مش قادرة

اعتذر

2010-03-26T23:31:00.004+02:00

لو ملأنا الدنيا باعتذارتنا تجاه من اخطأنا في حقهم ... لو حاولنا إصلاح أخطاءنا تجاههم وماترتب على تلك الأخطاء... لو حاولنا مساعدتهم ... لو انتقمنا من أنفسنا لهم .. لو دعونا الله بصلاح حالهم.. فلن يكفر هذا عما اقترفناه في حقهم... اعلم إنه لن يفيد، ولكنني حقا اعتذر ....اعتذر ... اعتذر ... اعتذر ... اعتذر .... اعتذر ... اعتذر .... اعتذر .

لا .. تستحقها

2009-05-26T23:03:00.008+03:00

إلي السيد (...)

بدون تحية أو سلام .. وسأعرفك السبب في نهاية رسالتي...حقيقة لا اعرف من أين ابدأ،

هل ابدأ من تاريخ معرفتنا بك أم ابدأ من تاريخ الاقتراب من الإصابة بشىء في القلب أو ضغط الدم وقرب إنتهاء الأمر بجلطة،

أم ابدأ من انعدام المسئولية وعدم الإحساس بها بتاتا في يوم من الأيام ، هل ابدأ من المماطلة ووجع القلب والتأخير والتأجيل،

أم ابدأ من اقترابك من تحطيم أناس رسموا خططهم وأحلامهم "واللي يظهر انها واهية" وشعورك بأن الأمر "ايزى خالص" ولاكأنك السبب في حاجة

أم ابدأ من فقدان الثقة -في المستقبل القريب- في أناس ليس لهم ذنب سوى تعاملهم معك، هل ابدأ من وضع الثقة في شخص ووعده بتنفيذ ما تم الاتفاق عليه ثم إخلاله بوعده ذلك،

أم ابدأ بالنتائج المترتبة على إخلاله بوعده

هل ابدأ بحكى قصة بكاء أم خوف أم تشتت وعدم تركيز أم بلبلة أم وجع قلب أم شد شعر أم عدم القدرة على التركيز أم الحيرة أم "والنبي يارب انجدنا من المصيبة اللي وقعنا فيها" أم "ربنا يسامحك يا أخي " أم جميعهم،

هل ابدأ بحكى ما كنت سأفعله لو عاد بي الزمن إلي الوراء شهر وكام يوم

أم ابدأ بحكى ما يقال "ربنا يستر" أم "علينا أن نتعامل مع الموقف" أم" اللي عايزه ربنا حيكون بقى" أم" يارب استرها" أم " الراجل ده حيجيبلي حاجة في نافوخي" أم "أنا حكلمه اقوله حاجة يمكن يتحرك شوية" أم " الامتحان بعد بكرة والمنهج لسه ما اتفتحش ومش عارفة اركز" أم "ها عملتوا ايه انهاردة" أم " لازم تتنرفزوا عليه وتوضحوله أن الأمر مش تهريج" أم "هو انتى بتعرفي تتنرفزي اصلا سيبيلي أنا الموضوع ده" أم " هو احنا لو عيطناله حيحس بالمأساة اللي احنا فيها فنصعب عليه فيلتزم بوعده"

أم ابدأ بأمر اقتربك من أن تصبح الشخص الثالث- الذي سبب الأذية والذين لن اسامحهم-أبدا- في حياتي ولا حتى بعد مماتي

أم ابدأ بحكى النرفزة عليك - ولأول مرة - لافتقادك أدنى درجات الإحساس... لافتقادك أدنى درجات المسئولية .. هل تعرف معنى أن يكلم الشخص نفسه .. هل تعرف معنى أن يلف الشخص حوالين نفسه

أم بدأ بقولي هذا " أيها السيد تنفيذ الوعود وتحمل المسئولية والإحساس بها و "الذكاء" أشياء أصلية أصيلة في داخل أعماق الإنسان أى انها أشياء ليست مكتسبة بل هى في صلب شخصيته وافتقادك إلي تلك الصفات جلب المشاكل وأية مشاكل .. فياليت ما تم معرفتك ويا ليت ما تم التعامل معك"

أم ابدأ بماذا .. حقيقة لا أعرف بماذا ابدأ ، فأنا حقا في حيرة .

وعدتك بأن اطلعك على سر بدء الرسالة ب " بدون تحية أو سلام" ولأنني شخصية احافظ على كلامي ووعودي واعتبرها سيف على رقبتي و" لأني عندي دم" و" إحساس" ، ولن اعاملك بالمثل ، بل سأقول لك ببساطة أيها السيد لم ابدأ رسالتي بسلام أو تحية وذلك لأنك ... لا تستحقها .. فأنت دونها ... والله يعوض علينا .

حسبي الله لا إله إلا هو ، عليه توكلت ، وهو رب العرش العظيم

يارب ... وكلتك

يارب

2009-02-18T21:31:00.005+02:00

ياااااااااااااااااااااااااااااااا رب

ماما .....

2008-04-29T20:37:00.004+03:00

ماما ... حبيبتي

أنا آسفه

آسفه على إيه .. مش عارفة

بس أكيد ضايقتك ف يوم أو نرفزتك .. أكيد زعلتي مني قبل كده .. أكيد عملت حاجات ترفع الضغط .. أكيد زعلت أخويا فزعلتي مني

بس بجد مش متصورة .. ازاى أنا ممكن أكون زعلتك أو ضايقتك ف يوم

رغم ان مفيش مناسبة لكلامي ده ، ومفيش مصيبة في الوقت الحالي عملتها - وكاتبة الكلام ده عشان أصالحك أو بمهد لحضرتك - إلا إنى حسييت انى عايزة اكتب ده .. وكتبته هنا على الملأ .. مش ف كشكولي أو على ورق وبعد ما اكتبه اقراه كذا مرة وأقطعه - كعادتي- لأ .. فضلت ان الناس كلها تعرف .. أنا بحبك أوى يا ماما

ماما ..

بحبك أكتر من أى حاجة ف الدنيا

مامتى ..

بحبك أكتر من العجوة والكريم كراميل :D

ماماتي ..

حضرتك بطلة

لو ربنا رزقني بأولاد .. مش حعرف أحبهم زى ما حضرتك بتحبينا

عارفة يا ماما ان حضرتك مش حتقري الكلام ده إلا لو قلتلك .. ماما أنا كتبت عنك ف بلوجتي .. ساعتها حتردى عليا وتقوليلي بجد

وعارفة أن حضرتك مش بتدخلي على بلوجتي إلا لما أقعدك أنا وافتحهالك واخليكي تقريها ... واقولك انا مش عارفة ازاى انتى أم .. المفروض يبقى فيه رقابة على بنتك وتدخلي كل شوية تشوفي بلوجتها والكلام اللي بتكتبه وتعلقه في البلوجات التانية ... وتردي حضرتك عليا وتقوليلي مش محتاجة رقابة ، أنا مربية بنتي ... بس يا ماما الشيطان شاطر... يعمل شاطر على أى حد تانى ، مش على بنتي

ربنا يديكي الصحة يا غالية

و يكرمك ف العيال ولادك :D

آسفه يا ماما لو كنتي زعلتي مني ف يوم .... فعلا آسفه ... وأموت قبل ما ييجي يوم زى ده

ماما ....

وحشاني أوي

تاج 2 3 4 .. كفااية

2008-02-20T00:16:00.010+02:00

السلام عليكم

اولا بعلن خبر انتصاري على الملأ ... درجاتي طلعت .. آن آن آآآآآن .. بغض النظر عن الشحورة والبهدلة في الدرجات... وكويس ان ابي وامي ما اتبروش مني ..بس بجد عايزة اشكركم على دعواتكم .. بس المرة الجاية تدعوا بذمة اكبر بشوية:P

ثانيا بقى .. بلوجتي تمت السنة الاولى لها في 15-2-2007.. حتقولولي بس في الprofile مكتوب يوليو احنا حننصب.. لا مش مزورة أنا في شهادة ميلادها بس اللي حصل انى غيرت الاكونت بتاعي في شهر يوليو ... حد فهم حاجة؟، مش أزمة ، المهم ، بوسة كبيرة مني ليها وليا

****

ثالثا بقى وهو التقيل ...اللي جاى بقى شوية عقاب حلوين من تشي السعيد:)

انت ليه بقيت مدون ( يعنى ايه خلى الفكرة بتاعت التدوين تجيلك اصلا ) ؟؟
انا اعرف عالم المدونات من زمااان بس مفكرتش ادخل فيه ، كنت مجرد زائرة بدون تعليق
اللي حصل ان احد الصحفيين كان عامل بلوج جديد وقالي عاوزك تساعديني في اني اعمله دعاية واى حد يقابلك اديهوله ... يعني اصيت لبلوجته، بس الحمد لله انى ما ارتكبتش الجريمة المنكرة دي ف حق البشرية .. مش الدال على الخير كفاعله ، انا كنت حطبق ده بالضبط بس بالعكس :d
..المهم
قعدت العب وادعبس لغاية ماعملت مدونة تجريبية لعبت فيها شوية وجربت ومسحت وكتبت وبعدين عملت بلوجتي العزيزة على قلبي :)

2- ايه هى اول مدونة عرفتها ؟؟
عايزة اتجوز من أوائل البلوجات اللي عرفتها وعلقت معايا
انما اول مدونة على وجه التحديد ... مش فاكرة

ايه اكتر سلبية انت شايفها فى المدونات؟؟
وجود مدونات صفراء ، مدونات تحوي قاذورات افكار شيطانية سلبية سيئة
المشكلة ان مفيش رقيب ، ومش حينفع يبقى فيه رقيب ، وبالتالي الرقيب يبقى ذاتي ، وبما ان صوابعك مش زى بعضها ومش كل الناس عندها نفس المبادىء الواحدة ، فبالتالي مفييش الا اننا ندعي ربنا ..... يارب اهدينا اجمعين.. انا مش ملاك بس فيه حاجات لا تطاق وفيه حدود حمراء المفروض نلتزم بيها

ايه اكتر حاجة لمستها بتفيد المجتمع من التدوين ؟؟
على المستوى الفعلي ، ولا حاجة ، او لو أثر فتأثيره بسيط جدا، انما على المستوى النفسي.. خلى فيه امل بأن فيه أمل

هل غير التدوين جواك حاجة معينة ؟؟
التدوين غير حاجات ، مش حاجة ، التدوين بجد طور مني كتير اوى ، كفاية انه لو حصلت ادامي حاجة بربطها بالمدونة ، كفاية انى لو اتكلمت مع حد ولقيت ان الموضوع اللي بنتكلم فيه مشابه لاحد البوستات بفتكرها وبحكي البوست، كفاية انى أكلت دماغ صحباتي بالتدوين

هل لقيت التدوين كتفريج هم ومنبر عالى تقدر صوتك يتسمع من عليه ؟؟
تفريج هم آه جداااا، تعبير عن النفس أكيد

هل حسيت ان التدوين عالم كبير انت عايش جواه واصبحت فرد منه ؟؟
جدا جداا ، جبت المفيد يا تشي

هل اكتسبت صداقات من التدوين ؟؟
فيه مدونيين كتير اوى مكلمتهمش على الماسنجر مثلا ، بس بحس اننا اصحاب ، بانهم اخواتي ، بتأثر جدا بحالتهم النفسية وبتنعكس عليا من خلال كتابتهم

لو اكتسبت صداقات .. ايه تقيمك ليهم بالنسبة لأصدقاء اللى تعرفهم من الشغل او ( الدراسة أو الجيران أو ... ) ؟؟
فيهم ناس محترمة اوى ، بقوا جزء من حياتي ، مقدرش استغنى عن بلوجاتهم ولا كتابتهم ولا وجودهم

هل أثر التدوين فى نظرتك للحياة من حواليك ؟؟
اه جدا ، انا من النوع المتطرف في التفكير ، يا آه يا لأ ، يا أبيض يا أسود، بس التدوين خلاني مرنة ومتقبلة للحلول الوسطية ووجهات نظر مختلفة

هل قفلت ( أو فكرت تقفل ) مدونتك فى يوم ؟؟ وليه ؟؟
من كام يوم منعت امكانية دخول المدونة ، واحمد ربنا انها جت على أد كده بس ، لانى ببساطة كنت حعملها ديليت ، ورجعتها تاني ، لانى كنت مسافرة فخفت اروح ما ارجعش تانى ومحدش يعرف انى انتقلت لآخرتي واتحرم من قرائتكم للفاتحة على روحي، ليه ... كنت مخنوقة وحسيت ف لحظة انى مش عايزة حاجة من الدنيا ولا حتى بلوجتي

هل فكرت تسيب التدوين تماما وتخرج من العالم دا ؟؟ وليه ؟؟
تقريبا نفس اجابة السؤال السابق ، بالاضافة الي انى فكرت الف مرة اني اقفلها او اسيب التدوين اصلا بس مقدرتش ابعد عن بنتي الصغيرة .. ازاى ابعد اصلا وانا اقنعت صديقاتي وبقنع اخي بالتدوين .. ليه ، نفس الفكرة، مدونات صفراء خنقني وجودها ... وخنقني ان الواحد يكون عنده مدونة يعلم بيها ربنا ويمشي يتباهى بيها ، يا عم استحى ، الحياء شعبة من شعب الايمان ... بس لما فكرت بواقعية لقيت ان التدوين ما هو الا جزء صغير لا يتجزأ من مجتمعنا الكبير ، وزى ما حنلاقي اللي بيتفق معانا في قيمنا حنلاقي اللي بيختلف اكيد، ودي حاجة المفروض ما تضايقنيش .
حاجة كمان بقى، وييمكن محدش يعرفها الا المقربين ليا ، وهى اني كنت عايزة ادون على اساس انى مش قادرة اللي هى لا تمت بصلة لبسمة ، ولما حصل انى اضطريت ادى لينك بلوجتي لجروب ما تحت الحاح كنت حروح البيت اعملها ديليت وهى لسه مكملتش الشهرين ، بس نونا وجيسي واخي اقنعوني بالعدول ... بس حاليا الموضوع مبقاش يفرق معايا بتاتا – ده انا حاطه اللينك في توقيعي بالميل- .. ده على أساس اني نجمة مجتمع ولازم جمهوري يتابع اخباري وحقه عليا انه يعرف كل حاجة عني :d

هتمرر التاج لميييييييييييييييييييين
تحت حتعرف
*******

كمان تاج من

خالو أحمد - د/ أجدع بنوتة - بسبس الروح

شكرا لكم جميعا :))

هل توافق على حذف الديانة من البطاقة الشخصية ؟
بكل تأكيد لأ ، تفتكر انت ينفع حد يمشي من غير اسم ؟!!

ما رأيك في المثليين ، هل توافق على الاعتراف بالمثليين ، وهل هى حرية شخصية ، وهل لديك أصدقاء من المثليين؟
باختصار : أنت حر مالم تضر وربنا هو اللي حيحاسب مش أنا ، ولا يمكن أبدا ان اعترف بالمثلية ، الموضوع مش صعب ، كام زيارة مع طبيب نفسي وبدني ووقفة تحدي مع النفس وتذكر الله وبس، لا ليس لدى أصدقاء مثليين

هل تعتقد بوجود اضطهاد في مصر للمسيحيين ؟
لا خالص
بالمناسبة بقى عندي زميلات في الكلية بجد ربنا يباركلهم ، وعندي بقى أول مستر عرف ازاى يخليني افهم مادة الرياضيات رغم انى غبت اول شهر من المدرسة في 3 اعدادي ورغم اني كنت بكره المادة الا انه قدر يخليني ألم وافهم و أحب عقدة حياتي وعشقتها بعد كده، إنه ... مستر أنيس ، واللي ثبت العشق بقى كان مستر سامي ناشد في ثانوي ........ وحشتني أيام الشقاوة :D

من هو الشخص الذي تختاره لرئاسة الجمهورية ؟
عمرو خالد

إذا قمت بتأسيس حزب ..... من هم الأشخاص الذين ستضمهم في الحزب ليشاركوك في حكم مصر ؟
مصطفى أمين ، د. سيد عويس ، احسان عبد القدوس ، عثمان أحمد عثمان... الله يرحمهم جميعا :d.
مصطفى محمود ، عمرو خالد ، مبروك عطية ، خالد الجندي
ملحوظة : اختيار احدهم – ايا كان هذا الشخص- للحكم مسألة في غاية الصعوبة، ومش شرط ان احدهم ناجح في مجاله يبقى حينجح في الحكم... مش شرط ابدا

في حالة فوزك في الانتخابات .... هل توافق على مشاركة كل من الأخوان المسلمين والاقباط في الحكم ؟
آه ، ايه المشكلة يعني ، مش انسان وعنده وجهة نظر ورؤية مختلفة وأكيد كله حيصب في الصالح العام يبقى ليه لأ

في رأيك الشخصي . ما هى أفضل مدونة قمت بزيارتها ؟
اقول بقى الرد الدبلوماسي بتاع أى مدونة انا علقت فيها وبعلق فيها تبقى مدونة بحبها ، لو قلتهم محتاجة بلوج جديدة عشان تكفيهم .... :D،بس عاوزة اقول حاجة أنا مش بحب عالم التدوين أنا بعشقه وفشلت في أخذ قرار اغلاق المدونة والابتعاد .. بصراحة مقدرتش خلاص بقى إدمان ، فعلا انا بقى عندي اخوة واخوات كتيييييييييير، أول حاجة بعملها اول ما أقعد عالنت انى افتح المدونات ومن كل موضوع مكتوب بتقدر تعرف الحالة النفسية للمدون أو المدونة ايه

هل توافقين على الزواج من رجل مطلق ؟
تؤ السؤال ميبقاش كده وخاصة ليا ، السؤال ليا هل توافق على الزواج من أصله .... احم احم:DDDDD:
اولا انا ما ارضاش اكون السبب في تحطيم أسرة ، ولو حتى كان منفصل قبل ما يعرفنى ححس انى انا السبب، وأولاده حيحسوا انى الشريرة اللي خطفت بابا منهم ، طيب بفرض ان زوجته هى اللي وحشه ومعندوش اولاد اصلا هل أرضى ..... بصراحة مش عارفة ، بس الأغلب حكون مقلقة وحوافق لو بينا حب مقطع الدنيا ، بس من الأساس انا مش حسمح لنفسي انى احبه.

أى الأسماء تحب أن تسميها في حال أن انجبت ولدين وبنتين ؟
إيه الناس دي ، اتنين بس ؟!، أنا مش حقول الأسماء اللي اسميها لأولادي ما هو أبو العيال ممكن ميوافقش على الاسماء دي وأنا مهيضة الجناح وحستسلم :d
أنا بحب في أسماء الأولاد .... يوسف ، أحمد ، خالد ، عمر ، مصطفى
وأسماء البنات ..... مى ، منه ، منى ، مايا ، نيرمين ، ندى ، نهى
مش ملاحظين حاجة كلهم بحرف الميم والنون ... صدفة عجيبة بجد
وبسمة بردو بحبه أوي ... مش عشان حاجة والله ، بس بحس ان فيه تفاؤل أوي ، ما تسمايل بقى

:))

هل تعتقد أن توريث الحكم في مصر سيتم فعلا أم لا ؟
آه ، ربنا يستر ، واعتقد كمان انه حتقوم مجزرة لو الكرسي فضي ، بجد ربنا يسترها

لمين هتمرر التاج ؟

تحت حتعرف

ما هو أفضل انجاز لحكومة مبارك ، وما هو أسوأ عمل قامت به ... في رأيك ؟
أحسن : مترو الأنفاق و الكباري و مكتبة مبارك
أسوأ : سادسة ابتدائي ، عدم تطوير الثانوية العامة ، بيع ممتلكات الدولة ، حاجات كتير ، متعدش وخليهم ببركتهم أحسن .

***********

وده تاج من
Domalays
شكرا يا بشمهندس .. الله يكرمك :)

لو مكنتش مصري بس عربي كانت هتبقى إ يه نظرتك للمصريين واللي بيحصل في مصر دلوقتي؟
لسه فيهم شوية خير ، جدعان أوي ، ورجالة أوي بس في أوقات معينة ، صبورين أوووي أووي .
ممكن اقول حاجة حصلت في يومين ورا بعض وكأن ربنا بيبعتلي رسالة
الاولى خبطت في دكتورتحاليل - بمستشفى الطلبة بالجيزة- يحمل قلب انسان ... تصوروا والله عنده قلب مش جزار ، عمل معايا موقفين كويسين جدا ، بس للأسف مش عارفه اسمه ، على العموم هو طويل وايده خفيفة جدا وهو بيسحب العينة:D .... ربنا يكتر من أمثاله ويخليه على حاله .

تانى يوم بقى ، كنت مستنية صاحبتي عند رابعة العدوية ، وإذ فجأة الأقي رجل عجوز بجلباب أبيض بيسلم على أمين الشرطة اللي واقف .. بيسلم عليه بترحاب جامد ، والرجل الكبير قاله حقعد هنا وشاورله على رصيف داخل لجوه شوية ، وبعد دقيقتين بالظبط لقيت أمين الشرطة بيوقف الاشارة رغم انها المفروض متقفش لان العربيات كانت في نص الشارع و لا فيه تقاطع ولا حاجة ومش مكانها اصلا انها تقف ، المهم ، لقيت أمين الشرطة بيقف أدام أتوبيس كبييير وبيوقفه وبيقوم العجوز اللي كان قاعد وبيركبه الاتوبيس ، قلبي كان فرحان أوي ... كنت حاساه بيبتسم ابتسامة واسعة وجميلة .

لوكنت أوروبي أو غير مسلم هتبقي إيه نظرتك للعرب والمسلمين؟
أوروبي من انهي نوع بالظبط ، اللي الاعلام الغربي قدر يسيطر على مخه وينقله الصورة ببشاعة ولا الأوربي الواعي ؟!!

لوقالولك إنت بقيت رئيس جمهورية هتعمل إيه ؟
حسمح باستقبال رسائل من الشعب بشكاوي واقتراحات واقرأها كلها بنفسي
الاول الموضوع حيكون صعب ، وكل واحد من الشعب المصري كله حيبعت عريضة مش مجرد شكوى ولا اتنين .. حتى اللي مش بيعرف يكتب حيخلي الواد علي اللي راجع من الكتاب يكتبله الجواب ويبعته على عقر داري
وبعدين ححاول اختار الكفاءات وابعد عن اى واحد مشكوك في ذمته المالية وانتمائه لعمله
وحعمل مسابقة حلوة بين المحافظات، المحافظة اللي حتطلع أول الجمهورية وتزرع مليون شجرة وتقضي على الفساد في التعليم وبين الموظفين ويطلع منها حفظة قرآن كريم وتشغل أولادها وتسكنهم ، وكل ده بإيد الشباب اللي في المحافظة اصلا .. باختصار تبقى محافظة نشطة ناجحة ، حتبقى النتيجة ان اهل المحافظة دي يحملوا الوسام الذهبي ، ايه حوار الوسام الذهبي ، هو عبارة عن مفتاح بيسهل لهم كل اللي عاوزينه ، قضايا اهل المحافظة الفائزة سيتم الحكم فيها سريعا ، ورق متعطل لأهل المحافظة يخلص بسرعة ، يبقى من حق شبابها انه يدخل اى نادي ويشترك في اى لعبة هو هاويها بدون أدنى مقابل ، باختصار حنسهل حياة مواطنى المحافظة الفائزة ، طب التمويل اصلا حييجي منين ، حييجي من المحافظات الخاسرة ، يعني يلموا من بعضهم في سكات وهدوء بدل ما ....يعني حتبع مبدأ المنافسة
وحصلح التعليم واقضي على المنافقين واصلح سلوكهم وأدعي ربي اولا واخيرا انه يعينني على المهمة الصعبة جدا والخطيرة .
وحخلي فيه حرية صحافة .... واللي عنده كلمة يقولها عشان النفوس تصفى ومحدش يشيل من حد
وأعمل جولات حرة ميدانية استكشافية بدل التظبيط اللي بيحصل ده ... يعنى حبقى زى القضا المستجل ويلاقوني واقفلهم فوق نافوخهم .. بخخخ
وحعمل اعدام في ميدان عام واجيب مقصلة واطير رقبة اللي يستاهل .. عبرة لمن لا يعتبر
وححافظ على الدين في المدرسة ... نتعلمه بجد ، مش حصص الدين تبقى سلق بيض
والأخلاق كمان

لوسمح لك برؤية الرسول عليه الصلاة والسلام وإنك تقوله كلمة واحدة ؟
ينفع كلمتين؟؟
.
أراضي عني ؟

لو كنا في عصر ازدهار الأندلس كنت تتخيل نفسك إزاي ؟
أميرة بفستان من بتوع زمان :D
،اممممم بصراحة مش عارف

لو طلعت القمر هتكتب عليه ايه ؟
لا إله إلا أنت سبحانك اني كنت من الظالمين ... يارب حبني وارضي عنى

لو مررت التاج لحد وماجاوبش هتعمل ايه ؟
هععععع، صحيح اسم بلوجتي مش قادرة بس ده مش معناه انى مش قادرة بجد ، ده مجرد تمويه.

تمرر التاج لمين ؟
ما قلنا تحت حتعرف
*********
وده تاج تانى من د/ أجدع بنوته:) - وتاج تاني بردو من تشي .. شكرا يا بشمهندس

دخلت مجلس الشعب من أوسع أبوابه ، ايه هو رمز الانتخابي المفضل ؟
الكتاب

كنت تفضل الدخول مستقل أم تبع حزب معين ؟
مستقل

إذا دخلت مستقل ، هل توافق على التوقيع للحزب الوطني بعد نجاحك كمستقل ؟
تـــــــــــــــــــــــــــــــؤ

إيه أول حاجة حتعملها لنفسك و أسرتك ؟
حشوف بابا وماما عاوزين ايه واعمله
وحوديهم يحجوا من غير ما يقولوا
وحخلي اخويا يشتغل في شركة هندسية ويكون مستريح في الشغل عشان ما يسيبناش ويسافر
وحولع في المدرسة بتاعت ريم واحرق الاستف كله واجيب ناس تشتغل بضمير وبالذات مستر .... ولا بلاش ، ان الله حليم ستار ، وادخل اليوسي ماس في المدارس كلها
وحجيب أصحابي من برة ، حشدهم واحدة واحدة واوفر لأزواجهم شغل كويس أوي بدل الغربة وبكده تكون صحباتي جمبي
وحعين خطيب صديقتي العزيزة في طب عين شمس بدل بني سويف عشان ماتسافرش وتبعد عني
وحسأل على كل الناس اللي متقدمين لصحباتي وأتاكد من اخلاقهم ومن انهم فعلا بيحبوهم مش عاوزين عروسة والسلام .
وافتح جورنال لصحباتي المتشحورات ... صحفيات المستقبل وأوفرلهم جو كويس للشغل وحخليهم عضوات في النقابة .... ادعولي بقى يالا ... بصوت أعلى شوية إذا سمحتي منك ليها

بدون ذكر اسم الدايرة ايه المشروع اللي ناوي تعمله لأهل دايرتك ؟
بالضبط نفس اللي حعمله وأنا رئيس جمهورية
بس المسئولية حتكون أقل والضغط حيكون أخف.

قعدت في المجلس جنب نائب مميز .. من هو ؟
د. حمدي السيد

قدمت سؤال للحكومة ، ايه هو السؤال ؟
ليه يا حكومة لما فزنا بكأس الأمم الافريقية السنة دي ، الناس نزلت اتنططت ف الشارع ، اللي ليه في الكورة واللي مالهوش ، حتى البنات اللي عملوا احلى شو وأحلى شغل ، وليه يا حكومة السنة اللي قبل اللي فاتت لما عبارة السلام 98 غرقت وكان في نفس توقيت المباريات ولما فزنا بردو نسينا العبارة وانشغلنا بالفرحة.... يا ترى يا حكومتي ده نابع من ان الناس زهقانة وطهقانة وكرهت العيشة واللي عايشيها وبيدوروا على متنفس وما صدقوا حاجة تبسطهم وتفرحهم ... يا ترى ليه يا حكومة يا مبجلة، وايه اللي وصلهم للمستوى ده ؟!!!

استجواب لوزير ، وليه ؟
وزير التعليم سواء عالي أو عادي
نشيل سادسة
حط سادسة
ثانوية عامة 3 سنين
لأ سنتين
نظام جديد مختلف
امتحانات مختلفة
نظام تصحيح مختلف
98 % معرفتش ادخل طب عين شمس ، لأ رحت الزقازيق
ألا صحيح ، هو ليه الشباب بقت هايفة ودماغها فاضية ، هو ليه بمجرد انى بخلص امتحان سواء ثانوية عامة او غيره بنسى كل اللي درسته ،؟ بمجرد تسليمي لورقة الاجابة ، هى المذاكرة ليه كابوس وقضى على قلبنا ، ألا صحيح هو ده تعليم ولا دي مقررات ؟؟؟

طلبين احاطة موضوعهم ايه وتقدمهم لمين ؟
هو ليه مفيش حرية صحافة في مصر
هو ليه خريجي قسم الصحافة بكلية الاعلام مالهمش حق الالتحاق بالنقابة زيهم زى البشمهندس اللي بيتخرج وبيلتحق بالنقابة فور تخرجه .

هى ليه القضايا بتقعد في المحاكم كتير لحد ما الفيران تقرقض الورق وتاكله
هى ليه الناس عندنا مالهاش قيمة .. فيه منهم كتير ، ولا بتضحوا بيهم لله وللوطن

هل انت مع الخصخصة ؟
مينفعش اقول يا آه يا لأ ، كل حاجة ليها ميزاتها وعيوبها
الخصخصة يعني اني انقل ملكية الحاجة للقطاع الخاص، ليها مميزات زى مثلا التحسين في المنتج وبيبقى الموضوع مش مال سايب ، عيوبها مثلا الاستغناء عن عمال وتحكم الادارة فيهم .
جميل جدا ، طب الحل ايه ، الحل ان الدولة تبيع الشركة آه ، بس ما تشيلش ايدها من الموضوع ، فيه قوانين الحكومة تحطها تضمن بيها حقوق العاملين وتختار ادارة كويسة مش .......
باختصار : الخصخصة نظام كأى نظام به مزايا وعيوب ، بس الفيصل تطبيق النظام بأى كيفية

هل انت مع قطع العلاقة مع اسرائيل ؟
أنا مع انى اقف وقفة رجالة انا والعرب ونقول لأ ، كفاية بقى لحد كده واللي عملتوه في اهل فلسطين وفلسطين
مع انى اهدد وتهديد حقيقي اما الارض اما الحرب
احنا أقوى .. عندنا هدف وإيمان

هل تؤيد الحرب على العراق ؟
بكل تأكيد لـــــــــــــــــــــــــــــــــــــــــأ

هل تؤيد مرور الأمريكين في الفناء ؟
مش بنستفيد لما يمروا ، ايه المشكلة بقى ؟!!

بتمرر التاج ده لمين ؟
تشي السعيد-كيكوووووووو-جيسي .. طبعاا وتجاوبي عليهم يا طنت ماتحوشهمش-محمد صبحى-اجدع بنوتة
-كفاية طيبة.. بصي يا منى لفي على البلوج وحملي كل التاجات اللي فيه وجاوبيهم بالشفا في البلوج مش السبيس
يا مراكبي-بسبس الروح-شيماء الجيزى-خالو احمد الصباغ-والقادم اجمل-كراكيب عادل-اسامة يوسف-الاستاذ-علوة اللي جنب الشباك-الاصيل-غمض عينيك-كراكيب عادل-Kimooz-Domalays-a.samir-no fear
-Van gogh-Kimexlilo-Dr- online-Doda-Aya
اللي جاوب على واحد قبل كده يجاوب على الباقي
سلاماتي:)
وبالشفا

عقل بيجنن

2008-01-26T01:03:00.001+02:00

بسمة ، فيه نقطتين ، لو اتأكدنا منهم حقولك اتكلي على الله ، أولا مقتنعة ؟

لو على دماغي أو عقلي لو فكرت بيه حتلاقيني مقتنعة أو بمعنى أدق هو ده المنطقي اللي المفروض يحصل ، انما لو جينا للي أنا عاوزاة

ها ؟

لو جينا لنقطة أنا عاوزة ايه حتلاقي الموضوع يختلف ، بس المنطق بيقول عكس كده ، هى دي نقطة الاختلاف .

وهو ده اللي حيرجعنا لنقطة الصفر

عارفة ؟ ،المشكلة دي كانت في أنف وثلاث عيون ، كانت واحدة من البطلات ماشية باحساسها ، اللي تحس انها عاوزة تعمله بتعمله ، بس البطل قالها جملة جامدة جدا ، قالها أن البشرية ما تقدمتش الا لما كل واحد قدر يسيطر على رغباته ميمشيش ورا احاسيسه ، وأن حياة الانسان مش قائمة على احساسه وأن الانقياد للاحساس يعتبر فوضى وانحلال ، يعني مثلا لو حسيتى أنك عاوزة تقلعي هدومك في الشارع حتقعلي ؟، ولو أنا جالي احساس انى عاوز اقتل حد حروح اقتله ، الانبياء والفلاسفة والمفكرون مقدروش يعملوا االي عملوه إلا لما قاوموا غرائز البشر وسيطروا على احساسهم

المشكلة انى بردو في نفس المشكلة ، وكان أدامي اختيارين ، وجربت الاتنين فعلا ، بس فشلت ووصلت لمرحلة اني اسيب الموضوع من غير تخطيط وما اعملش حاجة ، يحركه الله كيفما يشاء

مينفعش

عارفة ، لان الازمة حتتعقد اكتر

كمان لو كل انسان فضل ماشي من غير تخطيط مش حيعرف يعمل حاجة ، عمر طاهر قالها ، أصعب حاجة انك متعملش حاجة لأنك مش حتبقى عارف حينتهى امتى .

**********

حتقولولي ان الوسط هو الحل ، بس مشكلتي اني عقلانية أوي زيادة عن اللزوم ، حتى الاعتقاد بعدم وجود جزء يقع في الجانب الأيسرخلف الفقص الصدري مهم وحيوي لحياة الانسان ما ان توقف توقفت حياته، حتقولولي العقل نعمة ، حرد عليكم بس الحاجة لما تزيد عن الحد بتتقلب للضد وبتتحول لنقمة ، ماما دايما تقولي أن العقل الزيادة بيجنن وبطلي تفكري بعقل أوي .

العقل الزيادة يعني ضمير مستريح أوي ، بس ضغط على نفسي أوي أوي
مشتت ما بين انك عملت اللي المفروض والمنطق بيقول عليه ، وبين اللي انت عاوزة
أنا عندي قدرة غريبة على انى أضغط على نفسي وأخليها ترضخ لصوت العقل والمنطق .. بس خايفة من ثورتي على نفسي ، لأني ساعتها مش حرحمني .

هى قليلة الأدب ...؟!!

2007-12-07T08:41:00.001+02:00

دي بنت قليلة الأدب ... اهلها ماربوهاش

صحيح فعلا ... ان كان عندها أهل أصلا عشان يربوها ... دي سفالة

( دول كانوا تعليقين من راجل وست قاعدين ورايا )

والله جدعة .. ما هى لازم تدافع عن نفسها ... يعني تتضرب وتسكت عشان يقولوا عليها مؤدبة

( وده كان تعليق البنت اللي راكبة جمبي )

كل هذه التعليقات على فتاة تقود سيارة ، أمامها سائق تاكسي توقف" فجأة" مما أدى إلي ارتطامها بالتاكسي وارتطام سيارة خلفها بها .

نزلت البنت والرجل الذي ارتطم بها للشجار مع سائق التاكسي الذي توقف " فجأة " ، ونزل أيضا سائق التاكسي ولكن متجها إلي شنطة العربة لاخراج الكوريك ومحاولة ضرب الفتاة على دماغها ، ناهيك بقى عن شد شعرها .

ما هو أصله مش عارف يتشطر على الراجل فبيضرب البنت ... ولكن قامت الفتاة بإعطائه علقة - حيحلف بيها طول حياته - والدفاع عن نفسها .

يا ترى البنت وقحة وقليلة الأدب وبجحة وأهلها معرفوش يربوها ده إذا كان عندها أهل أصلا !!!

ولا نرفعلها القبعة ونحييها لأنها دافعت عن نفسها في ظل وجود رجال " وقفوا يتفرجوا "!!!!

يا ترى كانت تدافع عن نفسها أصلا وتعتبر وقحة في نظر الغير ولا ما تدافعش وتتضرب وتتبعثر كرامتها من أجل أن ينظر إليها الناس باعتبارها البنت المؤدبة الضحية الرقيقة

ثواني ... قبل ما تدي حكم عليها ... حط أختك أو خطيبتك أو زوجتك أو حتى بنت الجيران مكان البنت دي ... كده بقى تقدر تدي حكمك :)

*************

البوست ده بمناسبة سؤال في تاج- تاج ليلى- بعتتهولي بسبس الروح

سلام عليكم

4×1

2007-11-20T01:12:00.002+02:00

عارفين العقاب ؟

مش عارفينه

اقروا اللي جاى وانتوا تعرفوا

******

ده تاج من محمد صبحي - تخاريف

شكرا محمد .. الله يكرمك

امتى قلت لنفسك يا ارض انشقى وابلعينى ؟؟
مش فاكرة بجد ، المواقف المحرجة كتييير وأنا مصيبة اصلا وما ببطلش

***
مين هو مثلك الاعلى ؟؟
ماما ، بحاول اتعلم منها الهدوء ومعالجة المشاكل ببساطة، يااااااااه وتصبيري على الابتلاء والبلاء والأمل

، وعدم النرفزة على الفاضي والمليان ، وجملتها دايما " خلي أملك في ربنا كبير".

**
هل انت راضي عن نفسك و عن حياتك و عن شغلك ( أو دراستك )؟؟
نفسي وحياتي بمنتهى الصراحة نــــــــــو ، عشان نفسي أحقق حاجات كتير أوي ، ومش بتخذ أى خطوة إيجابية ، عشان ممكن أكون مترددة كتير ، ومش عارفة أنا عاوزة إيه بالظبط ، عشان متخبطة وببدأ في مليون حاجة وبسيبهم من غير ما يكملوا ، عشان عندي سلبيات كتير أوي لسه مغيرتهاش ، عشان مقصرة مع ربنا أوي وعارفه انه زعلان مني أوي .
دراستي ، كنا واخدين بعض عن حب ، بس طلع حب من طرف ثالث ، لا بجد ، الدراسة متعبة والتكليفات مابتخلصش ، الصحافة بشكل عام مرهقة وعاوزة حد بلطجي ونفسه طويل .

***
ايه هو احسن مسلسل كرتونى بتحبه ؟؟
توم اند جيري ، عهد الأصدقاء ، أنا وأخي.

*****
ايه هو احلى خبر سمعته وايه أسوء خبر ؟؟
عادة بيبقى أحلى خبر أن سامح ينجح – بجد ببقى قلقانة أوي واللي بيتعبني اكتر قلق ماما ، ادعوله بقى بكالوريوس يا ناس .
وأسوأ خبر سمعته كان في التليفون خبر غرق ابن خالتي الله يرحمه الصيف اللي قبل اللي فات .

*****
بتحب السفر؟؟ ليه ؟؟
جدا جدااااااااااااا ، كنت لسه بقول لصاحبتي وكنا ساعتها في اسكندرية ، بقولها انا عاوزة اتجوز رحالة ، اتعرف على ناس جديدة وحاجات مكنتش اعرفها وأشوف أماكن غريبة وجديدة ، ده بيدي خبرات عالية ، وبيوسع المدارك وبيكبر العقل .
*****
أيه أكبر مشكلة قابلتك فى حياتك وازاى اتصرفت فيها ؟؟
عادة بيكون الاستخارة هو الحل الأمثل ، وانك تقعد تعيط وانت بتكلم ربنا ، قعدة صلح ، وكمان عشان أحل مشكلة بالنسبة ليا ، بعمل كأن المشكلة بتاعت واحدة صاحبتي أو بنتي أو اختي ، والمفروض انها تتصرف بالشكل الفلاني ، وده لأن ريس الشط شاطر ، والانسان لما بيكون في مشكلة مش بيفكر بشكل عقلاني ومنطقي ، حتلاقيه بيفكر في جوانب ويسيب اخرى ، وحتلاقي عوامل كتير مؤثرة ، وبالتالي قراره لن يكون بالشكل الدقيق المطلوب .
دلوقتي أنا بقى في مشكلة ، تقدروا تقولوا مشاكل ، كنت اتمنى أنها تبقى مشاكلي وإني أكون طرف فيها عشان القرار يبقى بإيدي – بس للأسف مش مشاكلي أو بمعنى أصح القرار مش بإيدي لأني طرف متخفي
وبالتالي انا تعبتتتتتتت ........ ادعولي اعرف اتصرف أو ربنا ينهيه على خير .. المهم يبقى خير
***
يا ترى أحسن صدفه حصلت في حياتك ؟؟
لسه محصلتش

*******
اية هى الامنية اللى نفسك تحققها ؟؟
حاجات كتير ، باختصار ، الحاجة اللي تخليني راضية عن نفسي وربنا كذلك .

*****
بتثق فى اصحابك قد اية ؟؟
من الصعب انك تكتسب صداقتي
بس من السهل مادام بقينا اصحاب انى اثق في اللي ادامي بشكل غبي.
********
خانك صديق قبل كده ؟؟
خيانة بمعنى ماذا ؟؟ ، عندي الصداقة دي اهم حاجة في الدنيا
انسان بدون صديق انسان بدون هوية
خاني يبقى مش صديق
ينزل من حساباتي واعمله ديليت
********
عملت معاة اية ؟؟
مش من النوع اللي بيبكي على حد - على رأى ماما - "أنني بياعة " ...بعتني ببيع وساعتها بيبقى معنديش تفاهم ، بس أنا عمري ما ببدأ بالبيع ، يعني باقية حتى الرمق الأخير .

****
كرهت حد كنت تعرفه قبل كده ؟؟
لا، الحمد لله، معنديش استعداد مدخلش الجنة عشان خاطر بكره حد
ممكن اكون بتضايق من حد ، بتخنق منه، استغربت من تصرفات حد ، بس اللي اكتشفته ان كل إنسان فيه جانب طيب ، الجانب ده مش بيبان إلا في لحظات الصفا والتجلي والمناسبات ، مش بيظهر لأن الجانب الشرير هو اللي بيستخدمه اكتر.
بس ده ميمنعش ان فيه عالم عاوزة الحرق ، عالم رخمة ومؤذية .

************
موقف عملته و حسيت أنك ندل فيه ؟؟
كان عندنا عصفور عسول " كوكيتو " ، في الوقت ده ظهر انفلونزا الطيور بمصر وكان ساعتها الموضوع سخن أوي و المرض منتشربشكل فظيع وناس بتموت - رعب يعني – أنا بقى وبلا فخر قلتلهم يا أنا يا البتاع ده في البيت وعملتلهم كالو في نافوخهم وخليت بابا يطيره – طبعا طبعا أكيييد وقع لانه مش بيعرف يطير ، ماما بقى قعدت أسبوعين في السرير ده غير الاكتئاب ، وأخويا قعد فترة مابياكلش ، عارفة إني شريرة ، اللي فكرني بقى بالموضوع ده انهم من كام يوم جايبين كتاكيت شيري ومش عارفة مين تاني وأسماء دلع خالص – يا أنا يا البتوع دول في البيت ، وأخلي بابا يسرحهم ... نياهاهاهاهاها.
بمناسبة الندالة ، كنت بتكلم مع انتيم 2 وبقولهم حاسة أن اللي بيني وبينك زعلانة مني وأنا عارفة إني مقصرة معاها ومع البشر كلهم و مابسألش ، ردت عليا وقالتلي خلاص احنا اتعودنا منك على كده بس هى لسه مااتعودتش حتاخد وقتها وتتعود – من موقعي هذا بصالحهم كلهم ، وبصالح منى .. مومو اللي

قالتهالي صراحة " أنتي مش من النوع اللي بيسأل " ، شكرا

*****
ايه أكتر يوم بتحبه فى أيام الاسبوع ؟؟ وليه ؟؟
سبت ، اتنين ، اربع ... اشمعزى ؟ ... ماخبرش

****
ايه أكتر حاجه بتعجبك فى شخصيتك ؟؟ وايه اكتر حاجه بتكرهها ؟؟
بيعجبني فيا : الإصرار ، مادام حطيت حاجة في دماغي يبقى بعملها حتى لو قتلت نفسي - بس ده لو أراد الله،
وكمان النظام ... منظمة جدا .
مش بيعجبني بقى : لما بكون زعلانة من حد مش بطيق اكلمه – ولا حتى صباح الخير ، وحاجة كمان مقتنعة بمبدأ غلط بيقول " ما لا يدرك كله يترك كللله"... يعني لو الموضوع خرج من إيدي تخرج كل المواضيع معاه ، لو حاجة ضاعت كله يضيع .
طبعا العيب ده متناقض تماما مع الميزة اللي أنا شايفاها بنفسي ( الإصرار) ، في وقت ما بتلاقي نفسك تخرج من مشكلة تقع في واحدة أكبر ، مش عاوزة اقول اني ممكن اسيب الحياة بايظة وأقعد اتفرج عليها ، يمكن باخد هدنة ، يمكن ببعد شوية وبفصلني عن المشاكل عشان أعرف أركز وأفكر ، يمكن حاجات كتير أنا مش عارفاها ، بس اللي أعرفه إني مرة واحدة بقوم على كل البلاوي قومة 20 رجل وأقضي عليها ، حد فاهم حاجة ؟؟
**************
ايه اكتر شعب بيعجبك ؟؟ واكتر شعب مش بيعجبك ؟؟
مش حقولك المصري ومش حقولك غيره لانى ماعاشرتش غيره
بس اللي حقوله انى بحب استراليا والمانيا جدااااا

****
اكترحاجة بتحبها فى حياتك عامة ؟؟
ماما ، اصحابي ، إني اتعرف على ناس كتير " بس يكونوا بني آدمين بمعنى الكلمة ، يستاهلوا كلمة بني آدمين يعني" ، إني فاهمة " أنا " .

*****
واكتر حاجة بتكرها ؟؟
المرض ، الوحدة ، الكدب ، حد يستهزأ بأفكاري ودماغي ، الفراغ ، الكسل، حد يترجم كلامك غلط ويفهمه على هواه .
*******
وايه المكان اللى بتحب تروحه على طول لما تكون زهقان؟؟
البحر، وأودتي ( صومعتي) ، المكتبة ( مبارك ) ، مكتبة (بيتنا ) و ذلك لاستخراج ( اضحك للدنيا ) ، لما الأعداد تبتدى تطلع من مكمنها وتلاقيها على السرير و المكتبة هنا يمكنك أن تدق ناقوس الخطر وتقول ربنا يستر عليا – على فكرة الأعداد حاليا طالعة من مكمنها بقالها فترة ... دعواتكم بقى .
******
ايه هى رياضتك المفضلة؟؟
المشى ، والعجلة بتاعتي .

******
أيه هي نظرتك للدنيا؟؟
مش عارفة ، بس انا عقلانية شوية وواقعية شويتين ...استنتجوا انتوا نظرتي حتبقى إيه ، بس انا بحاول أبص للنص المليان من الكوب وبدعو للتفاؤل ..سمايل بقى J .
واحيانا بحاول اطبق جملة قالها حازم الحديدي في اضحك للدنيا ... " سأحاول قدر الامكان أن انفعل بمنتهى الهدوء، واصرخ بلا صوت ، واغضب وعلى وجهي ابتسامة عريضة " .
*******
أيه أكتر اغنية بتحبها وبتهديها لمين ؟؟
( وأنت جمبي) لمحمد فؤاد بهديها لمنى ... مومو ، حدوتة مصرية لمحمد منير، الطريق الصح ( بهدي الأغنية دي ليا) ، الدنيا حلوة ( نانسي عجرم) ليا بردو .
****
التاج دا هتمرره لمين
تحت حتعرف
*****************************************

وده تاج من تشي السعيد

يارب تبقى مبسوط على طول
مين اول شخص عرفت أنك بتحبه, يعني انك نفسك يبقي معاك علي طول, و نفسك تبقي مثله؟؟و ليه؟
ماما ، عشان بحبها وعشان هى صاحبتي ، وعشان هى فاهماني – ربنا يديكي الصحة يا أغلى حاجة في حياتي .

*************
أمتي أول مرة قلبك اتحرك ناحية بنت (للولاد), او ولد (للبنات)؟؟, يا ريت تحكي عن المرة ديه شوية
نفهم بس كده الأول يعني إيه سؤالك ده عشان أسئلتك حتطلع فشنك معايا ، حب ولا اعجاب ولا انبهار ولا شفقة وعطف ولا محاولة لإنقاذ احدهم ، ما انا ممكن اقولك اني منبهرة جدا بإعلامي ما- أد جدو - ، بتابع برامجه وبضحي بمعاد نومي عشان اتفرج على برنامجه ، وأول ما بينزل كتاب بجري اشتريه ، ممكن اسأل سؤال مضايقني .... هو ليه لما نقول انا بحب فلان ، يفهموها بمعنى غلط ، يعنى انا مثلا بمووووت في احسان عبد القدوس ، معناها انى بحب الراجل ككاتب ، وبحب اقرأ له ، موصلتش لدرجة التوحد مع الشخصية ، وانك تقعد بقى تفكر فيه ليل نهار ، ومش بعيد ينزلك من الحنفية ، ليه الترجمة بتكون غلط .
*********************
امتي أول مرة تشوف اثنين بيحبوا بعض, و قلت هو ده الحب بجد؟
كان فيه جدو وتيتة – مش بتوعي ، للأسف معنديش جدو- قاعدين على البحر ، وكانوا بيفتكروا أيام زمان ، وبيقرأوا الجرايد مع بعض – مش واخدين بالكم انتوا ... جدو و تيتة مثقفين .

******
كام واحدة حبيتها في حياتك ( للولاد ), و كام واحد حبتيه في حياتك ( للبنات ), و القصد حب مش شرط بجد؟
صفر

******
كام شخص منهم كان نفسك تكمل معاه حياتك؟
زيرو
******************
طيب و امتي عرفت مين حبيته بجد و مين لأ؟
من ساعة ما اتولدت وهما بيقولولي انك كنتي لازقة فيها على طول ... تروح المطبخ وراها ...البلكونة وراها ...ده حب فطري ... أقصد مامتي يعني .

****
ايه مقاييس الحب الحقيقي بالنسبه ليك/ليكي؟
الحب الحقيقي بيعيش يا حبيبي بيعلمنا نسامح بينسينا امبارح بيعلمنا نفكر دايما في أيامنا اللي جاية ، ولو نبعد ثواني .... مش فاكرة إيه تاني ، بس كلماتها حلوة وواقعية ومعبرة.

عندي مبدأ كتير مخالفني فيه ، بس انا معتقدة فيه ، وهو ان الحب مش بييجي خبط لزق ، يعني انا بحبك ... ، اوك ماشي بتحبني ليه ، اكيد فيه سبب ، والمفروض انه يكون سبب مقنع ومنطقي ، وده مش تشكيك في الطرف الآخر ، ولكن محاولة للتأكد من صدق المشاعر ، مش ممكن يكون البني آدم واهم نفسه عن طريق نفسه انه بيحب وبيسهر الليالي وعايش الدور ، وهو ولا بيحب ولا يحزنون ، هو مش قصده هنا يخدع الطرف الآخر ، ولكن هو نفسه مخدوع في نفسه ، ومش عارف يحدد بصدق وصراحة وبالتالي بيعيش الوهم ، مش بيقولك اننا لانرى الأشياء على حقيقتها ولكننا نراها كما نحب أن نراها .

الحب الحقيقي ، اللي هو مش لعب عيال وهزار ، اللي هو مش تضييع وقت ، يعني تحمل مسئولية ، ومسئولية كبيرة أوى ، مسئولية تحمل المسئولية .

*****
هل الحب بيدوم علي طول؟
آه بيدوم إن شاء الله ، بس يكون عند الاتنين الاصرار انهم يكملوا مهما كانت الظروف ، ويكون كمان كل واحد فاهم انه أكيد فيه مشاكل وتقلبات للشخصية لذا لابد من أن كل واحد يستحمل التاني ، لما اتسأل احمد بهاء الدين عن النقطة دي في كتاب نوال مصطفى" أقلام وكتاب" قال أن الزواج بيقتل الحب لما الاتنين يكونوا لابسين أقنعة ، والأقنعة دي بيلبسوها مش بغرض الخداع ولكن بغرض إظهار أفضل ما لدى كل منهما ، ولما بيحصل زواج وبيقعدوا مع بعض 24 ساعة في اليوم بيلاقوا حاجات مكنوش عارفينها عن بعض وبتسقط الأقنعة وبالتالي قد يحدث نفور من جانب احدهما .

كان فيه سلسلة كتب اسمها " شوربة دجاج " لمجموعة كتاب ، المهم ، عجبتني اوى نصيحة سيدة تدعى جين ويلز أعطت تلك النصيحة عام 1866 ، ولكنها تصلح الآن ...." اجعل حبك أقوى من الكره والغضب ، وتعلم حكمة التوفيق ، فالانحناء قليلا خير من الانكسار ، وفكر فيما هو حسن عما هو سىء، فللناس أسلوب للحياة يخاف رأيك فيهم ، وتذكر أن الصداقة الحقة أساس علاقة مستمرة ، وأن الشخص الذي تختاره للزواج يستحق منك أن تعامله بمودة ولطف ملما تعامل أصدقاءك ".

******
في نظرك, يعني ايه اتنين بيحبوا بعض بس مش بجد؟
يعني تضييع وقت ، وقتل نفس ، وتعذيب .
*******
للمتزوجين فقط؟انت لسة بتحب مراتك؟ طيب فاكر واحدة من اللي قبلها ولا خلاص؟
مش تبعي
************
ايه مفهوم الغيرة عندك؟
هههههههههه ، بضحك على ماذا ..؟ ، ماما لسه حالا بتقول الغيرة وحشة ... لسه حالا وأنا بكتب الكلام ده ، طب بتقول كده ليه ، بتقوله لأنها بتتفرج على مسلسل " حق مشروع " وفيه تقريبا أخ قتل أخوه عشان غيران منه لأن ابنه راجل وهو معرفش يربي ابنه – والعهدة على الراوي .
فعلا الغيرة وحشةو، واللي يزيد عن حده يتقلب ضده ، الغيرة يعني اني ما أخليهاش تزيد عن حدها وساعات بتقلب معايا ببرود .
فيه مقولة بتقول " إذا لم يكن جبك إلا رغبة في الامتلاك ، فإنه ليس حبا ".

*****
ايه مواصفات البنت/الولد(للبنات) اللي انت نفسك تكمل حياتك معاها؟
يااااه مش حرد غير بالدعاء ده
" اللهم ارزقني زوجا صالحا تقيا نقيا ورعا لا يخاف في الحق لومة لائم ، يكون لي سكنا في الدنيا و الآخره ، ويحبني كحب سيدنا محمد " ص" للسيدة خديجة ، ويكون في قوة عمر بن الخطاب رضى الله عنه ، ورقة أبا بكر الصديق رضى الله عنه ، وجمال سيدنا يوسف وتقواه عليه السلام" .
*******
و هل لاقيت ده موجود في البنت/ الولد اللي بتحبها حاليا؟
مفيش عشان ألاقي
*******
هل الحب حرام؟, قصدي الحب يعني بنت أو ولد بتحبه و هو بيحبك و علي اتصال و علم بالحب اللي بينكم
حرام ازاى يعني ، مش فاهمة ، مادام علاقة طبيعية ، في الاطار المتعارف عليه وفقا لتقاليدنا المجتمعية وعاداتنا وديننا قبل كل شىء يبقى مش حرام ، انما لو علاقة عارفة انها مش حتستمر ومجرد تضييع وقت ده يبقى اسمه لعب عيال ، وحرام جدا ، يعني مثلا لما يكونوا 2 على علاقة معرفة والموضوع تتطور وهما الاتنين بيوهموا نفسهم ان الموضوع فل والحياة بمبى ، بس الحقيقة بقى ان حتلاقي مبررهم لأنفسهم بأن انا كده مبسوط / مبسوطة ، وكده كده عارف / عارفة ان العلاقة حتنتهى ، وبالتالي اسيب النكد لبعدين ، هنا معنديش تعليق غير ... لا حول ولا قوة إلا بالله .

*********
صف نفسك كمحب في كلمه او جمله صغيرة
مخلصة للأبد
*********************************************

وده تاج من بسبوسة بسبس الروح

شكرا يا بسمة ... بجد ربنا يكرمك ومشاغل الشغل تنتهى
هل انتى سعيدة كفتاه فى مناحى حياتك؟
الحمد لله ، لو لم أكن أنا لوودت أن اكون أنا
*****************
هل تحبين نفسك أم تتظاهرين بالقوة ؟
انا بحبني جدا ، وأنا غالية عند نفسي أوي لدرجة بشعة ، ولا أتظاهر بالقوة ولست بضعيفة ولست بقوية ، ولكني عادية ، بس أقدر اقول ان فيه مواقف بتتطلب اظهار شخصية جبارة ... يعني حسب الموقف اللي أدامي ، بس أنا في العادي عادية ..... يعني ما بشتغلش نفسي .
*****************
هل تعرفين دورك فى الحياه أم تتسابقين وتلعبين أدورا مرسومة فقط ؟
آه ، اعرف أدواري في الحياة ، أخت لأخي الأكبر ولأختي الصغرى ، وابنه لأب وأم وصديقة لكليهما ، ، وصديقة لأصدقائي ، وأنا لأنا

*******************
هل مستعده أن تدافعى عن وجهة نظرك عموما أم تجبنين عند المواجهة ؟
لا ، بدافع عن وجهة نظري جدا ، بس ده لايمنع ان هناك من المواقف والتي لا يجدى فيه اظهار وجهة نظرك والدفاع عنها، وده لأن الطرف الآخر بيكون مش شايف غير وجهه نظره هو حتى لو قدمت الدلائل والبراهين ، وفي الحالة دي الشعار اللي برفعه " اطلع من دماغي " .

****
وهل ترين جبنك صفة شخصية ام يغذيها من حولك؟
مش جبانة

***********
ما مشاكل ليلى الملحة في المجتمع من وجهة نظرك؟ ما مصدرها؟ هل يمكن حلها؟ وهل عندك موقف شخصى من واقع الحياة؟
ليلى مشاكلها مازالت موجودة ، فيه حقوق كتير اوى هى مش واخداها ، فيه نظرة مجتمع لا يمكن تتغير إلا بحدوث معجزة من السماء ، مصدرها التراكمات القديمة لشكل المرأة في المجتمع ، الموضوع بيقل تدريجيا بمرور الزمن ، بس على ما يختفي نكون احنا متنا .
آه ، فيه موقف انا شفته ، حييجي في بوست منفصل قريب ان شاء الله .

*******
هل تري المرأة اقل من الرجل في اي مستوى من المستويات؟وان كان فعلا فما هي هذه المستويات؟
آه ، اقل طبعا ، الرجال قوامون على النساء ، فيه حاجات المرأة متقدرش تستحملها وده لانها خلقت رقيقة ، كائن هش ، بعكس الرجل ، ايه هى المستويات دي ؟، مش قادرة احدد على وجه الخصوص .

******
هل يساهم الأعلام فى ترسيخ صورة نمطية عن المرأة ؟ وكيف ترين معالجات قضايا المرأة وتأثيرها فى المجتمع؟
آه ، بيساهم للاسف ، بيقدم المرأة اما في صورة ربة المنزل اللي مش متعلمة ، او اللي بتخون جوزها ، أو فتاة ليل أو بنت دحاحة اوي وبنضارة ، أو شخصيات أبعد ما تكون موجودة في مجتمعنا... معندهمش وسط .

*******
بعد مرور سنه من يوم ليلى الأول ماذا تغير فى وضع ليلى ؟
ليلى مازالت تعاني ما تعانيه ، نظرة المجتمع مش بتتغير بين يوم وليله ولا بين سنة و اتنين ، فين احنا وفين ايام عائشة عبد الرحمن وغيرها ، ان شاء الله خير .

*******
ماذا تغير حولها فى الشارع كالظروف والمشاكل فى مصر بالنسبة للبنات والسيدات صارت أحسن أم اسوأ ؟

فيه حاجات كتير اوى غلط ، صارت اسوأ

********************************
وده تاج من عليوه

حلوة فكرتك وتاجك

بس مش حنشره.. لأن صاحبه مش موجود

يعني التاج مش موجهه ليا

تفتكروا صاحبه ممكن يشوفه

؟؟؟؟!!!!

********

التاجات لمين؟؟

مش حقول لأى حد عاوز ياخدها ، لأن مفيش حياخدها بالطريقة دي، بس حقول لكل اللي عمل كومنت عندي ياخدها راسا.. يالا مش عاوزين دلع ... دي عقاب

****

سلام عليكم

احنا لازم ننفصل ...!!!

2007-11-03T12:27:00.000+02:00

"احنا لازم لازم ننفصل وكل حى يروح لحاله"

هكذا بدأ كلامه معها ... قالها بدون إحساس ناظرا إليها بوجه كماسك خشب وجه بلا تعبير .. عيون باردة بلا مشاعر أو أحاسيس

قالها وكأنه يتخلص من هم جاثم على قلبه

قالها وهو يحس أن كل خلية من خلاياه تنطق بها

قالها ..... و ارتاح

أما هى

فكانت واقفة كالصنم لاتدري بأى شىء ترد أو حتى بأى شىء تشعر

حالة من " الازبهلال " و اللا إحساس مرت عليها

لم تستغرق تلك الحالة سوى بضع ثواني

ولكنها أحست كأنها سنوات

نعم سنوات ...سنوات أضاعتها مع وغد كهذا

سنوات من عمرها كانت تعتقد انها أجمل السنوات

أفاقت من حلم كبير أو لنقل وهم أكبر

لتجد نفسها على أرض الواقع

تذكرت مقولة عبد الوهاب " أنا من ضيع الأوهام عمره "

تمنت لو أن يتحقق قول أحمد رجب وهو " ماذا لو أننا خلقنا أولا كبروفة نتعرف بها على الحياة حتى نتجنب الجهل والأخطاء والندم "

كل هذا دار بخلدها في أقل من نصف الثانية

أما أنا

فنصيحتي

حبيبتي ...آنستي

من أضاعني أضعته ومن تركني محوته

لن أحزن لفقداني شىء كهذا ولكني سأحزن على نفسي

ليس على سنوات اضعتها من عمري وليس على اقتراني بهذا المخلوق ولكن شىء واحد فقط " ..... اختياري الخاطىء"

حبي المريع منتهى السعادة ألا تأسف على ما مضى وعلى ماليس لك فيه حيلة

حبي الفظيع تذكري دائما إذا ابتسم المهزوم أفقد المنتصر لذة انتصاره

حبي البشع تذكري أيضا ألا تشتري من باعك وحذار من أن تحزني عليه

حبي الشنيع ليكن في ذهنك دائما قول الشاعر العظيم " اللي مش عارفة هو مين " أنا اللي يبيعني أبيعه ولا أبكي في يوم

عليه"

البوست ده إهداء

إهداء لصديقتي التي تركت دراستها وكليتها من أجل الزواج ... والنتيجة عادت إلي الدراسة تحمل لقب " م.. ط ... ل.. ق... ة"

إهداء إلي صديقتي المخطوبة والتي وصلت خلافاتها مع خطيبها إلي الذروة وحجتها في الإستمرار " انا مش ضامنة ألاقي حد تاني" وكأنها تدبيسة

و إهداء أيضا إلي كل من سولت نفسه لأن يحزن على الطرف الآخر... مينفعش تقضي بقية حياتك في حزن .... هى حياة واحدة قصيرة ... وكل حاجة في الدنيا بتتنسي.... وحتلاقي أكيد حد يستاهلك

كمان البوست ده إهداء للي طلب من مش قادرة انها تكتب رومانسي

ها .... كده حلو .... عندي من ده كتير

تاخدوا تاني :d

شكرا لكل اللي سأل عليا

ربنا يكرمكم ويوفقكم ياارب

سلام عليكم

جدو ...عاوز اسألك سؤال

2007-10-05T21:05:00.000+02:00

جدو .... عاوز اسألك سؤال ..ممكن..؟

طبعا .. ممكن

إيه فايدة قراءة القرآن وأنا مش بعرف احفظ كل اللي بقراه...وكمان أول ما بخلص قراءة انسى كل اللي قرأته..؟

امممممم ... ممكن تاخد السلة اللي كان فيها الفحم دي وتروح تملاها مياه من البحر وتيجي

وذهب الولد ووضع ماء البحر في السلة ولكنه ما ان وصل إلي جدو كان الماء الذي ينساب من السلة - المخرمة- قد نفذ

يا جدووو ...اعمل إيه بقى المياه بتقع من السلة ومش عارف املاها

وهنا اقترح الجد ان يذهب الولد لملأ السلة ويأتي بها مسرعا

ولكن

حدث ما حدث سابقا

وهنا قال الجد

تعالى لما أشوف إيه الحكاية

وملأ الجد بنفسه السلة ولكن سرعان أيضا ما نفذ الماء

وجاء تفسير جدو كالتالي

إيه ده بص كده في السلة دي نضفت من آثار الفحم

المياه نضفت السلة رغم انها تنفذ منها

وهكذا القرآن ينظف الإنسان ...القرآن الذي نقرأه وننساه بمجرد الانتهاء من قراءته

سبحان الله

***********

كل سنة وانتم جميعا بخير و ف خير

سلاماتي

تاج دسم

2007-09-27T22:05:00.001+02:00

السلام عليكم

وصلني تاج قنبلة من آخر القراصنة ...كويس انه آخرهم :P ...

بجد شكرا يا فندم

لو قالولك اختارعصر من عصور مصر عشان تعيش فيه تختاراى عصر وفى عهد اى حاكم واشمعنى؟

اسمحلي اوسع الدايرة واقول في اى عصر من العصور على المطلق

كان نفسي اعيش مع الرسول عليه افضل الصلاة وارق السلام...ياخدنى في حضنه ويربت على كتفي ويبوسني في شعري...يااااه...ربنا يهديني ويرضى عني عشان ده يتحقق

اول اولوية فى حياتك عيلتك ولا شغلك ولا اصحابك؟

نفسي اقولك عيلتي هى أول اولوية..بس للأسف الكلية وباقي الأنشطة بتاخد الواحد عن اهله...عارفة انها فترة وحتعدي...بس لو فيه مفاضلة اكيد حختار اهلى أو ححاول أوفق...حقيقي محتارة

ايه اكتر حاجة بتحبها فى رمضان

اننا كلنا تلاقينا مشتركين في حاجة واحدة...كله بياكل في نفس الوقت والمساجد بتتملي وصوت الشيخ من المسجد

وانى باكل مع اهلي..من ساعة ما دخلت الكلية والمرات اللي اكلت معاهم في السنة تتعد على اصابع اليدين

اوصف ليا اجمل فطار ممكن تفطره؟

أكيد حيبقى مع اهلي ونكون لمة كتيييرة اوى او مع اصحابي اللي بحبهم ويكون فيه بيتزا ومكرونة بالشاميل ورقاق و تمر هندي

ولمبادا إدمان :D

ونكون على البحر.. يا سلااام

لو انت حاكم على مجموعة من الافراد حتكون عادل؟ طب حتعمل ايه عشان تتأكد انك حاكم عادل؟

إن شاء الله حكون عادلة..لانى ما ارضاش بالظلم ولأن الظلم صعب ...حعمل ايه بقى عشان اكون عادلة ...حطبق "وشاورهم في الامر" ...حشاركهم في اهدافي والأسس اللي حاطاها والخطط البعيدة والقريبة...حعتمد اعتماد ذاتي على بلدي دون الحاجة الي الغير...حعتمد على طريقة المنافسة الشريفة والثواب للي ينجز

اللى بيبوظ الحكام ..نفسهم ولا الشعب ولا الحاشية المقربة؟؟

الحاكم بشر وكان في يوم من الأيام من الشعب وعارف معانتهم ومشاكلهم...الكرسي هو اللي بيبوظ...النفوس الضعيفة هى اللي بتبوظ...عدم الخوف من يوم الحساب هو اللي بيبوظ...عدم التفكير لحظة واحدة انه مش دايم في الكرسي وانه

الموت لا محالة هو اللي بيبوظ

مين اكتر اعلامى مصرى بتحترمه؟؟

حمدي قنديل..منى الشاذلي... عمر طاهر...حسن عبد الموجود...عبد العظيم درويش...جيهان الغرباوي

قريت ديوان عمر مصطفى صاحب بلوج تجربة" اسباب وجيهة للفرح" عن دار ملامح ولا لسه؟؟

لا ..لم اتشرف

لو ممكن تشتغل شغلانة تانية غير اللى انت بتشتغلهااو كنت بتشتغلها كنت تتمنى تبقى ايه؟؟

اسمحلي يا آخر قرصان استعير جملتك ...لو لم اكن صحفية لودت أن اكون صحفية

ايه تانى بلد تتمنى تعيش فيها بعد مصر؟؟

استراليا

اوصف ليا ترتيبات اجمل فرح ممكن تحضره؟؟

العروسة تكون اختى او اخى او حد بحبه

وبكون انا اللي بجهز كل حاجة ويكون العروسين بيحبوا بعض اوى ويكون فيه توافق ..وبس كده... آه ويبقى في النيل أو بحر أو حمام سباحة...المهم يكون فيه مياه :D

بتراعى كلام الناس والقيل والقال؟ لو اه او لو لا قولى ليه؟

تعالى ناخدها واحدة واحدة...الناس مش بتبطل ولا حتبطل كلام وبالتالي ما اعملش إلا اللي اكون مقتنعة بيه ...لا يتعارض مع اخلاقي ولا مبادئي ولا ديني

صحيت من النوم مالقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنة حتبقى سعيد؟

آه..حبقى في قمة السعادة

السعادة هى؟؟

هى محاولة أن تكون سعيدا...هناك من يقول أن النجاح يؤدي إلي سعادة ولكن العكس هو الأقرب إلي الصواب

فطالما كنت سيدا فإن مود السعادة سيؤدي بك ولا شك إلي النجاح وطالما انك ناجح فأنت بلاشك سعيد

السعادة هى محاولة تحقيق ما تريده وماتضعه من اهداف وطموحات لنفسك

هى تحقيق ما تصبو إليه وعدم الخوف من الفشل والتجربة والتعرف على الآخرين واكتساب الصداقات وطاعة الله ورضاه وتحدي النفس والتفوق عليها :)

عندك امل ؟ اسبابك ؟

الحمد لله ، لو لم يوجد أمل لما وجدت الحياة...حتعيش حياتك مجرد واحد بياكل ويشرب وبس ..لا فائدة منه

لما تحب تهرب من كل شىء بتروح فين؟؟

أماكن كتييرة

لو متوفر بحر بروح أكيد....و مكان فيه كتب..غالبا بيبقى مكتبة مبارك - بيتي الثاني- ...ثم المشى لأنى غالبا بمشي وأنا سرحانة..مافيه مرة مشيت وأنا مركزة...لو مفيش إمكانية عمل حاجة فيهم ...بروح انام

امتى اول مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟

ما اخدتش نفس وقلت انا فعلا كبرت لأني كبيرة من زمان

بس اخدت نفس وقلت أنا لازم اتغير...ادعولي

لما بتعمل عمل خيرى بيكون ايه هو دافعك الاول؟؟

ربنا يرضى عني ...واشوف ابتسامة اللي أدامي...الابتسامة لها سحر فعال وبتريح النفس جدااا

بتشرب سجاير؟لو الاجابة اه ايه شعورك لو شفت ست بتشرب سجاير وليه؟

الحمد لله رب العالمين ..لا

أول مرة شفت ست بتشرب سجاير..كنت داخلة غرفة المدرسين في مدرستي وأنا في ابتدائي..ووجدت سيدة تجلس على الكنبة وحاطة رجل على رجل والجيب بتاعتها كانت قصيرة وسيجارة في بقها..منظرها غبي ومقزز - مش عارفة

دخلوها المدرسة دي بأمارة إيه - منتهى التقزز...ربنا يهدينا جميعا ويرحمنا

بتعرف ايدك اليمين من الشمال ازاى؟

من السلام

ايه اكتر اله موسيقية بتحبها؟

البيانو والجيتار

فى رأيك ليه الذوق والنخوة اتعدموا؟

عشان اتعدم الأخلاق والدين والتمسك بالمبادىء

تسحولي احكي قصة :)

كان فيه مرة راجل ماشي بالصحرا راكب على الحصان بتاعه...لقى واحد مرمي في الصحراء ...نزل من على حصانه وشرب الرجل المطروح ارضا مياه وأكله ...واسترد الراجل انفاسه ...وركبه الحصان بتاعه وهو مشي على الأرض...الراجل اللي استرد انفاسه لكز الحصان وطلع يجري بيه وساب اللي انقذه في الصحراء..الرجل الكريم طلب منه بأعلى صوته ألا يخبر احدا بما حدث...فرجع تانى الرجل الغادر وسأله لماذا ...اجاب الكريم لكى لا تشاع الندالة بين الناس

ايه الحاجة اللى لو حصلتلك تبقى سعيد قوى؟

انى احقق هدف كنت حاطاه

انى اكتسب اصدقاء بجد

انى احس ان ربنا راضي عني

ان ماما تدعيلي :)

تختار يبقى عندك ارض زراعية ولا اجنص عربيات ولا كام عمارة ولا فلوس فى البنك؟

ارض زراعية ...وفلوس في البنك...طماعة شوية

البحر ولا النيل؟؟؟

البحر - رغم انه اخد ابن خالتو من سنه- بس بردو البحر

مركب ولا طيارة؟

مركب.....عندي فوبيا اماكن مرتفعة

عاقل ولا مجنون؟

على حسب الموقف...لما بكون مجنونة بحس انى من غير قيود ورجعت طفلة....ولما بكون عاقلة بحس انى أبلة رجاء اللي لابسة نظارة

:)بس أنا بحبني في كل الأحوال

تقرا كتاب ولا تتفرج على فيلم؟

كتاب...أنا لما بحب اتسلى مبحبش اقزز لب ...انا عندي اقرا مجلة ...- فاكرينها:)-..مبحبش التليفزيون اصلا

.
.

بتمرر التاج لمين؟؟!!!!

مومو...اللي بيني وبينك...انتيم 2...بسبس الروح...شيماء الجيزى....علوة ... مروة عوض صاحبة بلوج يالا نحلم... الراقص مع الذئاب ..برويد ...غمض عينيك ...تخاريف ... مواطن زهقان....خليك واقعي المدون اللي عنده شهادة يا ناس

kimoooz...domalays ....... chez

وأى حد من اسكندرية...لان واحشني البحر "أوي

وأى حد بيحبها وبيموت فيها وبيعشقها...بس بردو مش أدي...اضحك للدنيا :)

جعان يا جدعان

2007-09-15T13:31:00.000+02:00

الخطة الجهنمية

كاميرا (1)

تقف أم ممسكة بابنها الصغير على كتفيها ، بجوارها ولديها الشقيين جدا في موقف مايكروباسات

أول ما تيجي ...تجري بسرعة يا واد يا علي تحجزلنا الكنبة اللي ورا وأنت يا إبراهيم تشيل الشنطة دي وأنت يا شاكر تمسك فيا كويس ..فاهمين يا ولاد ال....

تنفيذ الخطة

أهى يا عيال.. اجري يا علي.. ياله يا إبراهيم

كاميرا (2) زووم إن
منظر لسيارة تويوتا بداخلها سواق أرعن، يسوق بهمجية، مشمئز الوجه ، مكشر عن أنيابه... تكالب عليه أفراد عده

انشقت الأرض بهم وجعلتهم يبدون كالنمل والسيارة كالحلوى

السواق ينزل من سيارته قائلا " بقرف": مش طالع .. والله ما أنا طالع ، وأنا حقفل العربية عاوز آكل يا جدعان ..جعان

أحدهم يرد عليه قائلا: يا عم يوسف افتح لنا العربية نركب ونظبط الحاجة وأنت روح كل زى ما أنت عاوز

السواق : مش فاتح ..جعان يا جدعان

يرد آخر: ما هو بيقولك روح كل و أتأخر زى ما أنت عاوز ..مااحناش مستعجلين

وبعد محاورات ومداولات وشبه محايله من قِِِِبل الأطراف الراغبين في ركوب سيارة "سي يوسف" وافق اخيرا على

فتح أبواب العربة وركوبهم السيارة ....وذهب هو طريقه إلي الطعام

أصله جعان يا جدعان

أهو يوسف جه أهو

بالهنا والشفا يا عم يوسف

الله يهنيكوا.. ها فاضل كام واحد... فاضل 2

واستمر يوسف في وقفته مناديا ..ذاكرا مكان توجهه من أجل الأ يمشي بدون تحميل هذا النفران.
وتمر النصف ساعة ويتململ الجالسون في أماكنهم

ماتيالا يا عم يوسف

يا عم اصبر ده رزقنا ...لسه فاضل 2

سبحان الله... ومكنش رزقك لما مكنتش عاوز تفتح لنا العربية

والسؤال الذي يطرح نفسه الآن :هل إذا اعطيت احدهم سلطة ما يتنطط عليك ويطلع عينيك وهل ما إذا كان في حاجة

؟ إليك يبقى كالحمل الوديع

تاج+ تاج= إيدي وجعتني من الكتابة

2007-08-31T12:44:00.000+03:00

وصلنى تاجين واحد من شوشو الصحفية مع ايقاف التنفيذ..ربنا يفك "إيقافها وتبقى مع سبق الاصرار والترصد
وطلعت مدمنة تدوين..

ازاااى معرفش وانا في حالة الخمول التدويني دي أومال لو كنت في أوج ازدهاري

نيجى بقى للأسئلة
مين أكثر 6 أشخاص بتحبهم؟
هما مش 6 بس
على المستوى الاسري: باباتي، ماماتي، أخي ، أختي
على مستوى الاصدقاء : مومو، نونا، شوشو، يويا، سوسو

هل أنت سعيد؟
من وجهة نظري السعادة هى نتيجة للنجاح والعكس صحيح ،
والنجاح – من وجهة نظري بردو- أنك تحط هدف وتوصله
ياسلاااااام تبقى في قمة السعادة،
بالإضافة الي مسألة تحدي النفس،
وأنا متوصاش وفي حالة تحدي رهيب لنفسي وفي خناق دايما مع بعض

لو اجتمعت مع حسنى مبارك حتقوله إيه؟
حقوله أن العمر اللي راح مش زى اللي العمر اللي جاى

لو معاك مليون ونص حتعمل بيهم إيه؟
حعمل مؤسسة صحفية وحطلع جورنال ساخر محترم وحشغل صحابي فيها
وممكن كمان اعمل شركة أنا وأخي ..صحيح هى حتبقى شركة هندسية
بس أنا حبقى اللسان الإعلامي فيها:D

بتحب مصر؟
بلدي..طبيعي احبها
لينا بوست قريب في الحوار ده

أنت مسلم؟
الحمد لله رب العالمين

ليه؟
أنا فرحانة على نعمة الاسلام اللي ربنا أدهالي..مسلمة لأن أهلي مسلمين
بس بحاول اكون على درجة كبيرة من الإيمان
وحدددوه:D

مين اكثر شخصية متقدرش تستغنى عنها؟
ماماتي

إيه أكثر موقف محرج؟
آآآآآآآخ..جينا للحورارات اللي مش ولابد
هما موقفين محرجين جدااااا
واحد لا ممكن أحكيه حصل من كام أسبوع..وبالمناسبة كنت بفكر اعمل فكرة شريرة واستغل البلوج بتاعتي في كده بس خلاص بقى..حقي حاخده عند ربنا..وربنا يهدي

الموقف الثاني
كنت في 2 ثانوي عايشة حياتي بالمستشفى واتصاحبت على ناس كتييير ..من ضمنهم احد الشخصيات اللي كل شوية بتبعتك اسمه مصطفى... وبما إني أنا أكبرهم فكنت البوس بتاعهم وبحدد انهاردة حنقضي الليل فين يا عيال..المشرحة ..لأ لأ قديمة ..روحناها امبارح ، فكروا في غيرها
وفي احدى الليالي كنا معديين على قسم القلب وجايين ندخل البلكونة
وأنا المتصدرة القافلة بصفتي الكبيرة ومعايا مصطفى بصفته أكبر ولد
وجايين ندخل البلكونة لقيته بيعمل سوري بإيديه
وبذكاء منقطع النظير افتكرته بيبعتني زى كل مرة
وقلت لا منكن أبدا كل مرة بيبعتني وأنا بتبعت ..المرة دي مش مبعوتة ووريني نفسك بقى
أتاري وأنت داري كان فيه بشمهندس جوه
وفهمت سوري اللي عملها مصطفى بإيده انها باي
إزااااى معرفش آل يعني أنا فقساه بقى وعارفة حركاته دي
فبتريق عليه وبعمل باي اشمعنى هو يعني:D
لقيت حد جوه بيبص لي بصة تحمل معاني كتييير أوي
منها إيه البنت العبيطة دي..دي مجنونة دي ولا إيه
عاااااااااااااااا

الأمنية التي تتمنى تحقيقها؟
يارادل قول أماني مش أمنية
اعرف أن ربنا راضي عني..
وربنا مايحرمنيش من الاصدقاء – أكبر نعمه فعلا- و
أبقى رئيسة تحرير ثاني صحيفة ساخرة في القرن ده
ب 99 قرش ونص قووووووووووووووووول جنيه
وأرضى عن نفسي وأبطل خناقة معاها
وأربي ولادي تربية كويسة جدا
حخليهم زيي:D
بس حطلعهم شريرين وبلطجية
ومش حغلط غلطة بابا وماما أبداا
وأطلعهم عيال هادية ومحترمة
..لا ..
محترمين آه بس بلطجية..
يعني حشربهم البلطجة والصياعة بأدب من البيت
مش حخليهم يكتسبوها من الشارع بحكم التجربة والاحتكاك مع البشر
حعرفهم ان زى ما فيه حاجة حلوة أوي وناس ذوق ذوق ذوق الصراحة
حعرفهم أن فيه حقارة برة ..مش حخليهم يتصدموا يعني
عيال مؤدبة ومحترمة بس بلطجية وصايعة
معادلة "مونتازة" جدا

**
***

نيجي للتاج الثاني من بسبس صاحبة مدونة الروح

ماهو مدى استخدامك للانترنت؟
إيميل، متخصص(إعلامي).

كيف ترى هذه الحملة ومامدى تأثيرها على المستخدمين والمختصين؟
بكل تأكيد سترجعنا إلي الخلف ولا تعد بأى حال من الأحوال مظهر من مظاهر التقدم ،
وخاصة بقى أن اللي عرفته ان خدمة الايميل حتبقى مفتوحة 24 ساعة
يعني الهدف مش حماية أولادنا من تضعييهم لوقتهم في الشاتنج
ده حتى اللي مالوش فيه حيبقى مدمن شات ..ماهو مفيش حاجة ثانية أدامه يعملها

ما رأيك بقرار وزير الاتصالات الجديد؟
طبعا حيؤدي إلي تقلص خدمة الانترنت في مصر
فيه حاجة درسناها اسمها استطلاع رأى ،
يعني لما تحب تاخد قرار متعلق بالشعب ابقى خد رأيهم الأول

ماهى أسباب الوزير المعلنة وغير المعلنة في رأيك؟
المعلنة مش حتكلم فيها لاني مش مقتنعة،
معلنة بقى ..أن البلوجرز وأصحاب المواقع زودوها أوي
ودي ضربة صغننة على الإيد

هل تهدف الحكومة من هكذا قرار بتطبيق المبدأ العربي الشهير ألا وهو فرض الوصاية على هذا الشعب القاصر ( من وجهة نظر الحكومة)؟
والله تقدر تسميه وصاية..تقدر تسميه لفت نظر..إنذار...وسيلة للتلهى

كيف سترجع الحكومة عن قرارها؟
لا مش بالضغوط الخارجية...إذا احنا كل مرة بنعتمد على غيرنا في أخد حقنا – وياريتنا بناخده في الآخر- يبقى حنغفضل طول حياتنا ما بنتغير ...أما إذا قررنا حاجة واحنا اللي دافعنا عنها بصدق يبقى فيه نتيجة إن شاء الله
من لايدافع عن حقه لا نستحقه

كيف تصف هذا الحدث؟
إنذار أول

هل يستحق وزير الاتصالات الائتمان على أمن مصر المعلوماتي وصناعة التكنولوجيا بمصر بعد أن أثبت سوء نيته ومشروعه الذي يهدف إلي تدمير البنية التحتية لصناعة المعلومات في مصر؟
أكيد لأ

ماذا تتوقع من تفاعل هذه الحملة عربيا وعالميا ومحليا؟
اللي ربنا عاوزه حيكون... بس اتمنى نجاحها

هل أثبتت وزارة الاتصالات والمعلومات في مصر جهلها العلمي والمعلوماتي وسوء تقديرها للظروف المحلية والدولية ..واستغلالها للوضع المحلي؟
بكل تأكيد

هل ترى أن نجاح الحملة يتمثل في..؟
وضع النظامين تحت بند اختياري

ماذا ترى في المناورة الأخيرة للحكومة تحت ضغط المرحلة الأولى من الحملة؟
فاكرينا قاعدين ببرنيطة..ورابطين الفيل برة
**
*
آخ

تعبت

اعتذر على الإطالة
*
*
التاجين لمين

اللي بيني وبينك
انتيم 2
مومو
شوشو..التاج الثاني
برويد
عاشقة الوطن
بسبسة ..التاج الاول
رغدة
علوة
الراقص مع الذئاب
شريف
وأى حد عاوز ياخدهم ..ياهلا

التاج الأخير بتاع الحملة حتلاقوا الأسئلة كاملة ببعض الاختيارات في مدونة بسبس
واختبارإدمان التدوين حتلاقوه في البانر اللي على إيدكم الشمال ..أيوه صح كده ..قبل الساعة
سلاااام

ماما ومومو وبسمة وشوشو

2007-08-23T07:34:00.001+03:00

كل ثانية وحضرتك بخير

يا أجمل ماما في الدنيا

(24-8)

ربنا يديكي الصحة يا ماماتي

ويحققلك كل اللي حضرتك عاوزاة

ويستجيب لدعواتك

ويهديلك العيال ولادك:D

ومين تاني

مين تاني

منى

مومو

(14-8)

كل سنة وانتي طيبة يا مجرمة

ياللي اكتشفت عيد ميلادك بالصدفة البحتة
كل سنة وانتى بخير

ويارب تحققي كل اللي انتى عاوزاة

وتبقي حاجة كبيرة أوى زى إيفي لي

أو إدوارد بيرنز

كل سنة وانتى في صحة وهنا يا أجمل مومو في الدنيا

ومين تانى

عيد ميلاده

شوشو

الصحفية مع إيقااف التنفيذ

العسووووووولة أوي جدا خالص

(20-8)

كل سنة وانتى بخير ياشوشو

في صحة وسعادة وهنا للأبد

ومين كمان

بسبسة

(31-8)

بسبس الروح

كل ثانية وأنتي بخير ياحبي

يارب دايما نجاح

كل ثانية وأنتم بخير جميعا

ماما

كل ثانية وحضرتك في صحة وخير وهنا يا ماماتي

ربنا يخليكي ليا

و...كنت حتعض

2007-07-13T17:38:00.001+03:00

ما سمعتونيش وأنا بصرخ انهاردة في الشارع

بتصرخي..؟!

آه، أدركت انى أملك حنجرة رهيبة..أطلقت صرخة أيقظت النائم وأزعجت الميت

امتى ده..؟!

الصبح...إيه ماسمعتنيش ..ده أنا كنت تحت البيت

ليه..ايه اللي حصل.؟!

كلب..كلب شرس كان مستخبي ورا الزرع في الجنينة ونط عليه

و...عضك؟

أكيد..لأ يعني

متأكده أنك ماتعضتيش.......ولسان حاله بيقول البت دى ماتقعدش تأكل معانا

يعنى حيكون عضني وواقفة بكلمك..هو فتح بقة آه وكان مصمم يأكلنى انهاردة

وبعدين

أبدا يا سيدي..هو كان مستخبي وأنا ماشية عادي خال"ث" ولا على بالي..لقيت حاجة سريعة جاية من الزرع اللي جمبي وبتنط..أنا افتكرتها قطة ولا أى حيوان..لأ ..بس كلب ..لأ لأنى عمري ما شفت كلب بينط النطة دى

ها..؟

وبعدين حاولت أتفادى أيا كان اللي بينط وطلعت 3 سنتيمتر قدام زيادة بس جابني بردو ومن كتر شدة اصطدامه بيا كنت حقع..إهىء إهىء

كان مصمم انه يأكلني انهاردة..راح ناطط عليا تانى بعد النطة الأولانية واللي تبعها طلوع 5 سنتيمتر واستغراق 2 ث لاستعادة توازني..وهنا أطلقت حنجرتي وقدمي الأولي للصراخ والثانية للجرى..لا يا أخويا ..أصل العمر مش بعزقة..لاتقولي برستيج ولا يحزنون..وشكلي بقى والكلام ده..برستيج وآخدلي 3 ولا 4 حقن ..بعد الشر

ها..كملي وانجزي..؟

المهم..ظهرت فتاة بعربتها ..كالفارس على جواده انتشلتنى من بين أنياب ذلك المتوحش وطارت بيا بالعربية

بالمناسبة

كلمنا شرطة.."مش فاكرة اسمها" بعد اتصالات ومحاولات ومنين بيودى على فين وارقام تليفونات ودول يحولونا على دول...يااااه

وجاء رد الرجل كالتالي:

ساكنين فين؟

...

شرق ولا غرب

...

يوم السبت

اشمعنى

لأن المنطقة بتاعتكم يوم السبت

طب ايه اللي حيحصل

حييجى دكتور ومعاه قوة لحمايته ويرمي أكل فيه سم فيموت الكلب في لحظتها..اصل احنا بطلنا نقتلهم بالرصاص

طب يا سيدي افترض أن الكلاب ماجالهاش مزاج تطلع يوم السبت إيه اللي يحصل أو أن الدكتورجه في وقت ومالقاش الكلاب إيه اللي يحصل

يبقى حظك بقى

لا تعليق

مش حنكر أن الكلاب جعلوني أشاهد عالم الحيوان لايف..معركة بين 4 كلاب وقطة انتهت بانتصار القطة بعد تمسك بالحياة مستميت ومحاولات ومراوغات من قبل القطة ومعركة أخرى بين الكلاب وبعضهم البعض انتهت بإصابة 3 كلاب

بصوا الفرق بين البشر اللي عندنا والراجل بتاع الشرطة الألماني

ده خبر كان منشور في مصراوي

فتاة ألمانية تستدعي الشرطة لمساعدتها في ترتيب غرفتها 5/22/2007 6:13:46 AM
برلين (رويترز) - ضاقت فتاة ألمانية ذرعا بأوامر امها لترتيب غرفتها الي درجة جعلتها ترفع لافتة في نافذة غرفتها تحث المارة على استدعاء الشرطة لنجدتها.
وشاهد المارة في مدينة براونشفيج في وسط المانيا الفتاة التي تبلغ من العمر 9 أعوام وهي تبكي في النافذة وتمسك بلافتة كتب عليها "النجدة.. من فضلك اطلب الشرطة" فيما كان يجلس بجانبها طفل صغير.
وسارع ضباط الشرطة فور اخطارهم الى المكان ليكتشفوا ان الفتاة تشاجرت مع امها بشأن ترتيب غرفتها وانها استعانت بشقيقها البالغ من العمر عامين للفت انتباه المارة.
وقال متحدث باسم الشرطة "الغرفة بدت وكأنها ساحة معركة."
وأضاف قائلا "أبلغ الضباط الفتاة أن عليها ان ترتب غرفتها. وعندما عادوا بعد ساعتين وجدوا الغرفة نظيفة ومرتبة.

كما وجدوا ان الام والابنة تصالحتا ايضا."

وده كمان

كفاية كده عليكم

ومش لاقية تعليق اعلق بيه

سلام

مخنوقة

2007-06-09T20:37:00.001+03:00

نعم حبيبتي فأنا أحبك..أعشقك..كم تمنيت الحصول عليكي..أن أبقى جزء منكي..كم كنت أموت في اللحظة ألف مرة وأناجي ربي في صلاتي لأكن أنا أنتي وأنتي أنا ..أن ينتسب اسمي إليكي..تحديت الجميع من أجلك..عصيت أبي ..ورفضت كلام أمي وأخي من أجل أن أكون منكي.

ولكني الآن أفقت على وهم فظيع..أفقت على الصورة الحقيقية أو لنقل الجانب الآخر من الصورة..أفقت على واقع بشع وحقيقة مؤلمة.

كم صدمت عندما وجدت أنك تحملين الوضيع كما الشريف بين طياتك..كم تحطمت وبكيت مرارا وتكرارا وسألت وتساءلت كيف ولماذا وماهو مصيرنا معا..فالأمر معي أقرب إلي تلقي الصدمات.

لقد الحقتوا الضرر بحبيبتي ..الحقتوا جانب من وضاعتكم وحقارتم وتمسحتم بها ولكني هنا وغيري أيضا سنمنعكم من الحاق الضرر بمعشوقتي بإذن ربي.. وسنحاربكم ونحارب أفكاركم الوضيعة القذرة ونمنعكم من أن تتمسحوا بها

فإن أردتم البقاء في مستنقع الوحل الذي كونتموه لأنفسكم فلكم ما أردتم ولكن إلحاق الضرر بحبيبتي سيكلفكم الكثير

فيا أيتها القذارة المتأصلة في نفوسكم ..أيتها الوضاعة المتمكنة من عظامكم ..أيتها الحقارة المتمركزة في "أعماقكم..أيتها الأفكار الهدامة..أيها العالم القذر الوضيع..فلتذهبوا إلي الجحيم..ولن نجعلكم تتمسحون في بلاطها..فهى صاحبة الجلالة دائما وأبدا

اقرأ العبارات الآتيه..ثم أجب على الأسئلة:

-1-

(فلانة) بتكتب في جورنال( ) ..قريتي موضوعاتها....بإستياء

لأ..المشروع -مشروع التخرج- واخد كل وقتي

بس أنا عارفة وجهة نظرك فيها..هى معايا في المشروع وعارفة دماغها

اصلها عاوزة توصل فبأى طريقة بقى

-2-

لأ..لأ..يا استاذ(..) حاول ماتكلفش الخريجين الجداد ولا اللي لسه بيدرسوا بإعلانات مع المواضيع

اشمعنى

اصلهم لسه حيكونوا متأثرين بميثاق الشرف الصحفي

-3-

أما الغريب حقا والمثير للدهشة..هو ذلك الصحفي ..واعتذر عن إطلاق عليه لقب صحفي..فالصحفي أخلاق قبل أن يكون قلم

ذلك الصحفي كتب موضوع في الجريدة التي يعمل بها يعبر عن استيائه من عدم رفع المدونين شعار لا للصور الإباحية مكتفين برفع شعار لا للكلمات البذيئة

والغريب ..واللي حيجنني فعلا..أن مدونة هذا الشخص تحوي صورا ..قذرة حقيرة..لا لا ..فأنا أظلم الحقارة والقذارة معي.

مش طالبة انفصام في الشخصية..روح عالج نفسك الأول وبعدين تعالى اكتب

إن لم تستحي فافعل ما شئت

الأسئلة

ما معنى قيم ومبادىء وأخلاق؟..(يعنى إيه مش فاهم

أين الدين في حياتنا؟..(كان فيه وخلص

ما معنى الانفصام في الشخصية؟ وماهو أسبابه وطرق علاجه؟وهل هناك أمل ولا هوبليس؟

ما مفهوم الحرية لديك؟ وهل هى تتضمن الحرية الجنسية والصور الإباحية بدعوى إننا نعيش في عصر العولمة والتقدم ولا بدعوى لا حياء في الدين لا حياء في العلم لا حياء في الصحافة؟

الحرية هى ذلك التاج الذي يضعه الانسان على رأسه ليصبح جديرا بإنسانيته(نجيب محفوظ)

أخشي ان نصل للمرحلة التي نقول فيها: "إذا طفحت المجاري يصبح رش العطور والبخور جنونا ومثار تهكم وسخرية".

اخشى أن نصل للمرحلة التي يقال فيه:" إذا شاع الخطأ يصبح تصويبه شذوذا ..والصواب هو ما تآلف عليه المجتمع حتى لو كان خطأ"

وأخيرا

نهاية صاحب الأفكار الجريئة ..كالمعلق..لاهو لمس السماء ولا استطاع الوقوف على الأرض

على الهامش

اعتذر عن عدم السماح لكم بكتابة تعليقاتكم..ليست ديكتاتورية والله..بس كانوا كلمتين في نفسي ورسالة عاوزة أوصلها..وبس.

بوست بحبةهنا

من مدونة مستر برويد

عظيــــــــــــم احترامـــــــــــــــــــــــــــــــــــــــــاتي

بلاك & وايت و بالألوان

2007-05-04T10:47:00.001+03:00

استنى.... عاوزة إيه انجزيني ....تتقري بالعرض مش بالطول .....طيب

بلاك أند وايت.............................. بالألوان

يسعد صباحك يا نينة .. ...................صباح الفل يا قشطة -

يسعد صباحك يا ضنايا............... صباح الخير يا حبيبي -

آه يا سافل وكمان بتردعليا..طاخ............... ما أنت لو كنت أتربيت -

أنا مااسمحش لوغد زيك يضربني............. احترم نفسك -

آه يا وقح ..مكنتش اعرف انك حقير للدرج دى.... أنا أنا برضة اللي احترم نفسي -

سعيدة يا ماما...................................... سلام يا ماما -

سعيدة يا حبيبتي............................ مع السلامة يا حبيبتي -

تسمح سيجارة .................................... هات زيجارة -

بكل سرور............................................ لأ -

تسمح تولعلي................................... طب ولعلي -

بكل ممنونية .....................................فكك مني -

يا جميل أنت يا عسل.......................... يا جامد أنت -

سم كده ........................................لاتعليق -

يا واد أنت يا تقيل............................. والله لذيذ -

ينيلك يا اسمك إيه ........................لا تعليق -...

تصاحبه خبطة على كتفة مع ضحكة مجلجلة

خلاص يا نينتي..عاوزة مني حاجة ......أنا ماشية عاوزة منى حاجة -

تسلميلي.......................................... لأ عاوزة سلامتك -

اقعدوا بالعافية بقى..................................... سلام -

بربع جنيه جبنة .............................2 كيلو جبنة -

حتدفع دلوقتى ولا شكك

ياعم خليها عالنوتة....... عالكاشير..باقتضاب-

يا ألف نهار أبيض يا ألف نهار مبروك ..........مبروك ..ربنا يتمم بخير -

تصاحبه عدة قبلات"بوسات" في نفس واحد

تقشعر لها الابدان

الدكتور لغى المحاضرة انهاردة ......... الدكتور لغى المحاضرة انهاردة -

خيرا فعل ...............فل اللول وتقرأ بضم الفاء واللام الثانية في لول -

بصراحة متهيألي بلاك أند وايت ليها طعم أكتر بكتير من بالالوان ...ولا أنتم رأيكم وات؟

آه..بالمرة

أبريل ..مايو..يونيو

وقت الامتحانات...ليه بتحلوي يا دنيا في الوقت ده بالذات؟

!!!

ها..ليه يا دنيا..ها؟!!!

ممكن لو سمحتي استعير حاجتي؟!!!!

2007-04-23T05:58:00.001+02:00

في حى من أحياء القاهرة الراقية ..حيث الهدوء ...والسكون... والتصميم الرائع لأبنيته...في حى يعني العشش باللغة التركية والتى هى جمع لكلمة عشة -بالمصرية- في حى يمتاز بزهرة الزملك ..وهى مفرد زمالك....حى الزمالك

6- 12-1912

فيلا عالم المصريات الألماني...كاميرا(1) زووووووووم إن

لودفيج بورشادت(ل): شفتي لقيت إيه النهاردة ماى هونى

الهونى بتاع هو(غ): إيه يا ماى لاف؟

ل):لقيت حاجة فظيعة ...حاجة سبشيل خالص..لقيت راس

غ):رأس ...اوه ماى جاد..رأس إيه

(ل): رأس لملكة من ملوك الفراعنة اسمها "نفرتيتي"...وهى زوجة اخناتون وحماة توت عنغ امون...لها ابنتان ميريت اتون وميكيت اتون...توفيت ميكيت وعلى إثر واتها اختفت نفرتيتي من البلاط الملكي وحلت محلها ابنتها الاخرى...وماتت نفرتيتي في العام الرابع عشر لحكم اخناتون ...واسمها يعني"الجميلة اتت" أو "نفرت أتى"

(غ): واااو ..وناوى تعمل إيه

(ل): ناوي اهربها لألمانيا

(غ): بس حتهربها ازاى؟

(ل): حنحط على الرأس وحل "طين" ونهربها ضمن القطع الفخارية المكسورة اللي رايحة لألمانيا للترميم وبكده محدش حيشك خالص

(غ): وااااااو ...برافو

*********************************

أنا اعرف أن لما تكون الحاجة بتاعتي وحد طلب يستعيرها واديتهاله ونام عليها يبقى عيب وقلة ذوق و..... وأنا اتكلم

هنا عن العلاقات على المستويات الفردية، فمابالنا بالعلاقات بين الدول والتى يجب ان تكون اكثر احتراما ومبنية على أساس نم الثقة المتينة وإلا...يبقى الاحسن ..صباح الخير ياجاري انت ف حالك وانا ف حالي

اضف إلى ذلك ان الامر لم يكن مجرد استعارة بل تهريب

*******************************

واعرف ايضا أن منظمة اليونسكو قررت أن كل الآثار المهربة خارج بلدها الأصلية قبل عام 1972 من حق الدولة صاحبة تلك الآثار أن تستردها...ونعلم جميعا أن راس نفرتيتي خرجت عام 1914

**********************************

ولكن الغريب في الامر اننا طالبنا باستعارتها

ياللهول استعارتها؟!!!

طب ماليهم حق يعملوا اكتر من كده...حاجة بتاعتي وبطالب على استحياء بيها ..عفوا باستعارتها...يافرعون إيه اللي فرعنك...؟

********************************

مش عارفة هو احنا بنطبق المثل اللي بيقول يابخت من بات مظلوم ولا بات ظالم...يابشر ده حقنا...من لايدافع عن حقه لا يستحقه

*******************************

لو عاوزين اكتر عن الموضوع دوسوا هنا وهنا وهنا

*************************

إحم إحم ..ممكن لو سمحتي من فضلك بعد إذنك أرجوكي استعير حاجتي..عشان خاطري!!!!!!!!!!!!!!!!!!

3 باقات

2007-03-29T05:41:00.002+02:00

السلام عليكم

على غرار

يسر شركة...أن تعلن عن ..

يسرنى إهداء تلك الباقة إلي المدون "مستر خالد

ميرسي يا فندم...أنا مغرمة بأى صورة فيها فنجان قهوة

فما بالك بالتمبليت الجميل ده

لو عاوزين اللينك دوسوا هنا

********************

والباقة التانية لمامتى

حد عنده اعتراض

"كل ثانية وانتى بخير يا أمى"

************************

وأجمل باقة

لينا جميعا

بمناسبة مولد الرسول عليه الصلاة والسلام

اللهم صل وسلم وبارك على سيدنا محمد

***********************

آه...بالمرة

ادعولى عندي امتحانات

سلام

حبيبتي..المرحومــــــــــــــــــــــة

2007-03-18T15:58:00.001+02:00

أنا اعرف أن الواحد بيفتكر الحاجات اللي بيحبها ..يوم ميلاد...يوم زواج..يوم طلاق لو كان مطلع أو مطلعه عينه..يوم التخرج...أول يوم شغل... إنما يفتكر يوم جورنال اتقفل ..أهو ده اللي مش معقول

يا بنتي أنتي مالك...ممكن تخليكي ف حالك

لأ..ثواني ماهو مش معقولة..ده جنان يا ماما وبعدين الجورنال اتقفل يوم 14 أو قبل كده كمان بكام يوم السنة اللي فاتت جاية تعملي بوست دلوقتي...وبعدين مش كفاية حبيبتي المرحومة

أنا مش حلبس أسود وأقف دقيقة حداد...أنا بس بحيي ذكراهم مع نفسي

يا بنتي ده مش مبرر...ومش معقول لسه بتقري الأعداد القديمة لحد دلوقتي...متهيألي انك قربتي تسمعيهم...مش معقول تفضلي زعلانة علي حاجة راحت خلاص ....اعقلي بقي يا ماما

يا ستي لما يكون البلوج بتاعك يبقي اعملي اللي أنتي عاوزاه...مش حتتحكمي فيا كمان

نعم؟!!! إنتي ناسية إنه بتاعي

يووووووووووووووووه...مش حرد عليكي

****************************

آه

فاكرة لما طلعتوا..كنت ف ثانوية عامة وداخلة علي امتحانات

فاكرة اليوم ده كويس

أخويا داخل من برة وف إيده جورنال

افتكرت إنه جورنال عن الأهلي كعادته كل يوم جمعة

بس طلع ضحكتي

بصي يا مااااااما جورنال جديد ساخر

امشي ذاكري إنتي ناسية انك في ثانوية

أنا(مركزة مع الجورنال)

سيبي الجورنال على الترابيزة وادخلي أودتك..إنتي ناسية يا هانم إن امتحاناتك احتمال تبقي بدري 10 أيام-طلعت أوشاعات مغرضة ف الآخر

قعدت أنا وماما نلعب لعبة القط والفار

هى تخبي الاعداد وأنا الاقيهم

وتظبطني متلبسة بقرايتهم

يا بنتي يا حبيبتي..بكرة يبقى عندك الأجازة طويلة عريضة وتقري فيها براحتك..يعني أنا بشيل الأعداد دي لمين..يعني أنا غاوية كركبة..روحي ذاكري ربنا يهديكي

لغاية ما تعبت معايا واكتشفت كل الأماكن والمخابىء اللي ممكن تخبي فيهم الجورنال وطلبت ف الآخر من أخويا إنه مايجيبش الجورنال ده تاني...أنت فاهم لو شفتك جايب الجورنال ده تاني حقطعه

ههههههههههههههههههههههههههههههههههه

بس علي مين

اتفقت أنا وهو إنه لما ييجي يخبط خبطة معينة ..واجري انا افتحله بسرعة عشان ما نتقفش

آه

فاكرة يا ماما لما خبيتي الأعداد في أودتي

ويوم ما خلصت امتحانات بقولك هاتيلي الاعداد

لقيتك رايحة أودتي وبتفتحي دولابي وبتخرجيهم

أهى دي آخر مكان كنت ممكن أدور فيه

وعلي شفتيكى ابتسامة عريضـــــــــــــــــــــــــة

يعني الأعداد كل الوقت ده معايا في الأودة وأنا بدور عليهم برة

ولما دخلت الكلية كنت بتقفش وأنا بقرا الاعداد وصابح عليا امتحان

والله لو ما بطلتي تقريهم لاحرقهملك أدام عنيكي..قومي ذاكري

ما أنا بذاكر يا ماما...انتي ناسية ان قرايتي للجورنال مذاكرة

أنا بطبق عملي اللي بدرسه...كلامي يصاحبه ابتسامة استعبـــــــــــــــــــــــــاط

***********************

يالا بقي

قفلتي وخلاص

بس

تحية إلي كل من امتعني واسعدني واسعد غيري علي مدار عام إلا أسبوعين

تحية إلي كل من حاول أن يرسم البسمة والأمل عن طريق السخرية

والتي قال عنها برجسون"إننا حين نضحك من المقصر أو الشاذ المظهر أو صاحب الغفلة أو الشحيح أو المغرور فإنما نؤدبهم بطريق غير مباشر أى إننا نؤدي خدمة اجتماعية هامة"

تحية إلي من تمنيت أن انضم إليهم ولكن حظي العاثر هو من منعني..تحية إلي من تعرفت عليهم من الجريدة (3أو 4 ) وإلي من لم يسعدني حظي العاثر بالتعرف عليهم

تحية إلي حبيبة قلبي "اضحـــــــــــــــــــــــــــــــــــــــــــــــــــــــــــــــــــــك للدنيـــــــــــــــــــــــــــــــــــــــــــــــا"

يوم من عمري:D

2007-03-11T04:17:00.001+02:00

السلام عليكم

تررن تررررررررررررررررررن

اهلا أنتي شرفتى..حمدا لله علي سلامتك

الله يسلمك يا بابا

هو انتى مش عندك رحلة بكرة

آه

أومال أتاخرتى ليه
ده اليوم العالمي للمرأة يا بابا

...................!!

.................
الساعة الخامسة والنصف صباحا

بابا بابا..اصحى

ايه خلاص انتى نازلة

لا..نازلة كمان ربع ساعة بس اصحى عشان تعملي الكاميرا

..............
الراجل لسه صاحي من النوم ومش مركز خالص

مش كنتى تجيبهالي امبارح

ما هو كنت ناسياها اصلا

............................
السادسة إلا خمس دقائق في الشارع

الشارع فااااااضي ولا عربية ولا أي حاجة
الله

شكلي حقضيها هنا

إيه المشكلة يعني

المياه اهى موجودة...بواقي غسيل السيارات

والاكل في الشنطة

قشطة

وفيه طوب علي الارض

يعنى ممكن احدفه في المياه كأنى بحدفة في البحر

حلو....مفيش مشاكل

يالا عشان الباس حيمشي

عشان مروحين

ايه ده اليوم خلص بسرعة

صحيح

الباس كان حيعمل 4حوادث واحنا مروحين2

مع نفس اللوري

وواحدة مع عربية ملاكى نبيتي بالامارة

والرابعة كان حيدخل في الرصيف
بس بجد كان يوم تحفة وجميل جدا

اسيبكم بقي تستمتعوا بالصور

آه نسيت اقوكم الصور دي في رأس سدر

-----------------------------

تحديث :

تم حذف كل الصور لأنها بتقل البلوج أوى

اللي عاوز الصور يقولي وانا ابعتهاله

سلام

ليك شوق ف حاجة!!

2007-02-25T15:32:00.001+02:00

قرأت كتاب "ليك شوق ف حاجة"ل"محمد فتحي"أبو عمر""
بصراحة الكتاب دخل" دماغي" جدا وخاصة آخر فصلين..حاجة كده تدى أمل في الحياة ولا أحسن طبيب نفسي
فيه حاجة بقى لفتت نظري
محمد فتحي في "مطلوبون في قصر العروبة" بيقول

:
"من هذا المنطلق إذن كنا نتمنى أن نرى عماد الكبير سائق الميكروباص البسيط الذي عذبوه ........الخ

كنا نتمنى أن نرى عماد يصاح الرئيس وتنقل وكالات الأنباء ترحيب الرئيس به وطبطبته عليه طالما أن أحدا آخر لم يفعلها وطالما أن هناك من يحاولون تمويع الأمر ........الخ
كنا نتمنى أن يستقبل الرئيس مبارك الصحفيات اللواتي تم انتهاكهن في استفتاء المادة

76......الخ
كنا نتمنى أن يستقبل مبارك أسر الذين قتلوا في أحداث انتخابات 2005 أو على الأقل أسرة الشاب الجميل الراحل مصطفى السقا ........الخ

كنا نتمنى أن يستقبل الرئيس في قصر العروبة أهالي ضحايا محرقة بني سويف وأهالي ضحايا العبارة المنكوبة بدلا من......................الخ

كنا نتمنى أن نرى بعض رموز هذا النظام ي مكانهم الحقيقي...الخ "

يالا بقي...معنديش تعليق غير إني أقولك..مبروك الكتاب رائع
وأتمنى واحلم زى ما أنت عاوز أهي هي دى الحاجة الوحيدة اللي ماابقيناش نتحاسب عليها ولا يمكن يكون في المستقبل

قانون جديد يمنع الحلم ويصادر الأمنية ...ويعاقبوا بناء على "إنما الأعمال بالنيات"..ولا تلاقيهم ناطين فوق السرير وأنت بتحلم وقابضين عليك متلبس بالحلم"

آه ....بالمرة
الحلم يعنى الحاجة اللي بنتمناها وقد تتحقق وقد لا تتحقق ..احلم بقي وأتمنى بس ولا حاجة حتحقق

أنا هنا ليه..؟

2007-02-15T04:25:00.001+02:00

أنا هنا ليه...؟

أنا إيه اللي جابنى هنا..؟

.مش قادرة=

.مش فاهمة.. مش قادرة على إيه يعنى؟-

.مش عارفة=

.؟؟؟؟-

.أنا إيه اللي خلانى اعمل البلوج ده أصلا=

آه ، يمكن عشان عاوز اتعرف على صحاب جداد وتفكير اجدد

يمكن عشان احط كل اللى أنا عايزه اقوله واللى من الصعب إنه يقال فى الخارج

يمكن عشان ......يووووووووه

كفاية تكهنات

.الأيام حتبين أنا عملت المدونة دى ليه

.طب إيه حكاية مش قادرة دى..؟-

.آه،الحكاية ومافيهاإنى مابقدر اعبر إلا بالكتابة يعنى الكلام كوسيلة للتعبير وسيلة فاشلة جدا معايا=

.طيب برضة إيه علاقتها بالاسم؟-

.مش عارفة بس والله لو عرفت- ده وعد منى- وقدرت احدد اشمعنى حقول لكم=

.متهيألى احسنلك تسميها" مش عارفة" احسن من "مش قادرة-

.مش عارفة=

.وهأنذا احط رحالى فى عالم المدونين=

.اتفضلى حطى-

.شكرا=

.عفوا-