول...

السلام عليكم

شارم

على رأيك والله

السنة اللي فاتت
في شهر يونيو يوم 11 و 12
فيه صالتين في نيويورك
باعوا اثار كتيير جدا
من بين مجموعة
بتضم 89 قطعة

98 قطعة
شفت الافتراء
واحنا نايمين


نورتني:)

غير معرف يقول...

السلام عليكم
مستر خالد

آه
وقس على ذلك
ممكن اخد حريتي ف بلدى
ومكمن تسمحوا بحرية صحافة
وممكن معلش حرية تعبير
وممكن حرية تداول معلومات عن بلدى و ف بلدى
وممكن....
وممكن...

يووووه انتم طلباتكم كترت اوى
بس ولا حاجة حتحصل:p

احتراماتي
:)

غير معرف يقول...

السلام عليكم

شوشو

لأ طبعا..طبعا
حيرجعوا مين يا بنتى
استحالة


موضوعك الاخير تحفة يا بنتى
ماشاء الله عليكى


سلاماتي
:)

غير معرف يقول...

السلام عليكم

إبراهيم معايا

الله يكرمك
ميرسي على ذوق حضرتك

احم احم
مبارك علي ايه
مش واخدة بالي:D

سلاماتي

•«ρяoιd»•™ يقول...

هم يضحك و هم يبكي

احنا اللي عملنا في روحنا كده

حكومه عجيبه و شعب اغرب

ربنا يرجعلنا حقنا بقي

تحياتي

YHYيــوســف الـمصـرى يقول...

يا ستى خير كويس انها جت على راس الست نفرتيتى هانم ومكنوش خدو ابو الهول والاهرمات مكناش هنعرف نرجعهم ههههههه
بس والله زاهى حواس ده بيتعب الراجل مقطع نفسه تدوير على حجتنا على اتسرقت فعلا ونعم ال.....
تحياتى لك ولمدونتك الجميلة
سؤال هى نفرتيتى كانت حزب وطنى ولا كانت معارضة ؟؟؟
علشان نعرف هترجع ولا لاء؟؟؟

إبـراهيم ... يقول...

مش قاااادرة خانو ، تماشيًا مع رغبة معاليكم في الحفاظ على ما يسمى بأولاد المستقبل ، تم تصحيح الأوضاع اللي كانت مغلوطة عندي ف المدونة ، لو تفتكري .............
هوا احنا لينا غير الريس برضوووو ؟؟؟؟


تحياااتي مرة تانية :)

واحـــد مـــــن الـنـــاس يقول...

لا واللي يجننك ان المانيا رفضت اعارة التمثال لمصر !!!

يعني كمان ادتنا على قفانا وقالتلنا لا
منتوش واخدين حاجتكم


...

واللي يغيظان مبارك كل شهرين رايح جاي لالمانيا

ويقولك العلاقات الثنائية والملوخية

وممتاز القط وسرايا الكلب يقولوك ان المستشارة الالمانية بتشحت الحكمة من الرئيس مبارك
وان العالم كله بياخد برأي الرئيس مبارك

واهم بيدونا على قفانا

ادي اخرة الحكمة

غير معرف يقول...

اكثر حاجة عجبتني

صورة فنجان القهوة

غير معرف يقول...

السلام عليكم

priod
تفتكر ربنا
حيرجع حقنا

ربنا مابيرجعش حق
حد مش بيدافع عنه
ومش همه اصلا


سلاماتي
:)

غير معرف يقول...

السلام عليكم
uhy

انت عارف لو كان
ينفع ياخدوا الاهرامات
ولا ابو الهول
كانوا عملوها
بس صعب ..حيشيلوه ازاى

وعلى فكرة
راس نفرتيتي
معارضة


ميرسي على رأيك في مدونتى
الله يكرم حضرتك
واهلا بك

سلاماتي

غير معرف يقول...

السلام عليكم

إبراهيم معايا



الحمد لله
لولولولي
وحنربي العيال

أيوة كده
وضح وجهة نظرك
خليت الناس تظلم
يا راجل

تحياتى لك
ولبوستاتك الرائعة

غير معرف يقول...

السلام عليكم

واحد من الناس

أتسخر من
العلاقات الثنائية
؟!! يا راجل

(وش متضايق)

لاااا
وتشبهها بالملوخية

كده الملوخية تزعل

احتراماتي
:)

غير معرف يقول...

السلام عليكم

أونكل طهقان

ياسلام يا عمو
للدرجة دى
عاجباك فنجانى
لا ولا ريحته
شاممها
الله

طب ماتاخد
طنت طهقانة
وتروحوا تفكوا عن نفسكم كده
وتعزمها على فنجان قهوة
فى أى حتة
إنشالله قهوة بلدى
وتغيروا اسمكم
لفرحان وفرحانة

الحصان الأسود يقول...

يا مش قادرة

هما خايفين يبعتوها مصر لاحسن نضرب عليها و نقول دي بتاعتنا و مش خارجة و عليكوا و على أريد حلاً بقى

و عندهم حق المفروض وزارة الثقافة للمبدع فاروق بك حسني
والخارجية للمحترم أبو الغيط كانوا يطالبوا باسترادادها مش باستعارتها

يا أمة ضحكت من جهلها الأمم

زحل الفلكي يقول...

فعلا حاجه عجيبة
بس تفتكري لو رجعت احنا المصريين حنكون مبسوطين

حييجوا السياح يشوفوها وده معناه ان الامن حيزيد وقفل الشوارع حيزيد والضغط حيزيد
لو ترجع ونشوفها زي مبنشوف الحاجه في المتحف عادي يبقا ياريت
بس لازم نفتكر انه لازم طالما حاجتي ارجعها وبالقانون
نعتبرها زي ارض سيناء
ونغير الاغنية ونقول نفرتيتي رجعت راسها لينا
ومصر اليوم في تاااااابووووووت

shermen يقول...

المال السايب يعلم السرقة
لا تعليق

غير معرف يقول...

السلام عليكم

الحصان الاسود

ده المفروض اللي
كان يحصل من زمان
بس تقول إيه بقى



نورتنى

غير معرف يقول...

السلام عليكم

زحل الفلكى


يا سلام عغلى الناس اللي بتفكر لقدام
احد المسئولين كلمنى
قصدى ادانى ميسد على الموبايل
وانا كلمته

وقالي انهم لو صمموا على رايهم في ارجاع الراس
حيحدث تكس سكانى رهيب
لان الاجانب حييجوا عندنا يسكنوا
والمواصلات بقي وغيره
عشان كده مش عاوزين يحصل تطورات في اي حاجة
لان كده الاستثمارات حتزيد
وبالتالي
حيزداد السكان
وحييجوا ناس من برة


ياه ده ايه الزحمة دى
لا احنا كده كويسين
خلينا بقى كده

احمدك يارب


مبروك على مدونتك الجديدة

غير معرف يقول...

السلام عليكم

شيرمين

على رأيك
بس انا فعلا نفسي اعرف ليه بنطالب باستعارتها
ليه ماطالبناش بيها ..باستردادها

إيه السبب يعنى



اهلا بيكى في مدونتى

نورتينى كتييير
:)

shermen يقول...

على فكرة القصة خلصت
منتظرة تعليقك
تحياتي

غير معرف يقول...

السلام عليكم


شيرمين

جرى حالا على مدونتك
:)

koukawy يقول...

اه ما احلي انهم يلاقوا حد عبيط يتعبطوه
و لا تفتكري هو مش عبيط و بيعمل عبيط
الله اعلم
ان بعد الظن اثم

mesh2dra يقول...

koykawy

انا شريرة
وبفهمهم غلط

دول ناس من كتر اعجابهم بموهبتنا - الفراعنة - في علم التحنيط
ومن كتر عشقهم لعمايل ايدينا مش قادرين يستغنوا عن حاجتنا
بيتفاءلوا بينا

انا راجعت نفسي ولقتنى متسرعة في الحكم وشريرة كمان

لا
هما عبط وبيستعبطوا
بس احنا اعبط